ចប់បាត់ Miss Global ប្រេស៊ីល គ្រងមកុដនៅកម្ពុជា ត្រូវបានដកហូតតំណែង

2018-04-25 02:32:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្លែងនៅក្នុងសន្និសីទសារព័ត៌មានកាលពីម្សិលមិញលោក ឌី ពេជ្រ នាយកប្រតិបត្តិ និងជាប្រធានបវរកញ្ញាខ្មែរអាមេរិកបានឲ្យដឹងថា បវរកញ្ញាគ្រងមកុដនៅកម្ពុជា ក្នុងកម្មវិធី Miss Global 2017 កញ្ញា Barbara Vitorelli ជនជាតិប្រេស៊ីល ត្រូវបានគណៈកម្មការ Miss Global International ដកតំណែងចេញហើយ ក្រោយពីរកឃើញភាពមិនប្រក្រតី ក្នុងពេលប្រកួត កាលពីថ្ងៃទី ១៨ ខែ វិច្ឆិកា ឆ្នាំ២០១៧ កន្លងទៅ។

លោក ឌី ពេជ្រ ប្រធានបវរកញ្ញាខ្មែរអាមេរិក

លោក ឌី ពេជ្រ បន្ថែមថា ចំពោះចំណុចមិនប្រក្រតីនៃការដកតំណែងបវរកញ្ញាប្រេស៊ីល ដោយសារតែអ្នកនាងTea Mark ដែលជា CEO Miss Global Internatoinal មានឯកសារគ្រប់គ្រាន់ក្នុងការបញ្ជាក់ថាការប្រឡង Miss Global 2017 មិនសុក្រឹត មិនយុត្តិធម៌ដល់បវរកញ្ញាមកពី ៦០ ប្រទេសផ្សេងទៀត។ អំឡុងពេលនេះតុលាការកំពុងតែស៊ើបអង្កេតលើភាពមិនប្រក្រតីនៃការកិបកេងថវិកាដ៏ច្រើន ចំណែកឯបវរកញ្ញាឯកប្រទេសណាលេខមួយនោះមិនមិនទាន់ដឹងច្បាស់ទេ។

ចំណុចមិនប្រក្រតីមួយចំនួនទៀតទាក់ទង លោក រតនៈ អអឿន ដែលជាអ្នកទទួលខុសត្រូវរួមសម្រាប់ការប្រកួត Miss Global 2017 នៅប្រទេសកម្ពុជា បានកិបកេងលុយរាប់ម៉ឺនដុល្លារចូលហោប៉ៅខ្លួន ដោយមិនយកមកដាក់ចូលក្រុមហ៊ុន និងមិនបានបំពេញតួនាទីត្រឹមត្រូវទៅតាមលក្ខខណ្ឌនៃការប្រកួត Miss Global International នោះទេ។

លោកថា៖"មិនត្រឹមតែមិនបានបំពេញតួនាទីនោះទេ លោក រតនៈ អអឿន ថែមទាំងបានប្រើសិទ្ធិជាអ្នករៀបចំនៅកម្ពុជា ដាក់គណៈកម្មការជាខ្សែមួយចំនួន បណ្ដាលឲ្យពិន្ទុដែលត្រូវប្រកាសឡើងមានភាពមិនប្រក្រតី ហេតុដូច្នេះហើយទើបគណៈកម្មការ Miss Global International សម្រេចដាក់ពាក្យប្ដឹងទៅតុលាការនៅអាមេរិក ដើម្បីទាមទារឲ្យលោក រតនៈ អអឿន សងប្រាក់ដែលកិបកេងមកវិញ និងយុត្តិធម៌សម្រាប់បវរកញ្ញាទាំង៦០ប្រទេស"។

ប្រធានបវរកញ្ញាខ្មែរអាមេរិកដដែលនេះ អះអាងបន្តថា ក្រៅពីទម្លាក់បវរកញ្ញាឯកប្រេស៊ីលចេញ លោក រតនៈ អអឿន ប្រើសិទ្ធិ ជាអ្នករៀបចំកម្មវិធីអញ្ជើញ កញ្ញា Barbara Vitorelli មកកម្ពុជាម្ដងហើយម្ដងទៀតដើម្បីដើររកស្ពនស័រ ទាំងដែលខ្លួនលោកត្រូវបានទម្លាក់ចេញពីតំណែងទៅហើយក្ដី។

បវរកញ្ញា ប្រស៊ីល

ដូច្នេះរាល់រឿងរ៉ាវមួយចំនួនទាក់ទងទង រតនៈ អអឿន នាំបវរកញ្ញាប្រេស៊ីលត្រូវបានទម្លាក់ពីតំណែងមកស្វែងរកស្ពនស័នៅកម្ពុជា ខាងក្រុមហ៊ុន Miss Global International មិនទទួលខុសត្រូវឡើយ ព្រោះពេលនេះ Barbara Vitorelli មិនមែនជាបវរកញ្ញាក្នុងកម្មវិធី Miss Global 2017 ទៀតទេ នេះជាការបញ្ជាក់របស់លោក ឌី ពេជ្រ។

លោក រតនៈ អអឿន

ចំពោះការលើកឡើងខាងលើនេះលោក រតនៈ អអឿន សុំច្រានចោលទាំងស្រុងថា ខ្លួនមិនមែនជាដើមហេតុដែលធ្វើឲ្យការប្រកួត Miss Global 2017 មានភាពមិនប្រក្រតីនោះទេ។ ការជ្រើសរើសឲ្យ Barbara Vitorelli ជាប់ជាបវរកញ្ញាគឺត្រឹមត្រូវហើយ គ្មានករណីណាមួយត្រូវទម្លាក់នាងចេញពីតំណែងឡើយ។

លោកថា៖" អត់ទេអូនបងមិនបានកិបកេងលុយអីទេ ចំណែករឿងទម្លាក់បវរកញ្ញា ប្រេស៊ីល ចេញ គឺអត់មានរឿងហ្នឹងកើតឡើងទេ គាត់នៅតែជាបវរកញ្ញាឯកដដែល"៕