ភ្ញាក់ផ្អើល ពេល Van Persie បង្ហើបថាតើ នរណាជាអ្នកចាត់ការល្អបំផុតលើលោក

2018-01-24 12:13:45
ចំនួនមតិ 0 | ចំនួនចែករំលែក 0

ចន្លោះមិនឃើញ

បើទោះជាធ្លាប់ឈ្នះពាន Premier League ជាមួយ លោក Alex Ferguson នៅក្លឹប Manchester United ក៏ដោយ ខ្សែប្រយុទ្ធ Robin van Persie ក្នុងថ្ងៃនេះបាននិយាយថា លោក Arsene Wenger គឺជាអ្នកចាត់ការល្អបំផុតលើលោក។

ខ្សែប្រយុទ្ធហុល្លង់ចាស់វស្សារូបនេះ បាននិយាយថា៖ "លោក Arsene Wenger គឺជាអ្នកចាត់ការល្អបំផុតលើលោក។ មកពីអ៊ីចឹងហើយ បានជាខ្ញុំចង់ឲ្យគាត់ជោគជ័យក្នុងការដឹកនាំ Arsenal"។

Van Persie បានបន្ត៖ "ខ្ញុំជំពាក់គុណគាត់ច្រើនណាស់។ គាត់គឺជាបុគ្គលមួយដ៏សំខាន់ដែលជួយខ្ញុំឲ្យអភិវឌ្ឍខ្លួនក្នុងនាមជាកីឡាករ និងក្នុងនាមជាមនុស្ស។ ខ្ញុំតែងតែចងចាំមិនភ្លេច គ្រប់វិនាទីដែលខ្ញុំធ្លាប់ធ្វើការ ហ្វឹកហាត់ និងលេងឲ្យគាត់"។

ខ្សែប្រយុទ្ធ Van Persie ធ្លាប់លេងឲ្យ Arsenal ក្រោមការចាត់ការរបស់លោក Wenger ពីឆ្នាំ ២០០៤ ដល់ឆ្នាំ ២០១២ និងស៊ុតបាន ១៣២គ្រាប់ឲ្យក្លឹប ប៉ុន្តែឈ្នះបានតែពាន ២ប៉ុណ្ណោះក្នុងអំឡុងពេលនោះ (FA Cup ២០០៤/២០០៥ និង Community Shield ២០០៤) ។

ទោះជាយ៉ាងណា កាលពីពាក់កណ្ដាលឆ្នាំ ២០១២ កីឡាករហុល្លង់រូបនេះ បានចាកចេញទៅចូលរួមជាមួយក្លឹបបិសាចក្រហមរួចក៏បានឈ្នះពាន Premier League នៅទីនោះ នៅឆ្នាំ ២០១៣៕

ប្រភព៖ Metro អត្ថបទ៖ សេរី មង្គល