ក្ដៅៗ...លោក ហម ឈរ៉ា និងផលិតកម្មមហាហង្ស ចែកផ្លូវគ្នាពាក់កណ្ដាលទីនៅថ្ងៃនេះ!

2018-04-10 12:36:57
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីចំណាយពេល ធ្វើកិច្ចសហប្រតិបត្តិការរវាងគ្នាអស់មួយរយៈពេលធំ ពេលនេះតារាសម្ដែងជើងចាស់ ហម ឈរ៉ា និងផលិតកម្មមហាហង្ស បានសម្រេចចែកផ្លូវគ្នាហើយ។

លោក ហម ឈរ៉ា បានចុះកុងត្រាជាមួយផលិតកម្មរបស់លោក អ៊ិន សុភិន ៤ឆ្នាំ ដោយអំណាចនៃកិច្ចសន្យានេះ តារាសម្ដែងរៀមច្បងមិនអាចទទួលថតឲ្យផលិតកម្មណាផ្សេងឡើយ។ ប៉ុន្តែកិច្ចសន្យាការងាររវាងភាគីទាំងពីរ បានត្រូវបញ្ចប់គិតត្រឹមថ្ងៃនេះ យ៉ាងតក់ក្រហល់ ពោលគឺបញ្ចប់មុនអាយុកាលនៃកិច្ចសន្យាទៅទៀត ក្រោយធ្វើការជាមួយគ្នាបានប្រមាណជាង១ឆ្នាំ។ នេះបើតាមលោក ឈរ៉ា បញ្ចេញឲ្យដឹង។

ចំពោះមូលហេតុ តារាជើងចាស់រូបនេះ បញ្ជាក់ថា មិនមានបញ្ហាអ្វីដុំកំភួននឹងគ្នាទេ។ លោកថា "តាមពិតអីចេះទេ កុងត្រាបងមានរយៈពេល៤ឆ្នាំ ប៉ុន្តែកន្លងមក មានសិល្បករយើងចេះតែចេញបន្តបន្ទាប់ អីចឹងក្រុមហ៊ុនក៏សម្រេចថាបញ្ចប់កុងត្រាអីចឹងតែម្ដងទៅ"។

លោក ឈរ៉ា បានសង្កត់ធ្ងន់ទៀតថា ត្បិតថាបញ្ចប់កុងត្រាជាមួយគ្នា ត្រូវបានបញ្ចប់ក៏ពិតមែន ប៉ុន្តែលោក នៅតែថតឲ្យផលិតកម្មមហាហង្សជាធម្មតាដដែល គ្រាន់តែមិនមានកុងត្រាថតផ្ដាច់មុខដូចមុន។ ជាក់ស្ដែង លោកក៏ទើបនឹងកុងត្រាថតរឿងថ្មីឲ្យមហាហង្សរឿង "កាំបិតមុខ២" ថ្មីៗនេះដែរ រួមទាំងការងារនានាទៀតនាពេលខាងមុខ។

រូបភាព៖ ហ្វេសប៊ុកលោក ហម ឈរ៉ា

ជុំវិញការបញ្ចប់កុងត្រារវាងគ្នានាថ្ងៃនេះ ភាគីផលិតកម្មមហាហង្សដែលមានលោក អ៊ិន សុភិន ជាចាងហ្វាង មិនទាន់អាចសុំការអធិប្បាយបានទេនៅព្រលប់នេះ។

ក្រោយរួចផុតពីកិច្ចសន្យាការងារ នៅពេលនេះ តារាប្រុសឈានមុខលើការបំផុសឲ្យប្រើប្រាស់ភាសាខ្មែរទូលំទូលាយលើបណ្ដាញសង្គមរូបនេះ ប្រកាសថា លោកមានសិទ្ធិទូលំទូលាយក្នុងការធ្វើការជាមួយនឹងផលិតកម្មផ្សេងៗ។ ដូច្នេះហើយ ជាមួយគ្នានេះ លោកថា អាចទទួលរាល់ការងារថតសម្ដែងនានាពីផលិតកម្មទាំងអស់ ប្រសិនបើមានតម្រូវការ ទៅតាមការចរចា ឬពិភាក្សាជាក់ស្ដែង៕

អត្ថបទ៖ ទារិកា