ឡានមួយទឹកទម្លាក់ពីកុងតឺន័រនៅខ្មែរ កំពុងត្រូវប៉ាន់ឈ្មួញទិញលក់បន្ត

2019-05-24 01:51:40
ចំនួនមតិ 0 | ចំនួនចែករំលែក 0

ចន្លោះមិនឃើញ

របរគួកជេឡាន ឬហៅថាឈ្មួញកណ្ដាលគឺជាអ្នកដែលដែលទិញឡានមួយទឹកពីអ្នកប្រើប្រាស់យកទៅលក់បន្ត ឬទិញឡានទម្លាក់ពីកុងតឺន័រជាដើម។

អ្នកប្រកបរបរគួកជេឡានមួយរូប សុំមិនបញ្ចេញឈ្មោះបានប្រាប់ Sabay ថា របរគួកជេឡាននេះមិនទៀងឡើយ ជួនទិញបានឡានដែលគេលក់ប្រញាប់ និងកំពុងមានទីផ្សារបានធូរថ្លៃ យកមកលក់បន្តបានចំណេញបានច្រើនក៏មាន តិចក៏មាន។

អ្នកគួកជេមានបទពិសោធន៍រកស៊ីឡានជាច្រើនឆ្នាំនេះប្រាប់ថា ពីមុនមិនសូវមានអ្នកចេះរកស៊ីបែបនេះច្រើន ចេះតែរកបានគួរសម តែដល់ពេលឥលូវមានច្រើនពិបាករកស៊ីណាស់។ លោកបន្ថែមថា គួបផ្សំបច្ចុប្បន្នមានការាសលក់ឡានមួយទឹកច្រើន អ្នកទិញអាចដើរជ្រែតម្លៃបានតាមចិត្ត មិនពិបាកខ្លាចអ្នកគក់ជេរធ្វើស៊ីរឿងតម្លៃឡើយ។

បច្ចុប្បន្នលោកងាកមកចាំទទួលឡានទម្លាក់ពីកុងតឺន័រ ដែលឈ្មួញទិញពីស្រុកក្រៅដឹកពីកំពង់សោមមកទម្លាក់នៅភ្នំពេញ។ ពេលដឹកមកដល់អ្នកធ្លាប់រកស៊ីជាមួយគ្នា គេនឹងខលប្រាប់ហើយលោកទៅមើល និងរើសយកឡានណាខូចខាតតិចតួច បើត្រូវមួយណាដាក់តម្លៃត្រូវគឺយកមកតែម្ដង។

ពេលគេទម្លាក់ម្ដងៗលោកទិញតែមួយ ឬពីរគ្រឿងប៉ុណ្ណោះ ទៅតាមលុយមានក្នុងដៃនិងត្រូវយកទៅធ្វើបន្ថែមមុនពេលលក់ចេញ។ ចំពោះរយះពេលធ្វើ អាស្រ័យទៅតាមស្ថានភាពឡាន តែយ៉ាងច្រើនពីរសប្ដាហ៍ប៉ុណ្ណោះលោកនឹងដាក់លក់វិញហើយ។

ការដាក់លក់ លោកបានយកទៅផ្ញើនៅការាសអ្នកស្គាល់គ្នា នៅពេលលក់ចេញលោកឲ្យតែថ្លៃជួលការាសគេបន្តិចបន្តួចប៉ុណ្ណោះ ចំពោះអ្នកមានការាសផ្ទាល់ខ្លួនអាចសល់លុយចំណេញច្រើន។ គិតទាំងថ្លៃទិញឡាននិងធ្វើឲ្យស្អាតមុនពេលលក់ចេញត្រូវចំណាយលុយធ្វើពី ៥០០ ទៅ ១ ០០០ ដុល្លារ ឬច្រើនជានេះក៏មាន។

នៅពេលធ្វើរួច លក់ចេញលោកប្រាប់ថា មួយគ្រឿងអាចចំណេញបាន ៣០០ ទៅ ៤០០ ដុល្លារ អាចតិចឬច្រើនជាងនេះទៅតាមតម្លៃទីផ្សារបច្ចុប្បន្ន៕

អត្ថបទ៖ ម៉េងងី