លេចមុខតារាសម្តែង ហេង នរៈកក្កដា លេងពានពាក់កណ្តាលអាជីព

2018-05-04 06:43:47
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្តែងលេងសាច់ដុំ ហេង នរៈកក្កដា មិនត្រឹមតែចូលស៊ុបក្នុងវិស័យសិល្បៈទេ ប៉ុន្តែផ្នែកកីឡាបាល់ទាត់ក៏ចូលរូបគេចូលរួមលេងសកម្មជារៀងរាល់សប្តាហ៍។ ថ្មីៗរូបគេលេចមុខលេងឲ្យក្រុមយុវជនកំពង់ចាមក្នុងពានរង្វាន់ពាក់កណ្តាលអាជីព Khmer Real Estate League 2018 ថែមទៀតផង។

នរៈកក្កដាបានប្រាប់ថា តាមពិតទៅកីឡាបាល់ទាត់ជាអ្វីដែលរូបគេលេងស៊ុបខ្លាំងតាំងពីមុនចូលសិល្បៈម្ល៉េះ។ នៅពេលរូបគេរៀននៅវិទ្យាល័យទួលទំពូង រូបគេក៏លេងឲ្យវិទ្យាល័យនោះក្នុងកម្រិតវិទ្យាល័យរាជធានីភ្នំពេញ និងទូទំាងប្រទេសផង។ ក្រៅពីនោះរូបគេក៏បានឲ្យក្រុមផ្សេងៗជាច្រើនទៀត។

លោក ហេង នរៈកក្កដា

ជាពិសេសរូបគេធ្លាប់ចូលលេងឲ្យក្រុមមជ្ឈមណ្ឌលកម្ចាត់មីនកម្ពុជាកាលពីឆ្នាំ២០១៦ក្នុងលីគបាល់ទាត់កំពូលកម្ពុជា ប៉ុន្តែចូលលេងបានប្រហែលជា៣ខែក៏ឈប់ដោយសារមិនពេលហ្វឹកហាត់ច្រើន និងមមាញឹករឿងសិល្បៈផង។ សព្វថ្ងៃនេះនរៈកក្កដាជាសមាជិកមួយរូបក្នុងក្រុមបាល់ទាត់មហាហង្សដែលដឹកនាំដោយអ្នកដឹកនាំរឿង អ៊ិន សុភិន។ ក្រុមមហាហង្សតែងតែប្រកួតមិត្តភាពជាមួយក្រុមផ្សេងៗស្ទើររាល់សប្តាហ៍។

នៅពេលពាន Khmer Real Estate League ចាប់ផ្តើមរដូវកាល២០១៨នេះ រូបគេបានចូលរួមជាមួយក្រុមយុវជនកំពង់ចាម។ នរៈកក្កដាបាននិយាយថា រូបគេក៏បារម្ភគ្រោះថ្នាក់ជាយថាហេតុណាមួយដែរពេលចូលលេងពានកម្រិតពាក់កណ្តាលអាជីពបែបនេះ ប៉ុន្តែរូបគេត្រូវមានការប្រុងប្រយ័ត្ន។

រយៈពេល២សប្តាហ៍កន្លងទៅ ក្រុមយុវជនខេត្តកំពង់ចាមទទួលបាន៤ពិន្ទុស្ថិតនៅលេខរៀងទី៦ បន្ទាប់ពីប្រកួតលើកទី១ឈ្នះក្រុម Anachak TK ដោយលទ្ធផល ៥-២ និងប្រកួតលើកទី២ស្មើក្រុមបាសាក់ដោយលទ្ធផល ២-២៕

អត្ថបទ៖ ជាន ចាន់រ៉ា