Xperia XZ2 និង XZ2 Compact មានចំណុចមួយ លើសគេ

2018-03-02 02:11:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្របពេលដែលក្រុមហ៊ុនដទៃទៀតខិតខំធ្វើឲ្យស្មាតហ្វូនរបស់ខ្លួនមានកម្រាស់ស្ដើង ក្រុមហ៊ុន Sony បែរជាផលិតស្មាតហ្វូនឲ្យមានកម្រាស់ក្រាស់ជាងមុន តាមរយៈការឌីហ្សាញថ្មីឈ្មោះថា “Ambient Flow”។

Xperia XZ2 និង XZ2 Compact ដែល Sony បានបង្ហាញចេញក្នុងកម្មវិធី MWC ឆ្នាំ ២០១៨ ជាស្មាតហ្វូនដែលមានកម្រាស់ក្រាស់ជាងគេ បើធៀបនឹងស្មាតហ្វូនកំពូលៗដទៃប្រចាំឆ្នាំ ២០១៨ នេះ។ ជាក់ស្ដែង XZ2 មានកម្រាស់ដល់ ១១,១ ម.ម និង XZ2 Compact មានកម្រាស់ ១២,១ ម.ម។

Xperia XZ2

Galaxy S9+ ដែល Samsung ទើបប្រកាសចេញមានកម្រាស់ត្រឹម ៨,៥ ម.ម Galaxy Note8 មានកម្រាស់ ៨,៦ ម.ម និង iPhone X មានកម្រាស់ ៧,៧ ម.ម។ បើធៀបនឹងស្មាតហ្វូន Sony ដែលប្រើការឌីហ្សាញចាស់ដូចជា Xperia XZ Premium មានកម្រាស់ត្រឹមតែ ៧,៩ ម.ម ប៉ុណ្ណោះ។

Xperia XZ2 Compact

កម្រាស់ដ៏ក្រាស់របស់ XZ2 ទាំងពីរស៊េរីអាចមកពីទំហំថ្មធំ ៣១៨០ mAh និង ២៨៧០ mAh ប៉ុន្តែទំហំថ្មប៉ុណ្ណេះគឺធម្មតាសម្រាប់ស្មាតហ្វូនដទៃ ដូចជា Galaxy S9+ មានកម្រាស់ ៨,៥ ម.ម តែមានថ្មទំហំដល់ ៣៥០០ mAh។

Xperia XZ Premium

តំណាងក្រុមហ៊ុន Sony បានឆ្លើយតបរឿងកម្រាស់ក្រាស់នេះថា ៖ "យើងមិនអាចនិយាយពីមូលហេតុចំពោះកម្រាស់របស់ស្មាតហ្វូនទាំងពីរនេះទេ។ យ៉ាងណាក្ដីពួកវាត្រូវបានឌីហ្សាញឡើងក្នុងគោលបំណងបង្កើតនូវបទពិសោធន៍អស្ចារ្យសម្រាប់អ្នកប្រើ Xperia ដែលផ្ដោតលើដំណើរការ ការចាប់យករូបភាព និងបច្ចេកវិទ្យានៃការបង្ហាញ។ ចំណុចពិសេសទាំងនេះអាចដំណើរការទៅបានជាមួយនឹងការឌីហ្សាញ Ambient Flow ដែលធ្វើឲ្យស្មាតហ្វូនស្រួលកាន់ និងស្រួលប្រើ”៕

ប្រភព៖ PhoneArena ប្រែសម្រួល៖ សុខហេង