Terry ថា Chelsea ក្រោម Mourinho អាចផ្ដួល Man City ក្រោម Pep បច្ចុប្បន្នបាន

2017-12-19 13:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែការពារ John Terry ក្នុងថ្ងៃនេះ បាននិយាយថា អតីតក្រុមរបស់ខ្លួន Chelsea ក្នុងរដូវកាល ២០០៤/២០០៥ ឬ ២០០៥/២០០៦ អាចបំបាក់ក្រុម Manchester City ក្រោមការដឹកនាំរបស់លោក Pep Guardiola បច្ចុប្បន្នបាន។

ពេលសួរដោយសារព័ត៌មាន Sky Sports ថាតើមានក្រុមណាក្នុងប្រវត្តិសាស្ត្របាល់ទាត់អង់គ្លេសដែល Terry គិតថាអាចប្រជែងពានជាមួយ Manchester City បច្ចុប្បន្នបាន ខ្សែការពាររូបនេះបានឆ្លើយទៅវិញថា៖ "ខ្ញុំអាចនិយាយបានថា ក្រុម Chelsea រដូវកាល ២០០៤/២០០៥ ឬ ២០០៥/២០០៦ ក្រោមការដឹកនាំរបស់ Mourinho អាចធ្វើបាន"។

ពេលសួរបញ្ជាក់ថា ក្រុមទាំងហ្នឹងអាចលេងឈ្នះ Manchester City របស់លោក Pep ឥឡូវទេ វីរបុរសក្លឹបតោខៀវរូបនេះ បានតបយ៉ាងខ្លីថា៖ "បាទ បាទប្រាកដណាស់។ ពួកយើងមិនខ្លាចទេ ក្រុមដែលមានសាច់បាល់លេងច្រើនជាងយើង ដោយសារពួកយើងប្រុងប្រៀបជាស្រេច"។ ខ្សែការពារ Terry បានពន្យល់ទៀតថា៖ "ពេលហ្នឹងពួកយើងមានកម្លាំងខ្លាំង យើងមានខ្សែការពារស្លាបល្អ យើងមាន Claude Makelele ដែលជាខ្សែបម្រើការពារដ៏ល្អ ហើយយើងមានខ្សែប្រយុទ្ធមុតស្រួចនៅពីមុខយើង គេនោះគឺ Didier Drogba។ បន្ថែមពីហ្នឹងយើងមាន Frank Lampard ដែលជួយគាំទ្រ Drogba ដើម្បីសម្រួលដល់ការស៊ុត"។

គួររំលឹកឡើងវិញផងដែរថា លោក Jose Mourinho បានចាកចេញពី Porto មកដឹកនាំ Chelsea ដំបូងនៅក្នុងឆ្នាំ ២០០៤ ហើយក៏បានឈ្នះពានលីគកំពូលអង់គ្លេសពីរដងជាប់គ្នា នៅពីររដូវកាលដំបូងរបស់ខ្លួន។

ខ្សែការពារ John Terry បានលេងឲ្យ Chelsea រហូតដល់ជិត ២០ឆ្នាំ ហើយទើបតែចាកចេញពីក្លឹបប៉ុណ្ណោះកាលពីឆ្នាំ ២០១៧នេះ។ ក្រោយមក Terry បានចូលរួមជាមួយក្លឹប Aston Villa ដែលកំពុងលេងក្នុងលីគ Championship ដែលជាក្របខ័ណ្ឌបាល់ទាត់លំដាប់ពីរនៅអង់គ្លេស។

សូមបញ្ជាក់ផងដែរថា ក្លឹប Manchester City ក្រោមការដឹកនាំរបស់លោក Pep Guardiola បានបង្ហាញទម្រង់លេងយ៉ាងញាក់សាច់នារដូវកាលថ្មីនេះក្នុងលីគកំពូលអង់គ្លេស ដោយស្មើតែម្ដងគត់ក្នុង ១៨ប្រកួតចុងក្រោយ ក្រៅពីហ្នឹងឈ្នះទាំងអស់៕