គ្រូ​បង្វឹក​សញ្ជាតិ​អាហ្សង់ទីន​លោក Jorge Sampaoli អាច​នឹង​ប្រើ​ប្រព័ន្ធ​ដដែល​ពេល​ឈ្នះ​នីហ្សេរីយ៉ា​ ប៉ុន្តែ​ Sergio Aguero អាច​​ជំនួស​តំណែង Gonzalo Higuain នៅ​តំបន់​ប្រយុទ្ធ។ នេះ​បើ​តាម The Week ទើប​បាន​ចុះ​ផ្សាយ។

​​ប៉ុន្តែ​ Fifa.com ជឿ​ជាក់​ថា ក្រុម​មក​ពី​អាមេរិកឡាទីន​នឹង​មិន​ផ្លាស់ប្ដូរ​ទម្រង់​លេង​របស់​ខ្លួន​ឡើយ ពោល​គឺ​​ទម្រង់​លេង​ដែល​អាច​ជួយ​ឲ្យ​អាហ្សង់ទីន​ឡើង​ទៅ​វគ្គ​១៦​ក្រុម​ទាំង​ព្រលឹង​ចុង​សក់។

Fifa.com សន្និដ្ឋាន​ថា​ជម្រើស​១១​នាក់​ដំបូង​របស់​​ក្រុម​ជើងឯក​២​សម័យ​កាល​អាហ្សង់ទីន និង ម្ចាស់​ជើង​ឯក World Cup ១៩៩៨ បារាំង​អាច​ជា៖

អាហ្សង់ទីន រួម​មាន៖ Franco Armani; Gabriel Mercado, Nicolas Otamendi, Marcos Rojo, Nicolas Tagliafico; Ever Banega, Javier Mascherano, Enzo Perez, Angel Di Maria; Lionel Messi និង Gonzalo Higuain។

បារាំង អាច​មាន៖ Hugo Lloris; Benjamin Pavard, Raphael Varane, Samuel Umtiti, Lucas Hernandez; Paul Pogba, N’Golo Kante; Kylian Mbappe, Antoine Griezmann, Ousmane Dembele និង Olivier Giroud។

ប៉ុន្តែ​ Washington Post ​បាន​រាយការណ៍​​ថា​អាហ្សង់ទីន​មាន​ចំណុច​ខ្សោយ​ដ៏​ធំ​មួយ​មុន​ប៉ះ​បារាំង គឺ​នៅ​ត្រង់​​គ្រូ​បង្វឹក Sampaoli ​ប្រើ​ប្រព័ន្ធ​ការពារ​៣ នាក់។ ប្រព័ន្ធ​នេះ Sampaoli ជោគជ័យ​ច្រើន​នៅ​ពេល​ដឹក​នាំ​ឈីលី ប៉ុន្តែ បែរ​ជា​​បរាជ័យ​ធំ​បំផុត​ក្នុង​ប្រវត្តិសាស្ត្រ​របស់​ក្រុម​ជម្រើស​ជាតិអាហ្សង់ទីន​ ហើយ​​អតីត​គ្រូ​បង្វឹក​ឈីលី នៅ​តែ​បន្ត​ប្រើ​ទម្រង់​លេង​គ្រោះ​ថ្នាក់​ដល់​ក្រុម​ខ្លួន​ឯង​នេះ៕

ប្រភព៖ theweek   ប្រែ​សម្រួល៖ សុខ លាងហ៊ត