ឈឺចាប់ម្ដងហើយ! កែវ ពេជ្រពិសី នៅមិនរាងចាលស្នេហ៍ប្រុសក្រៅស្រុកទៀត

2018-03-20 08:26:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ទោះបីជាធ្លាប់ឈឺចាប់រឿងស្នេហាបែកបាក់ជាមួយអាណិកជនខ្មែរអូស្ត្រាលីម្ដងរួចទៅហើយក្ដី តែអ្នកមេម៉ាយ កែវ ពេជ្រពិសី មិនខ្លាចរអា ឬ រាងចាលស្នេហ៍ប្រុសក្រៅប្រទេសឡើយ។

ជាក់ស្ដែងអំឡុងពេលនេះមានបុរសអ្នកមានទ្រព្យស្ដុកស្ដម្ភទាំងក្នុង និងក្រៅប្រទេសកំពុងតែតាមសុំស្នេហ៍ពីអ្នកមេម៉ាយរូបនេះ តែនាងមិនទាន់ឆ្លើយយល់ព្រមនៅឡើយទេ ព្រោះមិនចង់ខកស្នេហ៍ជាលើកទី២។ ដូច្នេះហើយទើបចង់ទុកពេលវេលាមើលចិត្តថ្លើមគ្នាឲ្យបានយូរបន្តិចសិនមុនសម្រេចចិត្តជ្រើសរើសយកអ្នកណាម្នាក់មករួមដំណើរជីវិតជាមួយគ្នា។

កែវ ពេជ្រពិសី បាននិយាយថា៖" ក្នុងចំណោមបុរសទាំងក្នុង និងក្រៅប្រទេសហ្នឹង ខ្ញុំមិនគិតថាពួកគាត់ជាអាណិកជនខ្មែររស់នៅក្រៅប្រទេស ឬ បុរសដែលរស់នៅស្រុកខ្មែរនោះទេ អ្វីដែលសំខាន់ឲ្យតែគាត់ស្រឡាញ់គោរពក្រុមគ្រួសាររបស់នាងខ្ញុំ ហើយស្មោះត្រង់ជាមួយខ្ញុំ ពេលហ្នឹងហើយដែលខ្ញុំត្រូវគិតថាគួរជ្រើសរើសយកអ្នកណា"។

គួររម្លឹកថា កែវ ពេជ្រពិសី បានចូលរោងការជាមួយលោក ចន្ថា ស្រី ជាអាណិកជនខ្មែរអូស្ត្រាលីកាលពីឆ្នាំ២០១០ ប៉ុន្តែគួរឲ្យស្ដាយចំណងស្នេហ៍នោះបានមានអាយុត្រឹមតែ ២ សប្ដាហ៍ប៉ុណ្ណោះ ក៏ឈានដល់ការប្រេះឆា និងចែកផ្លូវគ្នាដើរដោយចម្រូងចម្រាស់ ដោយសារម្ដាយក្មេងចោទថា នាង រៀបការជាមួយកូនប្រុសខ្លួនក្នុងគោលបំណងបោកយកលុយរាប់ម៉ឺនដុល្លារ។ រឿងរ៉ាវនេះ ត្រូវបាន កែវ ពេជ្រពិសី ចេញមុខច្រានចោលថាមិនមែនជាការពិតនោះទេ៕