តម្បាញកន្ត្រកធាងត្នោត ជាមុខរបរដូនតា របស់អ្នកភូមិអង្គតានូ ស្រុកត្រាំកក់ ខេត្តតាកែវ

2018-02-20 02:42:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្ងៃនេះក្រុមការងារផ្លូវទៅស្រុកវគ្គ២ នឹងបង្ហាញអំពីជីវិតប្រចាំថ្ងៃ របស់អ្នកភូមិអង្គតានូ ឃុំលាយបូរ ស្រុកត្រាំកក់ ខេត្តតាកែវ ដែលបានរកចំណូលតាមរយៈតម្បាញកន្ត្រកធាងត្នោត។ ចង់ដឹងពីរបៀបធ្វើយ៉ាងណានោះ សូមទស្សនារូបភាព និងការរៀបរាប់ត្រួសៗ នៅខាងក្រោមនេះ៖

1. អ្នកស្រី មុំ សារ៉េម វ័យ ៥០ឆ្នាំ គឺជាអ្នកត្បាញកន្ត្រកធាងត្នោតម្នាក់ ក្នុងចំណោមអ្នកត្បាញជាច្រើននាក់ នៅភូមិអង្គតានូ ឃុំលាយបូរ ស្រុកត្រាំកក់ ខេត្តតាកែវ។ ក្រៅពីរបរធ្វើស្រែ អ្នកស្រីត្បាញកន្ត្រកធាងត្នោតលក់ ជាង៣០ឆ្នាំមកហើយ។

2. ប្ដីរបស់អ្នកស្រី មុំ សារ៉េម កំពុងឡើងកាប់ធាងត្នោត យកទៅត្បាញជាកន្ត្រក។ ដើមត្នោតទាំងនោះ មិនមែនសុទ្ធតែជារបស់អ្នកស្រីនោះទេ តែដើម្បីបាន ធាងត្នោត ប្ដីអ្នកស្រី សារ៉េម ត្រូវជួយឡើងកាប់ស្លឹកត្នោតឱ្យម្ចាស់ត្នោត ដើម្បីយកធាង។

3. ធាងត្នោតដែលយកមកដល់ផ្ទះ ត្រូវបានពុស ច្រៀក ជាចម្រៀកតូចៗ ដោយយកទាំងផ្នែកខ្នង និងពោះ។ ដើម្បីត្បាញបានកន្ត្រកមួយ គេត្រូវប្រើធាងត្នោតយ៉ាងតិចពី ៧ ទៅ ១០ធាង។ នៅក្នុងរូបនេះ ប្តីអ្នកស្រី មុំ សារ៉េម កំពុងពុសច្រៀកធាងត្នោត ដែលគាត់កាប់ស្លឹកចេញរួចរាល់អស់ហើយ។

4. ចម្រៀកធាងត្នោត ដែលបិតស្អាតហើយ ត្រូវយកទៅហាលថ្ងៃឱ្យស្រពាប់ មុននឹងត្បាញជាកន្ត្រក។ នៅក្នុងរូបនេះ អ្នកស្រី មុំ សារ៉េម កំពុងបិតបន្ទោះធាងត្នោតក្រោមដើមឈើ ចំហៀងផ្ទះអ្នកស្រី។

5. ការត្បាញកន្ត្រកធាងត្នោតរបស់អ្នក ស្រី មុំ សារ៉េម ក៏ដូចជាអ្នកភូមិអង្គតានូ ដែរ ច្រើនធ្វើឡើងចន្លោះពីខែកុម្ភៈ ដល់ខែ ឧសភា។ ក្នុងមួយថ្ងៃអ្នកស្រីអាចត្បាញកន្ត្រកបានពី ១០ទៅ ២០កន្ត្រក ហើយ ក្នុងមួយខែ អ្នកស្រីអាចរកប្រាក់ចំណូលពីការលក់កន្ត្រកនេះ ពី២០ម៉ឺន ទៅ ៥០ម៉ឺនរៀល។

សូមចុចអាន៖

អត្ថបទ៖ ក្រុមការងារផ្លូវទៅស្រុក