កប់ក្ដោងបាត់! សាច់អាំង ពងមាន់អាំង ប្រហិតឆ្ងាញ់ ៥កន្លែងនេះ អស់១ម៉ឺនរៀលចង់ប្រេះឡេវ

2018-03-15 08:00:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្ងៃនេះ Sabay សូមនាំប្រិយមិត្តទៅស្គាល់កន្លែងញ៉ាំអីឆ្ងាញ់ៗ នៅតាមផ្លូវចំនួន ៥កន្លែង ទោះបីមិនមែនអាហារក្នុងហាងទំនើបមែនតែរសជាតិឆ្ងាញ់មិនណយទេ មិនត្រឹមប៉ុណ្ណោះចំណាយម្នាក់អស់តែ១ម៉ឺនរៀល ហូបតឹងពោះ អត់ដឹងឆ្អែតផង។ ចង់ដឹងកន្លែងណា តោះមកតាមដានទាំងអស់គ្នា៖

១. បណ្ដុំអាហារឆ្ងាញ់ៗតាមចំហៀងសួនវត្តបុទមវតី

កន្លែងលក់អាហារឆ្ងាញ់ៗដំបូងនេះ គឺជាតំបន់យុវវ័យ ដែលសំបូរលក់អាហារសឹងគ្រប់ប្រភេទដូចជា៖ សាច់អាំង ពងមាន់អាំង ប្រហិតស្ងោដោតចង្កាក់ បាយឆា មីឆា គុយទាវ គ្រឿងសមុទ្រ បបរមាន់។ល។ អ្នកលក់ប្រហិតគ្រប់មុខមួយរូបនៅទីនោះប្រាប់ Sabay ថាបើនិយាយពីអាហារឆ្ងាញ់ៗវិញមានគ្រប់មុខ មិនចាញ់ប៊ូហ្វេក្នុងហាងប៉ុន្មានឡើយ។ ជាក់ស្ដែងដូចជារទេះលក់ប្រហិតនេះ អ្នកទៅញ៉ាំអាចដើរចាប់ដោយខ្លួនឯងតាមការពេញចិត្ត ហើយយកមកចម្អិនយ៉ាងច្រើនអស់ត្រឹម ១ម៉ឺនរៀលញ៉ាំមួយឆ្អែត។

២. ត្រើយម្ខាងនៃតំបន់ជ្រោយចង្វារ ក្បែរសណ្ឋាគារសុខា

ជិះមកតាមចំហៀងផ្លូវម្ខាង មិនជាប់មាត់ទន្លេ លោកអ្នកប្រាកដជាបានទទួលក្លិនឈ្ងុញចេញពីកន្លែងលក់អាហារ ជាច្រើនមុខ ដូចជា បាញ់ឆែវ សង្វាក់បាត់ដំបង សាច់ក្រកអាំង សាច់គោអាំង និងពងមាន់អាំងជាដើម។ អ្នកលក់កំពុងចម្អិនអាហារ បានប្រាប់ Sabay ថា នៅមួយជួរនេះ មានលក់អាហារឆ្ងាញ់ដូចៗគ្នា ជាពិសេសអាហារល្បីជាងគេ គឺបាញ់ឆេវ ញ៉ាំអស់តែ ៣ ៥០០រៀល ចំណេញបាយល្ងាចមួយពេល។ ៣. នៅក្នុងពហុកីឡដ្ឋានជាតិអូឡាំពិក

ប្រិយមិត្តដែលឧស្សាហ៍ទៅហាត់ប្រាណនៅស្តាតអូឡាំពិក ប្រាកដជាដឹងហើយថា នៅទីនោះសម្បូរអាហារឆ្ងាញ់ៗមិនខ្វះហូបទេ។ គ្រាន់តែដល់ទីនោះភ្លាមចំហាយក្លិនអាហារជាច្រើនជះមកប៉ះនឹងច្រមុះតែម្ដងដូចជា ប្រហិតចៀន សាច់គោអាំង បុកល្ហុង បាយឆា មីឆា ដាក់លក់តម្រៀបហូរហៀ ចូលកន្លែងណាក៏ឆ្ងាញ់ ហើយតម្លៃប្រហាក់ប្រហែលគ្នា។

៤. ជង្រុកអាហារឆ្ងាញ់ៗនៅផ្សារធំថ្មី

អាហារឆ្ងាញ់ៗជាច្រើនមុខ លក់ហូរហែរនៅផ្សារធំថ្មីឲ្យតែបានទៅម្តងៗ ចង់វិលមុខដោយសារសម្បូរអីញ៉ាំពេកមិនដឹងញ៉ាំអីទុកអី។ អាហារឆ្ងាញ់ជាច្រើនមុខដូចជា មឹកអាំង បង្កងអាំង ភ្លៅមាន់អាំង កោះមាន់អាំង មានតម្លៃចាប់ពី១ម៉ឺនរៀលឡើងទៅ។ ក្រៅពីនោះមានដូចជា សាច់គោអាំងនំប៉័ង សាច់ជន្លួញ មួយចង្កាក់តែ ២ ០០០រៀលទេ និងកំពឹសចៀន បង្គាចៀនជាមួយម្សៅបំពងមួយបន្ទះចាប់ពី ៣ ០០០រៀលឡើងទៅ។ ដូច្នេះបើសិនរកនឹកអីញ៉ាំមិនឃើញទេ ទៅផ្សារធំថ្មីទៅមិនខកបំណងទេ។

៥. នៅតាមបណ្ដោយសួនច្បារវិមានឯករាជ្យជិតក្រសួងបរិស្ថានចាស់

មិនចាញ់ទីតាំងទាំង៤ ខាងលើប៉ុន្មានឡើយ នៅទីនេះក៏សម្បូរអាហារឆ្ងាញ់ៗច្រើនណាស់ដែរ មិនថាថ្ងៃចុងសប្ដាហ៍ ឫថ្ងៃណាទេយុវវ័យសម្រុកទៅរកអីញ៉ាំពេញតែម្ដង សឹងតែរកកន្លែងចតម៉ូតូគ្មាន។ រទេះជាច្រើនដាក់តម្រៀបលក់ជាជួរយ៉ាងវែងអន្លាយ សុទ្ធតែអាហារគួរឱ្យចង់ញ៉ាំទាំងអស់ដូចជា ប្រហិតស្ងោ ប្រហិតចៀន បបរមាន់ បាយឆាមីឆា បុកល្ហុងល។ ចំណែកឯតម្លៃវិញក៏មិនខុសគ្នាប៉ុន្មានឡើយ មិនចាំបាច់ចំណាយអស់រាប់ម៉ឺនក៏អាចញ៉ាំបានមួយឆ្អែត។

អត្ថបទ៖ ស៊ិន សាវ៉េត