រូបភាពគួរឲ្យចាប់ចិត្តបំផុត ៥សន្លឹក ប្រចាំសប្ដាហ៍

2018-01-22 03:03:51
ចំនួនមតិ 0 | ចំនួនចែករំលែក 0

ចន្លោះមិនឃើញ

១. សំរាមមិនមែនធ្លាក់ពីលើមេឃទេ

២. ទីសោយសុខក្រោយអាហារពេលថ្ងៃរបស់អ្នកធាក់ស៊ីក្លូ

៣. ប្រភពបន្លែលើទឹកនៅភ្នំពេញ

៤. របរចាក់បង្គាអ្នកភូមិចង្ហោនខេត្តកំពត

៥. បឹងយក្សលោមខេត្តរតនៈគិរី

កាលពីសប្ដាហ៍មុននេះ ក្រុមការងារអ្នកថតរូប Sabay បានផ្ដិតរូបភាពប្លែកៗ កើតមាននៅក្នុងសង្គម ក៏ដូចជារឿងដែលគួរឲ្យចាប់អារម្មណ៍ដើម្បីបង្ហាញជូនមិត្តអ្នកអាន។ រូបភាព ៥សន្លឹក នោះ ទាក់ទងនឹងបញ្ហាសំរាម ជីវិតអ្នកធាក់ស៊ីក្លូ ប្រភពបន្លែនៅរាជធានី របរចាក់បង្គា នៅខេត្តកំពត និងទេសភាពស្រស់ត្រកាលបឹងយក្សលោម ខេត្តរតនៈគីរី។

តោះ! ទស្សនារូបភាពខាងក្រោមនេះ ទាំងអស់គ្នា៖

សំរាមមិនមែនធ្លាក់ពីលើមេឃទេ

សំរាមមិនមែនធ្លាក់ពីលើមេឃទេ បើពួកយើងមិនបោះចោលពាសវាលពាសកាលនោះ។ រូបភាពមួយសន្លឹកនេះ អាចបង្ហាញពីការទទួលខុសត្រូវមួយដែលអាចជាគំរូល្អដល់មនុស្សដទៃផ្សេងទៀតដែលមានចំណេះ តែមិនបានធ្វើដូចពួកគាត់ទាំងនេះ។ រូបភាពនេះ គឺជានិស្សិតរបស់សកលវិទ្យាល័យជាតិគ្រប់គ្រងយកសំរាម និងកាកសំណល់អាហារពេលព្រឹក ដែលពួកគាត់បរិភោគរួចយកមកដាក់ក្នុងធុងសំរាមនៅលើសួនច្បារមួយនៅមុខសាលា។

ទីសោយសុខក្រោយអាហារពេលថ្ងៃរបស់អ្នកធាក់ស៊ីក្លូ

អ្នកធាក់ស៊ីក្លូវ័យកណ្ដាលម្នាក់កំពុងសម្រាកក្រោមដើមឈើធំមួយនៅខាងជើងជាប់របងសាលាបឋមសិក្សាវត្តកោះក្រោយអាហារពេលថ្ងៃរួច។ ជារៀងរាល់ថ្ងៃក្រុមអ្នកធាក់ស៊ីក្លូមួយភាគច្រើនគឺតែងតែមកសម្រាក និងបរិភោគអាហារថ្ងៃត្រង់នៅទីនេះដោយយកដើមឈើ និងសំយាបផ្ទះរបស់ប្រជាពលរដ្ឋនៅម្ដុំនោះធ្វើជាទីសម្រាកយ៉ាងសោយសុខរបស់ខ្លួន។ សព្វថ្ងៃនៅកម្ពុជាមានស៊ីក្លូសរុប៤០០គ្រឿងតែប៉ុណ្ណោះ ហើយជីវភាពរបស់បងប្អូនដែលប្រកបរបរដែលមានអាយុកាលជិត១០០ឆ្នាំនេះនៅតែមានជីវភាពលំបាកដដែល។

ប្រភពបន្លែលើទឹកនៅភ្នំពេញ

បុរស២នាក់កំពុងចែវទូកទៅកាត់បន្លែត្រកួន និងកញ្ឆែតនៅចម្ការលើទឹករបស់ខ្លួនក្នុងបឹងមួយក្នុងរាជធានីភ្នំពេញ។ បឹងចម្ការបន្លែលើទឹកដែលមានទីតាំងនៅជាប់ផ្លូវ៦០ម៉ែត្រខាងក្រោយមជ្ឈមណ្ឌលប្រល័យ ពូជសាសន៍ជើងឯកនេះគឺជាទីតាំងដាំដុះបន្លែ ត្រកួន កញ្ឆែតធំមួយសម្រាប់ផ្គត់ផ្គង់ដល់ផ្សារបោះដុំបន្លែនាគមាស។ បន្លែកញ្ឆែត ត្រកួនដែលយកពីទីនេះលក់បោះដុំក្នុង១គីឡូចន្លោះពី១៥០០រៀលទៅ៣ពាន់រៀល។

របរចាក់បង្គាអ្នកភូមិចង្ហោនខេត្តកំពត

នេះគឺជាក្មេងៗ និងភ្ញៀវទេសចរកំពុងដើរចាក់បង្គានៅភូមិមួយនៅជាប់សមុទ្រខេត្តកំពត។ នៅរាល់ពេលល្ងាចទឹកសមុទ្រនាចប្រជាពលរដ្ឋ ពិសេសក្មេងៗដែលរស់នៅភូមិចង្ហោន ស្រុកទឹកឈូ ខេត្តកំពតដែលមានចម្ងាយពីក្រុងកំពតប្រមាណជា២០គីឡូម៉ែត្រចាប់ផ្ដើមចេញរកចាក់បង្គាធ្វើម្ហូប និងលក់ឲ្យភ្ញៀវទេសចរដែលមកកម្សាន្តនៅរមណីយដ្ឋាននៅក្នុងភូមិរបស់ខ្លួន។

បឹងយក្សលោមខេត្តរតនៈគិរី

ភ្ញៀវទេសចរក្នុងស្រុកម្នាក់កំពុងលោតទឹកលេងនៅបឹងយក្សលោម ដែលជារមណីយដ្ឋានដ៏ល្បីមួយនៅប្រចាំខេត្តរតនៈគិរី។ បឹងយក្សលោមគឺជារមណីយដ្ឋានបែបធម្មជាតិមួយល្បីប្រចាំក្រុងបានលុង ខេត្តរតនៈគិរី ភាគឦសានក្នុងនៃប្រទេសកម្ពុជា។ បឹងកើតចេញពីបន្ទុះភ្នំភ្លើងមួយនេះមានបរិមាត្រ ២ ៦១២ម៉ែត្រ ដែលមានអង្កត់ផ្ចិត ៨០០ម៉ែត្រ និងជម្រៅ ៥០ម៉ែត្រ៕

អត្ថបទ៖ លន ហ្សាឌីណា