ម៉ៅ ហាជី បង្ហាញអារម្មណ៍ពេលចម្រៀងចេញច្រើនបទ តែមិនទាន់ផ្ទុះ!

2018-03-20 06:38:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីចូលផលិតកម្មថោន ម៉ៅ ហាជី មិនទាន់មានបទចម្រៀងណាមួយដែលទាញទាក់អ្នកគាំទ្របានច្រើនសន្ធឹកសន្ធាប់នោះទេ។ ទោះជាបែបនេះក្ដីតារាសំឡេងធ្ងន់ ម៉ៅ ហាជី នៅតែមានក្តីសង្ឃឹមថាខ្លួននឹងទទួលបានការគាំទ្រខ្លាំងថ្ងៃណាមួយ។

បេក្ខភាពប្រឡង Cambodian Idol រដូវកាលទី ១ រូបសង្ហាម្នាក់នេះបានកាត់ព្យុះភ្លៀងយ៉ាងខ្លាំងមុនពេលបានចូលផលិតកម្មថោន។ ពេលមានទ្រនំរឹងមាំហើយ ហាជី នៅមិនទាន់សម្រេចបំណងខ្លួននៅឡើយនោះទេ ព្រោះបទចម្រៀងរបស់លោកមិនទាន់ផ្ទុះការគាំទ្រណាមួយគួរឲ្យកត់សម្គាល់ឡើយ។

លោក ម៉ៅ ហាជី បន្តថា កន្លងមកនេះលោកបានចេញបទចម្រៀងជាច្រើននៅក្នុងផលិតកម្មថោន ទាំងបទសម័យ និងការច្រៀងCover ពីចម្រៀងមរតកដើម។ លោកថា បទដែលចេញទៅមានទទួលបានការគាំទ្រដែរតែមិនទាន់ដល់កំពូលនៅឡើយ។

ម្ចាស់បទ "ពេលខូចចិត្ដនឹកប្រពន្ធជាងគេ" បន្ថែមថា ៖«ខ្ញុំចេញចម្រៀងច្រើនបទហើយ មួយរយៈហ្នឹង តែមិនទាន់ត្រូវប៉ាន់បទណាមួយឲ្យខ្លាំងនោះទេ។ បទដែលចេញទៅបងប្អូនគាត់ស្ដាប់ ប៉ុន្តែបើឲ្យល្បីខ្លាំងមិនទាន់ឃើញបទណានោះទេ។ ប៉ុន្តែបងប្អូនភាគច្រើនដែលស្គាល់ ខ្ញុំច្រើន គឺចម្រៀងខ្ញុំ Coverបទ "ដងស្ទឹងសង្កែ"។»

បើទោះជាមិនទាន់ទទួលបានផ្លែផ្កាដូចចិត្តស្រម៉ៃ តែលោកម៉ៅហាជីមិនស្រុតស្រកការតាំងចិត្តឡើយ គឺលោកមានតែខិតខំបង្កើនសមត្ថភាពប៉ុណ្ណោះ៕

អត្ថបទ៖ ច្រឹក ស្រីអូន