ហ៊ុយ យ៉ាឡេង លះបង់ខ្ពស់បង្អត់អាហារខ្លួនឯង ២ខែក្នុងរឿងថ្មី

2018-06-19 03:35:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តខ្នាតធំរឿង "ទារុណកម្មខ្មោច" ជាស្នាដៃទី៣របស់លោក ហ៊ុយ យ៉ាឡេង ដែលបានសហការជាមួយផលិតកម្ម សិល្បៈខ្មែរភាពយន្ត ត្រៀមចេញថតក្នុងពេលឆាប់នេះហើយ ដោយក្នុងនោះលោក បង្អត់អាហារខ្លួនឯងដល់ទៅ ២ខែឯណោះ។

ការលះបង់ខ្ពស់ដល់ថ្នាក់បង្អត់អាហារខ្លួនឯងដល់ទៅ ២ខែ និងយកម្ជុលចាក់នៅលើសាច់ស្ដែងៗដោយគ្មានញញើតបែបនេះ ដោយសារតែលោក ចង់ឲ្យផ្ទៃរឿងទាំងមូលផលិតចេញមកមានគុណភាពល្អមិនចាញ់កុនបរទេសមួយចំនួន។ ណាមួយរឿង"ទារុណកម្មខ្មោច" ក្រៅពីមានគម្រោងដាក់បញ្ចាំងនៅប្រទេសជិតខាងហើយនោះ លោក ក៏មានគម្រោងយកទៅបញ្ចាំងនៅ អាមេរិក និងអឺរ៉ុបទៀតផង ទើបសម្រិតសម្រាំងគិតគុណភាពជាចម្បង។

ក្រៅពីយកម្ជុលចាក់នៅលើដងខ្លួន និងបង្អត់អាហារខ្លួនឯងដល់ទៅ ២ខែ លោក ហ៊ុយ យ៉ាឡេង ឲ្យដឹងថា៖"ការលះបង់មួយទៀតគឺខ្ញុំមិនដែលហូបសត្វកណ្ដុរទេ តែក្នុងរឿងនេះខ្ញុំត្រូវហូបវាហើយ ដើម្បីមើលទៅឲ្យសក្ដិសមដូចជាមនុស្សស្គមរីងរៃត្រូវគេបង្អត់អាហារ ប៉ះអ្វីហូបហ្នឹង"។

ចំពោះការលះបង់ខ្ពស់ក្នុងរឿងថ្មីនេះ លោក ហ៊ុយ យ៉ាឡេង ក៏មានការព្រួយបារម្ភអំពីសុខភាព ខ្លះៗដែរតែមិនថ្វីទេ មុនពេលថតលោក ទៅពិគ្រោះយោបល់ជាមួយគ្រូពេទ្យជាមុនសិន។ ការបង្អត់អាហារនេះមិនបាន ន័យថាលោក មិនបរិភោគអ្វីទាំងអស់នោះទេ។ ប៉ុន្តែលោក សម្រេចយកទទួលទានតែបបរ ជំនួសបាយតែប៉ុណ្ណោះ។

រឿង"ទារុណកម្មខ្មោច" ជាប្រភេទរឿងនិយាយ អំពីខ្មោចខ្មែរក្រហម ដែលក្រុមគ្រួសារសេដ្ឋីទៅទារលុយមិនបានក៏ជ្រុលសម្លាប់តែម្ដងទៅ។ ក្រោយមកខ្មោចខ្មែរក្រហមក៏តាមលងបន្លាចដល់ក្រុមគ្រួសារសេដ្ឋី ដែលតួសេដ្ឋីសម្ដែងដោយ លោក ហ៊ុយ យ៉ាឡេង ម្ដង។

រឿង"ទារុណកម្មខ្មោច" ត្រៀមចេញថតក្នុងពេលឆាប់ៗនេះហើយចូលរួមសម្ដែងដោយ លោក ហ៊ុយ យ៉ាឡេង ដួង ម៉ានិច ឈឹម សក្កដា ព្រមទាំងតារាសម្ដែងស្រីប្រុសជាច្រើនរូបទៀត៕

អត្ថបទ៖ ឆុង ស៊ីណាន