ភ្លឺភ្នែក! រូបបដិមាព្រះពុទ្ធមួយព្រះអង្គ ប្លែកខុសគេនៅសារមន្ទីរអង្គរ

2018-01-18 08:43:51
ចំនួនមតិ 0 | ចំនួនចែករំលែក 0

ចន្លោះមិនឃើញ

បដិមាព្រះពុទ្ធជារូបសំណាកដ៏ឧត្តុងឧត្តមសម្រាប់ជនជាតិខ្មែរគោរពបូជា។ ជាទូទៅព្រះពុទ្ធបដិមានៅកម្ពុជាមានច្រើនទម្រង់ និងច្រើនសណ្ឋានណាស់ ប៉ុន្ដែកម្រនឹងមានព្រះពុទ្ធបដិមាដែលមានភ្នែកតឹង និងព្រះបាតមានពាក់ទ្រនាប់ជើងផងដែរ។ យ៉ាងណាមិញបដិមាប្រភេទនេះកំពុងដាក់តម្កល់នៅក្នុងវិចិត្រសាលព្រះមួយពាន់របស់សារមន្ទីរជាតិអង្គរ។

លោក សេង កុម្ភៈ ប្រធានផ្នែកថែរក្សាសមច្ច័យនៃសារមន្ទីរជាតិអង្គរ ឲ្យដឹងថា បដិមាព្រះពុទ្ធពាក់ទ្រនាប់ជើងមិនមានច្រើនឡើយនៅកម្ពុជា និងមានតែមួយគត់នៅក្នុងសារមន្ទីរជាតិអង្គរ។ បដិមាអង្គនេះធ្វើឡើងពីឈើមានរចនាប័ទ្មក្រោយសម័យអង្គរ ពោលគឺនៅអំឡុងសតវត្សរ៍ទី១៥ឬ១៦។

លោក សេង កុម្ភៈ បន្ថែមថាៈ «តាមការពិនិត្យ បដិមាអង្គនេះជាព្រះពុទ្ធចិន ព្រោះថាបដិមានេះមានព្រះនេត្រតឹង (ភ្នែកតឹង) និងទម្រង់ចិញ្ចើមខុសទៅនឹងបដិមារបស់ខ្មែរយើង ប៉ុន្ដែការគ្រងស្បង់ និងកាយវិការគឺដូចគ្នាទៅនឹងបដិមាខ្មែរទៅវិញ។ ដូច្នេះយើងអាចសន្និដ្ឋានបានថា ពុទ្ធសាសនិកជាជនជាតិចិន គាត់មានសទ្ធាជួលឲ្យជាងឆ្លាក់បដិមាព្រះពុទ្ធរូបដែលមានលក្ខណៈជាចិន»។

ពាក់ព័ន្ធនឹងទ្រនាប់ជើងដែលរំលេចនៅនឹងព្រះបាតបដិមាពុទ្ធនេះវិញ លោក សេង កុម្ភៈ បានឲ្យដឹងថា វាអាចទាក់ទងនឹងចំណង់ចំណូលចិត្តរបស់អ្នកមានសទ្ធា ព្រោះថាសម័យបុរាណខ្មែរក៏មានលទ្ធិបុគ្គលនិយមដែរ ដែលគាត់អាចបង្គាប់ឲ្យជាងឆ្លាក់ទម្រង់ព្រះភក្ដ្ររបស់ពុទ្ធបដិមាឲ្យដូចទៅនឹងទម្រង់មុខរបស់ខ្លួន និងអ្វីដែលខ្លួនចង់បានបន្ថែមទៀត ជាក់ស្ដែងដូចជាការបន្ថែមទ្រនាប់ជើងឲ្យបដិមាជាដើម។

លោកកុម្ភៈបញ្ជាក់ដែរថា តាមពិតទៅជនជាតិចិនមានទំនាក់ទំនងជាមួយជនជាតិខ្មែររាប់សតវត្សរ៍មកហើយ ជាក់ស្ដែងដូចជាវត្តមានរបស់លោក ជីវ តាក្វាន់ ដែលបានមកដល់អាណាចក្រអង្គរជាដើម។ ដូច្នេះយើងអាចវាយតម្លៃបានថា រូបបដិមាពុទ្ធមានទ្រនាប់ជើងនេះមិនមែននាំមកពីប្រទេសចិននោះទេ គឺអាចជាជនជាតិចិនរស់នៅដីខ្មែរហើយជួលឲ្យជាងខ្មែរឆ្លាក់៕

ចុចអាន៖

អត្ថបទដោយ៖ រស់ សុជាតិ