យាយយ៉យ បង្ហាញគន្លឹះ នាំជោគជ័យជាមួយ ព្រហ្ម ម៉ាញ រហូតដល់បច្ចុប្បន្ន

2018-06-20 00:26:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មិនថាក្មេង ឬចាស់ ប្រិយមិត្តច្បាស់ជាបានដឹងនិងស្គាល់យ៉ាងច្បាស់ហើយវីរៈសិល្បករអាយ៉ៃជើងចាស់លោក ព្រហ្ម ម៉ាញ និងអ្នកស្រី នួន សារី ហៅយាយ យ៉យ ត្បិតអី អ្នកទាំងពីរបានចាប់ដៃគូ និងសាងប្រជាប្រិយភាពជាមួយគ្នាជិត៣០ឆ្នាំមកហើយ។ តាមការលើកឡើងរបស់យាយ យ៉យ មានកត្តាជាច្រើន ដែលនាំឲ្យអ្នកទាំងពីរអាចដណ្ដើមប្រជាប្រិយភាពពីបេះដូងទស្សនិកជនជាច្រើនមកដល់បច្ចុប្បន្ននេះ ក្នុងនោះទេពកោសល្យពីកំណើត និង ភាពវៃឆ្លាតចេះបត់បែនគឺជាចំណុចចម្បង នៃភាពជោគជ័យនេះ។

អ្នកស្រី នួន សារី ហៅយាយ យ៉យ បានរម្លឹកថា អ្នកស្រីចាប់ដៃគូច្រៀងជាមួយនាយ ព្រហ្ម ម៉ាញ ក្រោយរៀមច្បងសិល្បៈផ្សេងទៀតទេ ត្បិតអីមុនចាប់ដៃគូជាមួយគ្នា លោក ព្រហ្ម ម៉ាញ មានដៃគូជាច្រើនផ្សេងទៀត។ អ្នកស្រីរៀបរាប់ឲ្យដឹងថា ក្នុងអំឡុងឆ្នាំ១៩៨០ ដៃគូច្រៀងជាមួយលោក ព្រហ្ម ម៉ាញ មានអ្នកស្រី គិត សារ៉ែន អ្នកស្រី ព្រហ្ម ផល្លា អ្នកស្រី ណយសំណាង និង អ្នកស្រី អ៊ុក សុផា ជាដើម។ ចំណែកអ្នកស្រីវិញបានច្រៀងជាមួយគ្នា ក្នុងអំឡុងឆ្នាំ ១៩៩៨ ឬ ១៩៩៩ ហើយការច្រៀងពេលនោះអ្នកស្រីមិនចាំបានថា ធ្វើក្នុងកម្មវិធីអ្វី ធ្វើនៅទីណាឡើយ តែចាំបានថា អាយ៉ៃនៅជំនាន់នោះ មិនមានធ្វើក្នុងទីក្រុងឡើយ គឺច្រៀងនៅតាមខេត្តប៉ុណ្ណោះ។

អ្នកស្រី នួន សារី និងលោក ព្រហ្ម ម៉ាញ (រូបភាព ហ្វេសប៊ុក យាយ យ៉យ)

ម្តាយនាយព្រែក បានបន្តឲ្យដឹងថា ចាប់តាំងពីអ្នកស្រីចាប់ដៃគូជាមួយគ្នាមក ប្រជាប្រិយភាពចាប់ផ្ដើមមហាជនទទួលស្គាល់តែម្ដង ហើយបន្តច្រៀងជាមួយគ្នារហូតមកដល់បច្ចុប្បន្នតែម្ដង។ យាយ យ៉យ បានរម្លឹកបន្តថា នៅសម័យនោះ ពេលចុះច្រៀងអាយ៉ៃម្ដងៗ គឺសុទ្ធតែដេកតាមខេត្តគ្រប់កម្មវិធី ព្រោះផ្លូវសម័យនោះលំបាកខ្លាំងណាស់។ ចំណោះកន្លែងដេកវិញ មិនមានផ្ទះសំណាក់ ឬសណ្ឋាគារដូចបច្ចុប្បន្នឡើយ គឺដេកក្នុងកុដិព្រះសង្ឃ ឬ ក្នុងសាលារៀនជាដើម។ ចំពោះតម្លៃខ្លួនវិញ នៅសម័យនោះ ច្រៀងដូរជាអង្ករ បាន១ការ៉ុង ឬ១តៅ យកមកចែកគ្នា អីចឹងទៅ។

ចូលដល់ត្រង់ចំណុចនេះ យាយ យ៉យ លើកឡើងបែបលេងសើចថា ស្ដាយដែរ អ្នកស្រីល្បីខុសជំនាន់ បើល្បីចំសម័យនេះ បែបក្លាយជាអ្នកមានដូចគេឯងហើយ មើលក្មេងសម័យបច្ចុប្បន្នប៉ិចឡើងមានរថយន្តជិះៗបាត់ទៅហើយ។

