ក្រុមនារីឱកាសឡើងកាន់តែស្ដួចស្ដើង ស្របពេល U19កម្ពុជា នៅមានសង្ឃឹម

2018-07-05 02:29:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ឱកាសឡើងទៅកាន់វគ្គបន្តរបស់ក្រុមបាល់ទាត់នារីកម្ពុជា នៃពាន 2018 AFF Women's Championship កាន់តែស្ដួចស្ដើង ក្រោយចាញ់ក្រុមនារីថៃម្សិលមិញ ១១-០ ស្របពេល U19 កម្ពុជានៅមានសង្ឃឹមឡើងទៅវគ្គបន្ត បើទោះចាញ់ U19 ម៉ាឡេស៊ី ២-០ ម្សិលមិញដូចគ្នា ក្នុងពានរង្វាន់ 2018 AFF U-19 Youth Championship នៅទឹកដីប្រទេសឥណ្ឌូណេស៊ី។

សកម្មភាពប្រកួត ក្រុមនារីកម្ពុជា និងថៃម្សិលមិញ (រូបថត៖ FFC)

**- ក្រុមនារីកម្ពុជា៖**

ក្រោយចាញ់ក្រុមនារីថៃម្សិលមិញធ្ងន់ក ធ្វើឲ្យក្រុមនារីកម្ពុជាធ្លាក់មកកាន់លេខ ៤ ក្នុងតារាង ឆ្លងកាន់ការប្រកួតចំនួន ៣លើក។ ចំណែកក្រុមនារីថៃ និងក្រុមនារីអូស្ត្រាលី ដែលត្រូវបានគេរំពឹងអាចឡើងទៅកាន់វគ្គបន្តនោះ ពេលនេះមានភាគរយកាន់តែខ្ពស់ក្នុងការឆ្ពោះទៅកាន់វគ្គ ៤ ក្រុមចុងក្រោយ ដោយទើបតែឆ្លងកាន់ពីរប្រកួតដូចគ្នាមាន ៦ ពិន្ទុដូចគ្នា គ្រាន់តែថៃចំណេញគ្រាប់ស៊ុតច្រើនជាង ហើយថៃនៅលេខ ១ ស្របពេល អូស្រ្តាលី លេខ ២ ។

បើមើលទៅលើពិន្ទុ និងការប្រកួតដែលនៅសល់ ក្រុមនារីកម្ពុជាមានភាគរយខ្ពស់មែនទែនក្នុងការជ្រុះចេញពីព្រឹត្តិការណ៍នេះត្រឹមវគ្គសន្សំពិន្ទុតាមពូល A នេះ។ ក្រុមបាល់ទាត់នារីកម្ពុជា នៅសល់១ប្រកួតគឺជួបក្រុមខ្លាំង អូស្ត្រាលីនៅថ្ងៃស្អែកវេលាម៉ោង ៤:០០ រសៀល។

- ក្រុម U19 កម្ពុជា៖

ក្រុមបាល់ទាត់ U19 កម្ពុជា នៅតែមានសង្ឃឹមអាចឡើងទៅកាន់វគ្គបន្ត បើទោះចាញ់ក្រុមបាល់ទាត់ U19 ម៉ាឡេស៊ី ២-០ កាលពីម្សិលមិញក្ដី។ ក្រុមបាល់ទាត់ U19 កម្ពុជាកំពុងស្ថិតនៅលេខ ២ ក្នុងតារាង ដោយឆ្លងកាន់ពីរប្រកួតមាន ៣ ពិន្ទុ ស្របពេលទីម័រខាងកើត ដែលស្ថិតនៅលេខ ១ មាន ៤ ពិន្ទុប៉ុណ្ណោះក្នុងចំណោម ២ ប្រកួតដូចគ្នា ខណៈ ម៉ាឡេស៊ី លេខ ៣ មាន ៣ពិន្ទុក្នុងចំណោម ១ ប្រកួត។

បើមើលទៅលើពិន្ទុនេះមានន័យថា កម្ពុជានៅតែមានសង្ឃឹម អាចឆ្ពោះទៅកាន់វគ្គបន្ត ប្រសិនបើធ្វើបានល្អរាល់ការប្រកួតដែលនៅសល់។ ក្រុម U19 កម្ពុជានៅសល់ពីរប្រកួតក្នុងដៃគឺប៉ះ U19 មីយ៉ាន់ម៉ា វេលាម៉ោង ៧:០០ នាទីយប់ស្អែក និងប៉ះ ទីម័រខាងកើត នៅថ្ងៃទី១០ ខែកក្កដា ឆ្នាំ២០១៨ វេលាម៉ោង ៣:៣០ នាទីរសៀល។