សូរ្យ អេនណា នាំស្រីស្រស់ប្រុសក្មេង ហោះទៅដណ្ដើមពាននៅកូរ៉េយប់មិញ

2018-04-24 02:22:10
ចំនួនមតិ 0 | ចំនួនចែករំលែក 0

ចន្លោះមិនឃើញ

យប់មិញនេះ កញ្ញា សូរ្យ អេនណា ប្រធានក្រុមម៉ូដែល"តារារះថ្មីកម្ពុជា" បានដឹកនាំកូនក្រុមរបស់ខ្លួនចំនួន២រូបទៅចូលរួមការប្រកួតមួយនៅទីក្រុងសេអ៊ូល ប្រទេសកូរ៉េ ដែលកម្មវិធីគ្រោងធ្វើចាប់ពីថ្ងៃទី២៥ ខែ មេសា រហូតដល់ ថ្ងៃទី៧ ខែ ឧសភា ឆ្នាំ ២០១៨ ដោយនៅក្នុងនោះ មានប្រទេសចំនួន២៦ នៅទ្វីបអាស៊ីចូលរួម។

កញ្ញា ប៉ូ គឹមថេងសុតធីតា លោក ប្រាជ្ញ ឆវ័ន្ដ និង កញ្ញា សូរ្យ អេនណា (រាប់ពីឆ្វេងទៅស្តាំ)

កម្មវិធីប្រកួតខាងលើមានឈ្មោះថា Asia Model Festival 2018 ដែលជាកម្មវិធីប្រកួតការដើរបង្ហាញម៉ូដអន្តរជាតិល្បីឈ្មោះមួយ ហើយនេះគឺជាឆ្នាំទី១៣ ដែលកម្មវិធីបានប្រារព្ធឡើង សម្រាប់ប្រទេសកម្ពុជាវិញទើបតែចូលរួម២លើកតែប៉ុណ្ណោះ។ កាលឆ្នាំ២០១៧ ក្រុមម៉ូដែលខាងលើ បានបញ្ជូនបេក្ខជនរបស់ខ្លួនចំនួន៣រូប មានស្រី២រូប និងប្រុស១រូប គឺ លោក ដូ រីកូ កញ្ញា ផល សុផានីកា និងកញ្ញា នាង វណ្ឌី ដែលកាលណោះ បានទទួលពាន១ គឺពានតំណាងប្រទេសដែលចូលរួម និង ប័ណ្ណសរសើរ១។ ចំណែកនៅឆ្នាំនេះ បានបញ្ជូនតែ២រូបទេ គឺបេក្ខជនឈ្មោះ លោក ប្រាជ្ញ ឆវ័ន្ដ និង បេក្ខនារីកញ្ញា ប៉ូ គឹមថេងសុតធីតា។

តាមការលើកឡើងរបស់ សូរ្យ អេនណា មុនសម្រេចបញ្ជូនស្រីស្រស់ប្រុសស្អាតទាំងពីរទៅចូលរួមប្រកួត គឺមានការជ្រើសរើសពីគណៈកម្មការ "Asia Model Festival” នៅប្រទេសកូរ៉េ មិនមែនធ្វើឡើងស្រេចតែចិត្តឡើយ។ ត្រង់នេះ ប្រធានក្រុមម៉ូដែលរូបនេះពន្យល់ថា ដោយសារតែក្រុមរបស់នាង គឺជាក្រុមម៉ូដែលឧស្សាហ៍ចេញទៅប្រកួតជាលក្ខណៈអន្តរជាតិច្រើនលើក ហើយមានទំនាក់ទំនងល្អជាមួយ agency តាមបណ្ដាប្រទេសទាំងនោះ ដូចនេះ agency ស្គាល់ទុកចិត្តនាង។ នាងថា ក្រុមម៉ូដែលរបស់នាងបានបញ្ជូនតារាម៉ូដែលក្នុងប្រទេសកម្ពុជាជាច្រើនរូប ដើម្បីឲ្យគណៈកម្មការ"Asia Model Festival” នៅប្រទេសកូរ៉េជ្រើសរើស ហើយជាលទ្ធផល គណៈកម្មការជ្រើសរើសតែ២នាក់ប៉ុណ្ណោះ គឺ លោក ប្រាជ្ញ ឆវ័ន្ដ និង កញ្ញា ប៉ូ គឹមថេងសុតធីតា។

តាមបទពិសោធលោក ប្រាជ្ញ ឆវ័ន្ដ មិនធ្លាប់ចូលរួមប្រកួតលក្ខណៈអន្តរជាតិបែបនេះទេ ពោលកន្លងមកតារាម៉ូដែលរូបនេះធ្លាប់ដើរម៉ូដក៏ដូចជាសម្ដែងការងារសិល្បៈតែនៅក្នុងប្រទេសកម្ពុជាប៉ុណ្ណោះ។ ចំណែកកញ្ញា ប៉ូ គឹមថេងសុតធីតា ធ្លាប់បានចេញទៅប្រកួតលក្ខណៈអន្តរជាតិបែបនេះម្ដងកាលពីខែកញ្ញា ឆ្នាំ ២០១៧ នៅប្រទេសចិន ដែលកាលណោះ ស្រីស្អាតរូបនេះ ធ្លាប់បានទទួលចំណាត់ថ្នាក់លេខ៤។

លោក ប្រាជ្ញ ឆវ័ន្ដ និង កញ្ញា ប៉ូ គឹមថេងសុតធីតា

បេក្ខភាពទាំង២ សុទ្ធតែបង្ហាញជំនឿជាក់លើការប្រកួតនេះ ហើយពួកគេបានប្ដេជ្ញាថា នឹងខិតចំឲ្យអស់ពីសមត្ថភាព ដើម្បីដណ្ដើមពានណាមួយពីការប្រកួត មកជូនក្រុមរបស់ខ្លួនក៏ដូចជាប្រទេសជាតិ។ ក្រៅពីការត្រៀមលក្ខណៈសម្បត្តិលើជំនាញដើរម៉ូដ និងទម្រង់សិល្បៈមួយចំនួន អ្នកទាំងពីរក៏បាននាំនៅឈុតសម្លៀកបំពាក់តំណាងជាតិម្នាក់១ឈុតផងដែរ។

អត្ថបទៈ ស៊ុនហួត