ឧកញ៉ា ឃ្លោក ពិតជាដកខ្លួនចេញពីពិភពគុនលែងវិលវិញ

2018-04-12 02:52:58
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតតារាកំប្លែង នាយ ឃ្លោក ពិតជាសម្រេចដើរចេញពីការងារសិល្បៈ លែងមកចាប់ផ្តើមជាថ្មីមែន ទោះជាពេលនេះវិស័យសិល្បៈមានការរីកចម្រើន ទាំងការថតខ្សែភាពយន្តក្តី ដោយលោកចង់ទុកឱកាសដល់ក្មេងជំនាន់ក្រោយ។

តារាកំប្លែងដែលទទួលបានងារជាឧកញ៉ារូបនេះបានសម្រេចចិត្តទៅបើកជំនួញផ្ទាល់ខ្លួនដោយមិននឹកស្រណោះ ដល់ការងារចាស់សោះ។ លោកបានប្រាប់ថា ពេលខ្លះលោកក៏នឹកដល់ការងារចាស់ ជាពិសេសមិត្តរួមការងារដែរ។ ទោះជាឃើញវិស័យសិល្បៈកំពុងមានទីផ្សារ លោកមានការសប្បាយចិត្ត ប៉ុន្តែគ្មានបំណងវិលមកផ្លូវនេះម្ដងទៀតនោះទេ បែបនេះព្រោះតែលោកចង់ទុកឱកាសឲ្យអ្នកសិល្បៈជំនាន់ក្រោយ។

«ពេលសិល្បៈយើងមានការរីកចម្រើនអីចឹង ខ្ញុំសប្បាយចិត្តណាស់ ។ ចំពោះការវិលត្រលប់មកសម្ដែងមកវិញខ្ញុំមិនមានបំណងទេ ព្រោះខ្ញុំចាស់ យើងចេញពីសិល្បៈមកច្រើនឆ្នាំមកបើករបរផ្ទាល់ខ្លួនហើយ ខ្ញុំមិនចង់ចូល ណាមួយទុកឲ្យក្មេងៗចុះ»។

តារាកំប្លែង មានកំណើតមកពីខេត្ត ស្វាយរៀងម្នាក់នេះ មានឈ្មោះដើម ទុំ សារុត ត្រូវបានព្រះមហាក្សត្រនៃព្រះរាជាណាចក្រកម្ពុជាព្រះបាទ នរោត្តម សីហមុនី ត្រាស់បង្គាប់តែងតាំងជាឯកឧត្ដម កាលពីដើមឆ្នាំ ២០១៤ បន្ទាប់ពីតារាកំប្លែងរូបនេះ បានជួយកិច្ចការសង្គមជាច្រើនកន្លងមក ដូចជា សាលារៀន ស្រះទឹក និង ជួយវត្តអារាមជាដើម ។ បន្ទាប់ពីទទួលតំណែងជាឯកឧត្តម នាយ ឃ្លោកក៏ដកខ្លួនពីសិល្បៈ ហើយនៅឆ្នាំ ២០១៥ លោកទទួលបានងារជាឧកញ៉ាមួយបន្ថែមទៀត៕

អត្ថបទ៖ ច្រឹក ស្រីអូន