ឆ្លងកាត់ការចាប់ដៃគូជាមួយគ្នាជិត៣០ឆ្នាំមកនេះ ម្ដាយបង្កើតនាយ ព្រែករូបនេះ បានវាយតម្លៃបានថា កត្តាដែលនាំឲ្យអ្នកស្រី និងលោក ព្រហ្ម ម៉ាញ អាចចាប់ដៃគូជាមួយគ្នាបានច្រើនឆ្នាំ ហើយអាចរក្សាប្រជាប្រិយភាពរហូតមកដល់បច្ចុប្បន្ន និងតកូនតចៅថែមទៀត បែបនេះ គឺមានចំណុចច្រើន។ ចំណុចសំខាន់នោះ អ្នកស្រីថា អាចមកពីទេពកោសល្យពីកំណើត ត្បិតអីអ្នកទាំងពីរចេះកំប្លែងស្ងួតដូចគ្នា ហើយស៊ីចង្វាក់គ្នាខ្លាំង។ ចំណុចពិសេសមួយវិញទៀតអ្នកស្រីថា នាយ ព្រហ្ម ម៉ាញ រាល់ការច្រៀងម្ដងពូកែចង ហើយតែងចេះស្រាយគ្រប់រឿងមិនទុកចោលឡើយ ធ្វើឲ្យអ្នកស្ដាប់អស់ចម្ងល់។ ជាមួយគ្នានោះ ក្នុងនាមជាដៃគូ អ្នកស្រី ត្រូវតែពូកែសួរ នៅពេលដៃគូ ចោទមក។

ចំណុចនេះ អ្នកស្រីស្នើប្រិយមិត្តងាកមកស្ដាប់អាយ៉ៃឆ្លងរបស់អ្នកទាំងពីរ"សុំច្បាប់ចៅក្រមយកត្បាល់ទៅបុក" នោះ នឹងយល់ពីការចងនិងការចេះស្រាយ របស់អ្នកទាំងពីរខ្លះហើយ។ អ្នកស្រីថា ធម្មតា សិល្បៈតែងតែមានពាក្យគ្រោតគ្រាតហើយ ប៉ុន្តែសំខាន់អ្នកដែលចងពាក្យទាំងនោះហើយ ត្រូវចេះស្រាយវិញ មិនសូវជាមានបញ្ហាចោទឡើយ។

អ្នកស្រីបានលើកឡើងថា អាយ៉ៃខុសពីចាប៉ី ព្រោះការច្រៀងអាយ៉ៃទាមទារចោទភ្លាម ឆ្លើយភ្លាម ដៃគូម្នាក់ៗត្រូវ ឆ្លាតវៃណាស់ ហើយច្រៀង មិនមានភ្លេងទេ។ ចំណែកចាប៉ីវិញ ស្រួលជាងអាយ៉ៃបន្តិច ព្រោះដៃគូម្នាក់ៗ ពេលដែលគិតបញ្ហាអ្វីដែលរកនឹកមិនទាន់ឃើញ ដោយអាចយកចាប៉ី មកដេញដកឃ្លារកនឹកបាន។

វីរៈសិល្បករអាយ៉ៃជើងចាស់រូបនេះ បានថ្លែងបន្ថែមទៀតថា រាល់ការច្រៀងរបស់អ្នកស្រី គឺសុទ្ធតែពិភាក្សាជាមួយគ្នាមុខ មិនមែនច្រៀងទាំងទទឹងទិសឡើយ កម្មវិធីដែលត្រូវច្រៀងនោះជាកម្មវិធីអ្វី ហើយមនុស្សប្រភេទណាជាស្ដាប់។

ដោយបច្ចុប្បន្នទីផ្សារអាយ៉ៃមានការធ្លាប់ចុះ ហើយមិនទាន់មានដៃគូចម្រៀងអាយ៉ៃណា មានប្រជាប្រិយភាពខ្លាំងនៅឡើយ អ្នកស្រីក៏ដូចជាលោក ព្រហ្ម ម៉ាញ មានវ័យកាន់តែចាស់ទៅហើយនោះ អ្នកទាំងពីរមានការបារម្ភជាខ្លាំង ដោយក្នុងនោះអ្នកទាំងពីរមានបំណងចង់បង្រៀនជំនាញនេះទៅក្មេងជំនាន់ក្រោយដែលមានទេពកោសល្យហើយចង់ចាប់យកជំនាញអាយ៉ៃនេះ។ អ្នកស្រីថា បច្ចុប្បន្ននាយ ព្រហ្ម ម៉ាញ កំពុងតែពិភាក្សាជាមួយសមាគមសិល្បករខ្មែរ ដើម្បីរករកទីតាំង បណ្ដុះបណ្ដាលដោយមិនគិតប្រាក់ឡើយ៕

អត្ថបទៈ ស៊ុនហួត