មកលេងទឹកដីកំណើតលើកដំបូង គឹម លីហ្សា ពោលពាក្យពិបាកត្រលប់ចូលសិល្បៈវិញ

2018-03-16 04:02:50
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតតារាសម្ដែងអ្នកនាង គឹម លីហ្សា និយាយថា អ្នកនាងនៅតែស្រលាញ់ និងចូលចិត្តអាជីពសិល្បៈ ព្រោះអ្វីៗដែលមានសព្វថ្ងៃ គឺបានមកពីអាជីពមួយនេះឯង។ យ៉ាងណាអ្នកនាងបញ្ជាក់ថា ការឱ្យត្រលប់មកសម្ដែងស៊ុបឡើងវិញ គឺជារឿងមួយមិនអាចទៅរួចនាពេលបច្ចុប្បន្ន។

អ្នកនាង គឹម លីហ្សា បានលើកឡើងដូច្នេះ ខណៈអ្នកនាងបានត្រលប់មកលេងស្រុកកំណើតលើកដំបូង បន្ទាប់ពីរៀបអាពាហ៍ពិពាហ៍ ជាមួយអាណិកជនខ្មែរ-អូស្ត្រាលី កាលពីឆ្នាំ២០១៤ កន្លងទៅ។ រយៈពេលជិត ៤ឆ្នាំ នៃការបោះបង់ចោលសិល្បៈ ទៅរស់នៅជាមួយស្វាមីនៅប្រទេសអូស្រ្តាលី អតីតតារាសម្ដែងរូបនេះ មើលឃើញពីភាពរីកចម្រើនខ្លាំងនៃវិស័យសិល្បៈ ដែលខុសប្លែកពីជំនាន់អ្នកនាងនៅប្រលូក។

គឹម លីហ្សា ស្វាមី និងកូនប្រុស

អតីតតារាសម្ដែងរូបនេះ បន្តថា ប្រសិនបើមានឱកាស អ្នកនាងអាចនឹងត្រលប់មកសម្ដែងភាពយន្តណាមួយ ជូនទស្សនិកជនខ្មែរ។ ក៏ប៉ុន្តែកាលៈទេសៈបច្ចុប្បន្នអ្នកនាងពិតជាដកឃ្លាមិនរួច ដោយកំពុងមើលថែទាំកូនប្រុស។ មួយវិញទៀតស្វាមីរបស់អ្នកនាង ចង់បានបុត្រមួយថែមទៀតនាពេលឆាប់ៗ ដែលជាកត្តាមួយ ធ្វើឱ្យអ្នកនាងគ្មានពេលសម្រាប់ការវិលត្រលប់មកកាន់អាជីពសិល្បៈវិញ។

អ្នកម្តាយកូនមួយរូបនេះ បានបង្ហាញក្ដីសប្បាយរីករាយជាខ្លាំង នៅពេលដឹងថាទស្សនិកជនខ្មែរ ជាពិសេសអ្នកដែលតែងតែគាំទ្រអ្នកនាង នាពេលកន្លងទៅ នៅតែបន្តគាំទ្រ និងចង់ឃើញស្នាដៃអ្នកនាងបន្តទៀតក្នុងវិស័យភាពយន្ត៕

អត្ថបទៈ ចរិយា