ហេង ប៊ុនលាភ ប្រកាសលក់អចលទ្រព្យច្រើនសន្ធឹក យកប្រាក់វិនិយោគជំនួញធំ

2018-05-31 07:38:23
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងជើងចាស់ លោក ហេង ប៊ុនលាភ បានប្រកាសលក់អចលទ្រព្យរបស់លោកជាច្រើនទីតាំង ដោយទ្រព្យទាំងនោះបើគិតជាទឹកប្រាក់រាប់សិបម៉ឺនដុល្លារឯណោះ។

អចលនទ្រព្យដែល លោក ហេង ប៊ុនលាភ ប្រកាសលក់នោះមាន ដី ផ្ទះវីឡាកូនកាត់នៅ ខេត្តសៀមរាប ដីចម្ការនៅតំបន់ទេសចរណ៍ភ្នំកូនសត្វ ខេត្តកំពត និងដីចម្ការនៅ ខេត្ត កំពង់ស្ពឺ ដោយទ្រព្យទាំងនោះ លោកបានទិញជាច្រើនឆ្នាំមកហើយ ទើបប្រកាសលក់ចេញ ដើម្បីបង្វិលប្រាក់រកស៊ីជំនួញធំមួយ ក្នុងពេលឆាប់នេះ។

ជំនួញដែលតារាសម្ដែងជើងចាស់ និងជាតារាចម្រៀងរូបនេះ គ្រោងនឹងយកប្រាក់ជាច្រើនទៅវិនិយោគនោះ ត្រូវបានលោកបង្ហើបឲ្យដឹងថា គឺត្រៀមបើកជាផ្ទះសំណាក់មួយនៅ ខេត្តសៀមរាប ប៉ុន្តែដើមទុនយកទៅវិនិយោគនោះ លោកមិនបានប្រាប់ឲ្យដឹងឡើយ។ "ខ្ញុំចង់ធ្វើ Boutique នៅសៀមរាប ប៉ុន្តែមិនដឹងអស់ម៉ាណអីម៉ាណទេ ព្រោះទើបដាក់លក់ដី និង ផ្ទះនោះ ដើម្បីយកលុយទៅធ្វើវា" លោក ហេង ប៊ុនលាភ ថ្លែងឲ្យដឹង។

លោក ហេង ប៊ុនលាភ ត្រូវបានគេដឹងថា គឺជាតារាម្នាក់ដែលមានទ្រព្យច្រើន កន្លងមកលោកគឺជាថៅកែ ឡូត៍នេសាទ និង ជាម្ចាស់ផ្ទះសំណាក់មួយនៅ បាត់ដំបង ប៉ុន្តែក្រោយមកជំនួញរបស់លោកបានបរាជ័យ ហើយក៏បានសម្រេចចិត្តវិលចូលសិល្បៈវិញ ក្រោយផ្អាកមួយខ្យល់ធំ។ ក្រោយពីវិលចូលសិល្បៈវិញ លោកបានថតភាពយន្តជាបន្តបន្ទាប់ជាច្រើន ក្នុងនោះមានរឿង "ហ្លូងព្រះស្ដេចកង", រឿង " វិថីនារី", រឿង"ទឹកចិត្តប្រពន្ធ" និង រឿង "បំណុលស្នេហ៍" ជាដើម។

ម្ចាស់បទ "ជីដូនកាកី" រូបនេះ មិនទាន់ហ៊ានបង្ហាញក្ដីរំពឹងលើជំនួញខាងលើឡើយ ត្បិតអីស្ថិតក្នុងគម្រោងនៅឡើយ ប៉ុន្តែបើផ្អែកលើទីតាំង និងបទពិសោធន៍លោក អាចមានភាគរយច្រើនក្នុងការទទួលបានផលចំណេញមកវិញ៕

អត្ថបទៈ ស៊ុនហួត