“Solo: A Star Wars Story” ចំណែកថ្មីរបស់ខ្សែរឿង “Star Wars” អ្នកមិនធ្លាប់ឃើញពីមុន

2018-06-02 00:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

“Solo: A Star Wars Story” គឺជាចំណែកថ្មីមួយរបស់សែស្រឡាយរឿង "Star Wars” ដ៏ល្បីតាំងពីទសវត្សរ៍ទី ៧០ ព្រមទាំងជាស៊េរីរឿងដែលត្រូវគេចាត់ទុកថា ធ្វើឲ្យប្រភេទភាពយន្តបែបវិទ្យាសាស្ត្រ Sci-Fi និង Fantasy ចាប់ផ្ដើមមានគេទទួលស្គាល់កាន់តែខ្លាំង។ បន្ទាប់ពីក្រុមហ៊ុម Disney បានទិញសិទ្ធិផលិតភាពយន្តពីក្រុមហ៊ុន Lucas Film កាលពីឆ្នាំ ២០១២ មកក្រុមហ៊ុនយក្សនេះបានបញ្ចេញភាពយន្ត "Star Wars” ថ្មីជារៀងរាល់ឆ្នាំគិតតាំងពីឆ្នាំ ២០១៥។

ជាក់ស្ដែងចំពោះឆ្នាំនេះ សាច់រឿងអំពីតួអង្គដ៏ល្បីឈ្មោះមួយគឺ Han Solo ត្រូវបានគេផលិតជាសាច់រឿង រៀបរាប់ពីជីវិតរបស់តួអង្គមួយនេះ មុនពេលខ្លួនជាអ្នកបើកយានដ៏ល្អពូកែ ម្នាក់នៅទូទាំងហ្គាឡាក់ស៊ី។ ភាពយន្តនេះបានដឹកនាំដោយ លោក Ron Howard ដោយមានតារាសម្ដែង Alden Ehrenreich សម្ដែងជាតួអង្គឯក Han Solo។ គូសបញ្ជាក់ថាតួអង្គនេះ ធ្លាប់សម្ដែងរួចមកហើយដោយលោក Harrison Ford តាំងពីទសវត្សរ៍ទី៧០ និងនៅក្នុងរឿង "Star Wars: The Force Awakening” កាលពីឆ្នាំ ២០១៥។

ភាពយន្តនេះក៏បានចូលរួមសម្ដែងពីតារាល្បីៗដូចជា Emilia Clark ពីរឿង "Game of Throne” លោក Donald Glover និង Woody Harrelson។ ក្នុងសាច់រឿងនេះអ្នកនិពន្ធ បានព្យាយាមបង្ហាញឲ្យដឹងកាន់តែច្បាស់នៅអតីតកាលរបស់ Han Solo មុនពេលលោកទទួលបានយាន Millenium Falcon ដែលត្រូវបានគេចាត់ទុកថាជាយានល្អបំផុតមួយនៅក្នុងកាឡាក់ស៊ី។

ចំណុចល្អរបស់សាច់រឿង៖

“Solo” បានបង្ហាញឲ្យឃើញផ្នែកមួយទៀតនៃកាឡាក់ស៊ីដែលរៀបរាប់ហេតុការណ៍កើតឡើង បន្ទាប់ពី "Star Wars: Episode III Revenge of the Siths” បានកើតឡើង។ Han Solo បានរស់នៅភពមួយដែលរញ៉េរញ៉ៃនិងគ្មានច្បាប់ទម្លាប់ច្បាស់លាស់ ប៉ុន្តែខ្លួនមានមហិច្ឆតាក្លាយជាអ្នកបើកបរយានដ៏ពូកែម្នាក់។ មិនត្រឹមតែប៉ុណ្ណោះក៏បានបង្ហាញពីជំនួបគ្នាដំបូងរបស់ Han និងដៃគូបើកបរស្វាភពក្រៅ Chewbacca ផងដែរ។ សាច់រឿងបានបង្ហាញពីដំណើរផ្សងព្រេងរបស់ Han និងឧបសគ្គផ្សេងៗជាច្រើនដែលគេត្រូវឆ្លងកាត់ ដោយមានបញ្ចូលនូវឈុតឆាកបាញ់ប្រហារជាច្រើនគួរឲ្យគយគន់។

ឈុតខ្លះបានតម្រូវឲ្យពួកគេឈរលើរថភ្លើងប្រយុទ្ធគ្នា ក៏ដូចជាប្រយុទ្ធគ្នាលើផ្លូវអាកាសផងដែរ។ ចំពោះឈុតឆាកនីមួយគឺពិតជាស្រស់ស្អាតខ្លាំង ដោយសារតែបច្ចេកទេសផលិតនិងថតដោយសុទ្ធតែអ្នកជំនាញ។ ចំពោះការសម្ដែងគឺក៏ពិតជាល្អខ្លាំងផងដែរ ដោយធ្វើឲ្យអ្នកទស្សនារំភើបរហូតជាពិសេសឈុតឆាកសំខាន់ៗមួយចំនួន។ ក៏ប៉ុន្តែភាពយន្តនេះក៏មានចំណុចខ្វះខាតជាច្រើនផងដែរ ដែលធ្វើឲ្យ មិនមានលទ្ធភាពរកចំណូលបានច្រើនតាមការរំពឹងទុក។

ចំណុចមិនល្អនិងខ្វះខាត៖

អ្វីដែលសំខាន់បំផុតនោះ គឺអ្នកគាំទ្រភាពយន្ត "Star Wars” ជាច្រើនមិនចង់ឃើញតារាថ្មីណាម្នាក់ មកសម្ដែងជាតួអង្គ Han Solo នោះឡើយ។ ចំណែកឯការសម្ដែងរបស់តួអង្គឯក លោក Alden Ehrenreich គឺពិតជាល្អ ប៉ុន្តែនៅមានកម្រិតនៅឡើយព្រោះលោកត្រូវចាំបាច់ ធ្វើត្រាប់តាមសកម្មភាពខ្លះៗរបស់តួអង្គចាស់លោក Harrison Ford។ បែបនេះហើយបានជាតួអង្គរបស់លោក មានលក្ខណៈធម្មតាៗ សឹងតែចាញ់តួអង្គសំខាន់ៗផ្សេងៗទៀតនៅក្នុងសាច់រឿងដូចជាតួអង្គសម្ដែងដោយ លោក Donald Glover និង Emiliar Clark។

ចំពោះបច្ចេកទេសនៃការថតគឺល្អគ្រប់គ្រាន់ប៉ុន្តែ ពេលទស្សនានៅរោងកុនអ្នកទស្សនាជាច្រើនកត់សម្គាល់ថាគឺវាមានលក្ខណៈងងឹតបន្តិចខុសពីធម្មតាជាហេតុធ្វើឲ្យពិបាកមើលខុសធម្មតា។ នេះអាចជាអ្វីដែលអ្នកដឹកនាំចង់បាន ឬក៏សាច់រឿងតម្រូវឲ្យរូបភាពបង្ហាញបែបនេះ។

សរុបសេចក្ដីមក “Solo: A Star Wars Story” គឺជាប្រភេទភាពយន្តបែប Pop-Corn flick ពោលគឺមិនមែនល្អមើលខ្លាំង ប៉ុន្តែក៏មានឈុតឆាកមួយចំនួនធ្វើឲ្យអ្នកពេញផងដែរ ជាពិសេសគឺអ្នកចូលចិត្តភាពយន្តចម្បាំងភពផ្កាយ "Star Wars”។

ទស្សនាវីដេអូ Review ខាងក្រោម៖

អត្ថបទ៖ ធារ៉ូ