ដឹងលក្ខណៈពិសេសរបស់ពិភពបាតសមុទ្រ មានសត្វ-ត្រីរយប្រភេទ ត្រៀមបើកនៅអ៊ីអន២

2018-06-04 08:56:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រជាជនខ្មែរធ្លាប់តែឃើញសត្វ និងត្រីសមុទ្រតែក្នុងទូរទស្សន៍ប៉ុណ្ណោះ ឬបើមិនអ៊ីចឹងទេ មានតែអ្នកបានដើរលេងក្រៅប្រទេសទេដែលឃើញផ្ទាល់នឹងភ្នែក ពេលទិញសំបុត្រចូលមើលពិភពបាតសមុទ្រនៅប្រទេសគេ។ តែមិនថ្វីទេ សល់តែប៉ុន្មានសប្ដាហ៍ទៀត ព្រោះកម្ពុជានឹងបើកពិភពបាតសមុទ្រលើកដំបូងបំផុតនៅផ្សារទំនើបអ៊ីអន សែនសុខ ស៊ីធី (អ៊ីអន២) ជាន់ទី១។

ពិភពបាតសមុទ្រនៅកម្ពុជាដែលមានឈ្មោះ Fantasea Aquarium មានលក្ខណៈពិសេសខុសពីពិភពបាតសមុទ្រនៅបរទេស ដោយសារមិនត្រឹមតែមានសត្វ-ត្រីទឹកប្រៃនោះទេ ថែមទាំងមានត្រីទឹកសាបពីទន្លេមេគង្គទៀតផង សរុបមានជាង ១០០ ប្រភេទឯណោះ។ នេះបើតាមការឲ្យដឹងពីលោក តាំង សុគន្ធពិសិដ្ឋ ប្រធានគ្រប់គ្រងទូទៅរបស់ Fantasea Aquarium។

លោក តាំង សុគន្ធពិសិដ្ឋ ប្រធានគ្រប់គ្រងទូទៅ (ស្ដាំ) និងលោក Lum Kit Mun Co. Founder Fantasea Aquarium (ឆ្វេង)

អ្នកគ្រប់គ្រងរូបនេះប្រាប់ Sabay ថា៖ "ចំណុចពិសេសរបស់យើង គឺយើងមានសត្វ-ត្រីទឹកសាប ហើយមានទឹកប្រៃទៀត។ យើងយកសត្វទាំងនោះពីទន្លេអាម៉ាហ្សូន ទន្លេមេគង្គ មហាសមុទ្រប៉ាស៊ីហ្វិក ជាដើម សរុបមានប្រមាណជាង ១០០ ប្រភេទ។

ម្យ៉ាង អ្នកទៅមើល Fantasea Aquarium នឹងមាន Guide (អ្នកផ្ដល់ព័ត៌មាន) នៅគ្រប់កន្លែង ដើម្បីប្រាប់លម្អិតពីលក្ខណៈនៃរស់នៅរបស់សត្វទាំងនោះ"។

មានន័យថា អ្នកមើលមិនត្រឹមតែស្គាល់ និងឃើញរាងស្អាតរបស់សត្វ-ត្រីទាំងនោះទេ ថែមទាំងយល់ដឹងពីស៊ីជម្រៅពីប្រភេទសត្វទាំងនោះផងដែរ មិនថា វាស៊ីអីជាអាហារ ការបន្តពូជ ភាគច្រើនសម្បូររស់នៅទីណា ជាដើម។

ពិភពបាតសមុទ្រ Fantasea Aquarium ដែលមានទំហំ ៦០០ ម៉ែត្រការ៉េនេះ នឹងមានត្រីឆ្លាម ត្រីក្នុងរឿង Finding Nemo/Dory, Jellyfish, បបែល ផ្កាសមុទ្រ និងត្រីផ្សេងៗទៀតជាច្រើន។

បើតាមគម្រោង ពិភពបាតសមុទ្រនេះ នឹងបើកដំណើរការនៅពាក់កណ្ដាលខែមិថុនា ដោយមានតម្លៃអាចក្រោម ១០ ដុល្លារ និងមានប្រភេទសម្រាប់ក្មេង និងមនុស្សធំ។ លោក ពិសិដ្ឋ បញ្ជាក់។

សម្រាប់ព័ត៌មានបន្ថែម ចូលទៅផេកហ្វេសប៊ុក Fantasea Aquarium KH ៕

អត្ថបទ៖ វិទូ

ពាក្យទាក់ទង