សេវាកង់ឌុប ធ្វើការតែមួយព្រឹក ចំណូលចង់ច្រើនជាងអ្នកខ្លះធ្វើការពេញមួយថ្ងៃ

2018-02-06 08:42:34
ចំនួនមតិ 0 | ចំនួនចែករំលែក 0

ចន្លោះមិនឃើញ

នាព្រលឹមស្រាងៗនៅផ្សារឈូក មានអ្នកខ្លះលក់បន្លែ និងអ្នកខ្លះទៀតមកទិញទំនិញផ្សេងៗសម្រាប់យកទៅលក់បន្តនៅតាមភូមិ។ ផ្សារនេះមាន ទីតាំងនៅជាប់នឹងផ្លូវជាតិលេខ៣ ក្នុងស្រុកឈូក ខេត្តកំពត។ ដោយសារមានសកម្មភាពលក់ដូរមមាញឹកបែបនេះហើយដែលតម្រូវឲ្យមានសេវាដឹកញ្ជូនពីស្តង់លក់ឥវ៉ាន់ទៅកាន់ចំណតរថយន្ត និងរ៉ឺម៉កក៏ច្រើនដែរ។

(បុរសរត់កង់ឌុបម្នាក់កំពុងដឹកឪឡឹកម៉ូយរបស់គាត់ទៅកាន់ចំណតរ៉ឺមក ដែលមានចម្ងាយប្រហែល១០០ម៉ែត្រកន្លែងលក់ឪឡឹក)

សេវាកង់ឌុបនៅក្នុងផ្សារនេះកំពុងពេញនិយមនៅឡើយ ហើយមានអ្នកប្របករបរនេះមិនតិចជាង២០នាក់នោះដែរ។ សេវាកង់ឌុបទទួលដឹកជញ្ជូនឥវ៉ាន់ពីកន្លែងស្តង់ឥវ៉ាន់ ឬកន្លែងលក់បន្លែឬផ្លែឈើ ចំណែកឯអ្នកទិញបានបន្តដើរទិញឥវ៉ាន់ផ្សេងទៀត និង ទុកឥវ៉ាន់ដែលខ្លួនបានទិញរួចហើយឲ្យម្ចាស់កង់ឌុបជាអ្នកជញ្ជូនទៅកាន់ចំណតរថយន្ត ឬរ៉ឺម៉ក។

កំពុងតែអូសកង់ដែលផ្ទុកពេញដោយឥវ៉ាន់នៅរានកង់ខាងក្រោយ លោក លឹម នី ដែលប្រកបរបរនេះជាង១៥ឆ្នាំមកហើយនោះឲ្យដឹងថា ក្នុងមួយព្រឹកៗលោក អាចរកចំណូលបានមិនទៀងទាត់នោះទេ ដោយថាអាស្រ័យមានម៉ូយតិចឬច្រើន តែថាជាមធ្យមប្រហាក់ប្រហែលនឹង៣ម៉ឺនរៀល។

លោកឲ្យដឹងថាៈ « ចំណូលមិនទៀងទាត់ទេ ថ្ងៃខ្លះបាន៣ម៉ឺន ថ្ងៃខ្លះបាន២ម៉ឺន ១ម៉ឺនជាង...ដោយសារម៉ូយគេអត់មកអីចឹង»។

លោករៀបរាប់បន្តថាពេលមិនសូវមានម៉ូយលោកអូសកង់ដើរពីស្តង់លក់ឥវ៉ាន់មួយកន្លែងទៅមួយទៀត ដោយសង្ឈឹមថានឹងអាចមានអ្នកហៅដឹកទំនិញ។ សម្រាប់ការដឹកជញ្ជូនពីស្តង់លក់ឥវ៉ាន់ទៅកាន់ចំណតរថយន្ត ឬរ៉ឺម៉ក់ លោកថាបានថ្លៃឈ្នួលពី១ ០០០រៀល ទៅ៣ ០០០រៀល តាមសណ្តានចិត្តរបស់អតិថិជន។

លោកបន្ថែមថាៈ «យើងមិនមែនចាំតែម៉ូយប្រចាំរបស់យើងទេ យើងដើរទៅបើគេឃើញ គេហៅទៅ...អ្នកខ្លះគេអាណិតយើងគេឲ្យ២០០០រៀល ៣០០០រៀល តែអ្នកខ្លះវិញឥវ៉ាន់ឡើងពេញម៉ាកង់គេដឹងតែឲ្យ១០០០រៀល»។

ទោះបីចំណូលនេះ មិនសូវជាច្រើនសម្រាប់រូបលោក ក៏ដោយ ក៏លោក លឹម នី ថា ការងារនេះបាននៅជិតផ្ទះ ជិតប្រពន្ធកូនមិនបាច់ចំណាកស្រុក និងម្យ៉ាងថាត្រូវការចំណាយពេលតែមួយព្រឹកតែប៉ុណ្ណោះ។

ប្រហាក់ប្រហែលគ្នានឹងលោក លឹម នី ដែរអ្នកប្រកបរបរកង់ឌុបដទៃទៀតលើកឡើងថាការងារនេះបាននៅជិតផ្ទះ និងអាចបានចំណូលសម្រាប់ចំណាយផ្សេងប្រចាំគ្រួសារ និងមានឱកាសធ្វើការផ្សេងទៀតបាន។ ដោយហេតុផលទាំងនេះហើយទើបអ្នកទាំងនោះនៅបន្តការងារកង់ឌុបននេះដោយមិនរំពឹងថានឹងបោះបង់នោះទេ៕

អត្ថបទដោយ៖ គីម សាយ