គួរឲ្យអាសូរ! ត្រីផ្សោតសមុទ្រកម្រមួយក្បាលស្លាប់ ដោយសារស៊ីចំណីខ្ចប់ក្នុងថង់ប្លាស្ទិក

2018-08-15 04:54:05
ចំនួនមតិ 0 | ចំនួនចែករំលែក 0

ចន្លោះមិនឃើញ

មន្ត្រីឲ្យដឹងថាត្រីផ្សោតសមុទ្រមួយក្បាលមានទម្ងន់ជាង១០០គីឡូក្រាម ត្រូវគេប្រទះឃើញថាស្លាប់នៅឆ្នេរកោះរ៉ុងសន្លឹមកាលពីព្រឹកមិញ ដោយសង្ស័យថាស្លាប់ដោយសារស៊ីចំណីដែលសេសសល់ខ្ចប់ក្នុងស្បោងប្លាស្ទិច។

(សពត្រីផ្សោតគេប្រទះឃើញព្រឹកមិញនៅឆ្នេរកោះរ៉ុងសន្លឹម/រូបភាព៖ ឯ. ខៀវ កាញារីទ្ធ)

ឯកឧត្តម ខៀវ កាញារីទ្ធ បានសរសេរនៅលើទំព័រហ្វេសប៊ុកនៅព្រឹននេះដោយយោងតាមប្រភពមន្ទីរព័ត៌មានខេត្តព្រះសីហនុថា នៅព្រឹកនេះផ្សោតសមុទ្រកម្រមួយក្បាលទម្ងន់ជាង១០០គីឡូក្រាមបានប្រទះឃើញនៅលើឆ្នេរកោះរ៉ុងសន្លឹម។ ប្រភពបន្តថា ត្រីផ្សោតនេះទំនងជាស្លាប់ច្រើនថ្ងៃមកហើយ និងបានរសាត់មកដល់ឆ្នេរកោះមួយនេះ។

បើតាមប្រភពដដែលមន្ត្រីជំនាញសន្និដ្ឋានថាត្រីផ្សោតនេះស្លាប់ដោយសារស៊ីចំណីសេសសល់ខ្ចប់ក្នុងថង់ប្លាស្ទិកដែលអ្នកធ្វើដំណើរតាមសមុទ្របោះចោល។ ប្រភពបន្តថា៖ «ទំនងជាងាប់ដោយសារតែ វាបានសុីចំណីសេសសល់ខ្ចប់ក្នុងស្បោងប្លាស្ទិកដែលមនុស្សបោះចោលពេលធ្វើដំណើរតាមផ្លូវសមុទ្រ ច្រើនលើសកំណត់ ព្រោះថានៅនឹងមាត់សាកសពត្រីផ្សោតសមុទ្រនេះ គេរកឃើញសុទ្ធតែកញ្ចប់ចំណីច្រកស្បោងប្លាស្ទិក»៕

អត្ថបទ៖ ទូច សុខា