សុំសរសើរ ឯម រៀម បរិច្ចាគថវិការាប់ពាន់ដុល្លារ ជួយដល់សត្វដំរី

2018-05-16 05:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ជារឿងមួយស្ងើចសរសើរបំផុតចំពោះ បណ្ឌិតច្នៃម៉ូដ ឯម រៀម បានបរិច្ចាគថវិកាផ្ទាល់ខ្លួនរាប់ពាន់ដុល្លារដល់ AIRAVATA ជាអង្គការមួយបង្កើតឡើងក្នុងគោលបំណងដើម្បីជួយអភិរក្សសត្វដំរី ដែលរស់រានមានជីវិតនៅកម្ពុជា។

ថវិការាប់ពាន់ដុល្លារដែល បណ្ឌិតច្នៃម៉ូដ រូបនេះយកទៅជួយ ដល់សត្វដំរីគឺបានមកពីការលក់គំនូរមួយផ្ទាំងក្នុងតម្លៃ ៥ ០០០ ដុល្លារអាមេរិកកាលពីពេលថ្មីៗ។ ប៉ុន្តែគួរឲ្យសោកស្ដាយបំផុត ដំរីមួយក្បាលត្រូវបានស្លាប់ ដោយសារតែខ្វះចំណីអាហារ ការថែទាំពីសំណាក់ពេទ្យសត្វ។ ដូច្នេះខ្លួនសង្ឃឹមថា ថវិកាដែលយកទៅ នឹងអាចជួយដល់ដំរីមួយចំនួនទៀត ដែលកំពុងតែត្រូវការជំនួយពីសប្បុរសជន។

លោក ឯម រៀម ថា៖" ជាអកុសល អូនអើយដំរីមួយក្បាល ឈ្មោះ បឹកគុក អាយុ ៣៥ ក្រោយពីដេកដួលក្រោកមិនរួចអស់រយៈពេលជាយូរមកនេះវាបានស្លាប់បាត់ទៅហើយ។ ប៉ុន្តែយើងក៏មានសំណាងដែរមានដំរីញីមួយទៀតវាកំពុងតែរកឈ្មោល។ ចំពោះគំនូរមួយផ្ទាំងបងលក់បានតម្លៃ ៥ ០០០ ដុល្លារហ្នឹងគឺបងយកទៅជួយ AIRAVATA ទាំងអស់ដើម្បីអភិរក្សសត្វដំរី នៅកម្ពុជាយើង"។

បច្ចុប្បន្នកម្ពុជាមានដំរីសរុបជាង ៣០០ក្បាល ក្នុងនោះដំរីស្រុកមានចំនួន ៧២ក្បាល និងដំរីព្រៃមាន ២៥០ក្បាល ដើម្បីចូលរួមចំណែកអភិរក្ស ថែទាំ និងការពារសត្វដំរីនោះ អង្គការ AIRAVATA សូមអំពាវនាវដល់សប្បុរសជនទាំងក្នុង និងក្រៅស្រុកជួយឧបត្ថម្ភជាថវិកា ដើម្បីស្រោចស្រង់សត្វដំរីដែលកំពុងតែត្រូវការជំនួយ។ នេះបើតាម ឯម រៀម បញ្ជាក់៕

អត្ថបទ៖ ឆុង ស៊ីណាន