គំនូរមួយផ្ទំាងមានរូបមេដឹកនាំកម្ពុជាសម្ដេចតេជោបង្កប់អត្ថន័យយ៉ាងជ្រៅក្នុងសង្គមកម្ពុជាបច្ចុប្បន្ន

2018-05-01 07:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្នាដៃសិល្បៈគំនូរសហសម័យរបស់សិល្បករខ្មែរល្បីជុំវិញពិភពលោក លោក លាង ស៊ីកន ត្រូវបានដាក់តាំងបង្ហាញទោលជាលើកដំបូងនៅកម្ពុជាក្រោយអាក់ខានតាំងបង្ហាញជិតមួយទសវត្ស។

សម្ភារៈដំឡើង និងផលិតរូបផ្ទាំងរូបភាព បន្ទប់ស្នាក់នៅរបស់សិល្បករ លាង ស៊ីកន និងផ្ទាំងគំនូរតូចធំ ១៨ផ្ទាំង ត្រូវបានយកមកតាំងបង្ហាញចូលមើលសេរីនៅវិចិត្រសាលវិទ្យាស្ថានភាសាបារាំងរយៈពេលមួយខែ ដោយគិតចាប់ពីថ្ងៃទី២៧ មេសា ឆ្នាំ២០១៨។

ក្នុងស្នាដៃទាំង១៨ផ្ទាំងរបស់លោក លាង ស៊ីកន មានគំនូរមួយផ្ទាំងដែលបង្ហាញពីសម័យកាល២រួមបញ្ចូលគ្នា។ ក្នុងផ្ទាំងគំនូរមានរំលេចរូបប្រមុខដឹកនាំរាជរដ្ឋាភិបាលសម្ដេចតេជោ ហ៊ុន សែន ពាក់អាវធំក្រវាត់ក ពាក់វ៉ែនតា មានមេក្រូនៅពីមុខ និងខាងឆ្វេងមានរូបអវតារឆ្លាក់ចេញពីស្បែកមានពាក់គ្រឿងអលង្ការសម័យអង្គរដែលមានរូបរាងដូចគ្រឿងអលង្ការដែលកម្ពុជាទើបទទួលបានពីអង់គ្លេសកាលពីថ្មីៗកន្លងទៅ ដងខ្លួនមានដាប់សញ្ញា wifi ហើយនៅផ្នែកខាងក្រោយមានរូបអគារខ្ពស់ៗ និងហេដ្ឋារចនាសម្ព័ន្ធរបស់ប្រទេសកម្ពុជា ដែលបង្ហាញពីការអភិវឌ្ឍនាសម័យបច្ចុប្បន្ន។

ផ្ទាំងគំនូរ " ចំណងស្ពានព្រះគន្លងអវតារwifi " របស់លោក លាង ស៊ីកន

បើតាមសិល្បករសហសម័យ លោក លាង ស៊ីកន បានបញ្ជាក់ថារូបគំនូរមួយផ្ទាំងនេះមានបង្កប់អត្ថន័យយ៉ាងជ្រាលជ្រៅ រូបនេះមានឈ្មោះថា " ចំណងស្ពានព្រះគន្លងអវតារwifi " រូបនេះបង្ហាញពីសម័យកាល២រួមបញ្ចូលគ្នា ១គឺសម័យកាលមនុស្សដែលជឿលើអាទិទេព មានព្រះពុទ្ធ និងព្រហ្មញ្ញសាសនាដោយមនុស្សយកទស្សនៈរបស់អាទិទេពមកគោរព និងអនុវត្តតាម ២គឺសម័យបច្ចុប្បន្នគឺជាសម័យបច្ចេកវិទ្យាដែលមនុស្សទាំងអស់មិនថាប្រជាពលរដ្ឋធម្មតា ឬមេដឹកនាំ សិក្សាស្រាវជ្រាវ ស្វែងយល់ ទំនាក់ទំនងគ្នាតាមបែបវិទ្យាសាស្ត្រ (ប្រើwifi)។ បើនិយាយជារួមរូបមួយផ្ទាំងនេះបង្ហាញពី វប្បធម៌ សន្តិភាព ការអភិវឌ្ឍ ការគោរពអនុវត្តន៍របស់ប្រទេស ពីរសម័យកាលផ្សេងគ្នា។

ក្រៅពីរូបធំៗសម្ដេចតេជោ និងព្រះអាទិទេព នៅផ្នែកខាងលើនៃរូបមានរូបទេពធីតាបាចផ្កាមានព្រះភក្ត្រដូចសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ផងដែរ។

សិល្បករសហសម័យ លោក លាង ស៊ីកន ក្នុងថ្ងៃសម្ពោធពិពរណ៍

រូបទេពធីតាបាចផ្កាមានព្រះភក្ត្រដូចសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន

សិល្បករល្បីនៅឆាកអន្តរជាតិរូបនេះបន្តថា រូបមួយផ្ទាំងនេះមានអត្ថន័យជ្រាលជ្រៅទាក់ទងនឹងសង្គមខ្មែរបច្ចុប្បន្ន។ "ស្នាដៃសិល្ប:មួយមានអត្ថន័យច្រើនទៅតាមមនុស្សយល់រៀងខ្លួន។ សម្រាប់សិល្បករដែលផលិតចេញស្នាដៃទាំងនោះមកគឺចង់បង្ហាញពីអ្វីដែលខ្លួនយល់ឃើញនៅក្នុងសង្គមដែលខ្លួនរស់នៅ ទាក់ទងទៅនឹងសង្គម វប្បធម៌ សន្តិភាព សេដ្ឋកិច្ច និងការអភិវឌ្ឍរបស់ប្រទេសឲ្យស្តែងចេញលើស្នាដៃសិល្បៈរបស់ខ្លួន ដើម្បីបង្ហាញទៅជនរួមជាតិ និងបរទេស"។

បន្ទប់ស្នាក់នៅរបស់ សិល្បករ លោក លាង ស៊ីកន ដែលដំឡើងនៅក្នុងសាលពិពរណ៍

អ្នកទស្សនាកំពុងទស្សនារូប និងសម្ភារៈដំឡើង និងផលិតរូបផ្ទាំងរូបភាពរបស់លោក លាង ស៊ីកន

ស្នាដៃគំនូរដែលរចនាចេញពីស្បែកគោ សំពត់ និងកំណាត់មួយផ្ទាំងនេះគឺជាស្នាដៃថ្មីមួយក្នុងស្នាដៃសិល្បៈដទៃដែលបានដាក់តាំងនៅវិទ្យាស្ថានភាសាបារាំង។ ស្នាដៃនេះផលិតក្នុងឆ្នាំ២០១៨ ដោយប្រើពេលអស់រយៈពេលមួយខែ។

លោក លាង ស៊ីកន ជាសិល្បករសហសម័យដែលមានស្នាដៃសិល្បៈជាច្រើន។ ស្នាដៃរបស់សិល្បកររូបនេះត្រូវបានដាក់តាំងបង្ហាញច្រើនជាង២០ប្រទេសជុំវិញពិភពលោក ដោយក្នុងនោះមានប្រទេសធំៗដូចជា បារាំង អង់គ្លេស អាល្លឺម៉ង់ សហរដ្ឋអាមេរិក អូស្ត្រាលី សឹង្ហបុរី ហុងកុង និងប្រទេសចិន៕

អត្ថបទ៖ លន ហ្សាឌីណា