ប៉ុបពី ដាក់ប៉ុន្មានម៉ាត់នេះ អ្នកស្រលាញ់ភេទដូចគ្នាអាចពិចារណាបកក្រោយ

2018-06-13 08:11:44
ចំនួនមតិ 0 | ចំនួនចែករំលែក 0

ចន្លោះមិនឃើញ

"មនុស្សប្រុស និងស្រីនៅតែបែកបាក់ ចុះទម្រាំយើងប្រុស និងប្រុស គួរព្យាយាមស្រលាញ់ខ្លួនឯងឲ្យបានច្រើន ធ្វើអំពើល្អឲ្យបានច្រើន កុំអំនួតទៅនឹងស្នេហាថាគេស្រលាញ់ខ្លួន ពេលគេស្គាល់ទឹកស្គាល់បឹង ស្គាល់ព្រៃភ្នំអស់ហើយ ច្បាស់ណាស់គេនឹងបោះបង់យើងចោល គ្មានទេ សម្រាប់ស្នេហាពិតរបស់ភេទទី៣នោះ" នេះជាការលើកឡើងរបស់ កញ្ញា ប៉ុបពី តារាសម្ដែងភេទទី៣ធ្លាប់រងភាពឈឺចាប់នឹងស្នេហាកន្លងមក។

ប៉ុបពី បានលើកឡើងថា នៅពេលដែលឃើញម៉ា ដូណា បានទម្លាយរឿងស្នេហាបង្ហាញមុខប្រុសស្នេហ៍ជាសាធារណៈ នាងសូមសរសើរអ្នកទាំងពីរជាខ្លាំង ប៉ុន្តែសម្រាប់នាងទោះនាងបានកែភេទជាស្រី១០០%រួចហើយក្ដី គឺមិនហ៊ានធ្វើដូច ម៉ា ដូណា ឡើយ។

ឆ្លងកាត់ភេទទី៣ជាង៣០ឆ្នាំមកនេះ ប៉ុបពី សូមនិយាយជាទូទៅថា សម្រាប់បរិបទក្នុងប្រទេសកម្ពុជាបច្ចុប្បន្ន គឺនៅមិនទាន់ទៅរួចទេអារឿងភេទទី៣ស្រលាញ់គ្នាស្មោះ ។ ការដែលមិនអាចស្រលាញ់គ្នារហូតដល់ចាស់រៀងខ្លួននោះ គឺមានកត្តាជាច្រើន ដូចជា កត្តាគ្រួសារ កត្តាសង្គម ជាដើម។

នាងថា សម្រាប់ភាគីខាងបុរស គឺតែងចង់បានកូនចៅមកបន្តវង្សត្រកូល គេមិនអាចទ្រាំនៅជាមួយប្រុសដូចគ្នា ដោយមិនមានកូនចៅបាននោះឡើយ ហើយម្យ៉ាងម្ដាយឪពុកបងប្អូនគេមិនពេញចិត្ត។ ចំពោះកត្តាសង្គមវិញ នៅមិនទាន់មានការទទួលស្គាល់ពីស្នេហាភេទទី៣នៅឡើយ ហើយនៅពេលដែល អ្នកភេទទី៣ បើកចំហជាសាធារណៈពេក ច្បាស់ណាស់នឹងមានការរិះគន់ពេបជ្រាយ យូរ និងឆាប់ ភាគីខាងប្រុសច្បាស់ជាដើរចេញមិនខាន។ នាងថា សង្គមភាគច្រើនគេបន្ទោសទៅភាគីខាងបុរស ហេតុអ្វីបានមកស្រលាញ់ភេទទី៣ ដូចនេះភាគីខាងបុរស តែងគិតច្រើនពីបញ្ហានេះ ហើយចុងក្រោយចែកផ្លូវគ្នាតែម្ដង។

ប៉ុបពី បានផ្ដល់មតិមួយចំនួនសម្រាប់ជាការដាស់អារម្មណ៍ក្រុមភេទទី៣គ្រប់រូប ដូចបានលើកឡើងខ្លះខាងលើ ក្រុមភេទទី៣ទាំងអស់ត្រូវហ៊ានទទួលស្គាល់ការពិត ស្រលាញ់ខ្លួនឯង ក្រុមគ្រួសារ អ្នកនៅជុំវិញខ្លួនឲ្យច្រើន ធ្វើអំពើល្អឲ្យបាន។ ចូរធ្វើការងារអ្វីមួយ ដើម្បីជាប្រយោជន៍ដល់សង្គមជាតិ ប្រសិនបើជួបអ្នកដែលស្រលាញ់ខ្លួនហើយ ត្រូវនិយាយគ្នាឲ្យបានច្បាស់ថា ព្រមទទួលយកការពិតទាំងអស់នោះឬអត់ ហើយម្នាក់ៗត្រូវត្រៀមចិត្តថា នឹងមានការចែកផ្លូវគ្នានៅពេលណាមួយជាក់ជាមិនខាន។ ត្រូវចាំ ពាក្យ១ម៉ាត់ ហើយត្រូវតែទទួលយកគ្នាទេស្នេហ៍ស្មោះ ចំពោះមនុស្សភេទទី៣៕