ស្ទើរគ្មានគែមអេក្រង់ ហើយមានកាមេរ៉ា Selfie បង្កប់យ៉ាងពិសេស

2018-03-03 07:33:27
ចំនួនមតិ 0 | ចំនួនចែករំលែក 0

ចន្លោះមិនឃើញ

Vivo បានក្លាយជាក្រុមហ៊ុនដែលមានបច្ចេកវិទ្យាឈានមុខគេមួយនាពេលបច្ចុប្បន្ន ក្រោយពីបានបង្ហាញចេញស្មាតហ្វូនដែលមានទ្រនាប់ស្កេនម្រាមដៃបង្កប់ក្រោមផ្ទៃអេក្រង់ កាលពីដើមខែមករាកន្លងទៅ។

នៅក្នុងកម្មវិធី MWC ឆ្នាំ ២០១៨ Vivo ក៏បានបង្ហាញចេញផលិតផលថ្មីរបស់ខ្លួន ដែលទទួលបានការចាប់អារម្មណ៍ខ្លាំងបំផុត។ Vivo បានដាក់បង្ហាញនូវ Concept នៃស្មាតហ្វូនម៉ូដែល Apex FullView ដែលមានអេក្រង់លាតសន្ធឹងពេញផ្នែកខាងមុខនៃទូរសព្ទ។ ផ្នែកខាងមុខនេះមិនមានរន្ធបញ្ចេញសំឡេង និងកាមេរ៉ាសម្រាប់ Selfie នោះទេ។

Vivo បានបង្កប់កាមេរ៉ាសម្រាប់ Selfie នៅផ្នែកខាងក្នុងនៃតួខ្លួនស្មាតហ្វូន ដែលកាមេរ៉ានេះនឹងលានចេញមកដោយខ្លួនឯង នៅពេលដំណើរការការថតរូប Selfie។ ក្រុមហ៊ុននេះនិយាយថានៅផ្នែកខាងមុខនៃស្មាតហ្វូនមានផ្ទៃអេក្រង់គ្របដណ្ដប់ដល់ ៩៨% ដោយមានគែមស្ដើងបំផុត។

Apex FullView ក៏មានបំពាក់នូវទ្រនាប់ស្កេនម្រាមដៃដែលបង្កប់ក្រោមផ្ទៃអេក្រង់។ វាមិនមានរន្ធបញ្ចេញសំឡេងសម្រាប់ស្ដាប់ពេលនិយាយទូរសព្ទ ប៉ុន្តែវាអាចបញ្ចេញសំឡេងបានតាមរយៈបច្ចេកវិទ្យា Bone Conduction ដែលអាចបញ្ជូនសំឡេងពីស្មាតហ្វូនទៅដល់ត្រចៀកមនុស្សតែម្ដង។

បញ្ហាចម្បងនោះគឺនៅត្រង់ថាស្មាតហ្វូននេះនៅជាប្រភេទ Concept នៅឡើយ ដែលមានន័យថានៅមានចំណុចមួយចំនួនទៀតដែលក្រុមហ៊ុនត្រូវសិក្សាបន្ថែម ដើម្បីអាចផលិតវាបញ្ចេញលក់លើទីផ្សារបាន៕