ភូមា អញ្ជើញ សូរ្យ អេនណា ទៅគ្រងឈុតកូនក្រមុំ ផ្សាយពីទេសចរណ៍វប្បធម៌

2018-07-12 06:44:22
ចំនួនមតិ 0 | ចំនួនចែករំលែក 0

ចន្លោះមិនឃើញ

រូបភាពស្ដីពីសម្លៀកបំពាក់ប្រពៃណីភូមាជាច្រើនសន្លឹក ត្រូវបានកញ្ញា សូរ្យ អេនណា ប្រធានក្រុមម៉ូដែល"តារារះថ្មីកម្ពុជា" ផ្ញើមកកាន់Sabay ដោយនាងបានប្រាប់ថា រូបភាពទាំងនោះគឺជាសកម្មភាពរបស់នាង គ្រាដែលត្រូវបានប្រទេសភូមាអញ្ជើញទៅថតសម្លៀកបំពាក់ប្រពៃណីដើម្បីផ្សាយពីទេសចរណ៍វប្បធម៌ឲ្យប្រទេសមួយនេះ ព្រមទាំងការផ្លាស់ប្ដូរបទពិសោធន៍គ្នាទៅវិញទៅមកផងដែរ។

សូរ្យ អេនណា បានឲ្យដឹងថា ដោយសារតែនាងមានទំនាក់ទំនងល្អជាមួយក្រុមម៉ូដែលនៅប្រទេសភូមា ទើបធ្វើឲ្យមានការអញ្ជើញនាងទៅថតសម្លៀកបំពាក់ប្រពៃណីដើម្បីផ្សាយពីទេសចរណ៍វប្បធម៌របស់ប្រទេសនេះ ដើម្បីឲ្យពិភពលោកបានដឹងកាន់តែច្បាស់។ នាងថា រូបភាពទាំងនោះក្រសួងទេសចរណ៍ក៏ដូចជាបណ្ដាញសារព័ត៌មាននៃប្រទេសភូមានឹងផ្សព្វផ្សាយជាសាធារណៈ ទៅកាន់ពិភពលោក ក្នុងន័យទាក់ទាញទេសចរណ៍មកទស្សនាប្រទេសមួយនេះកាន់តែច្រើន។ ទន្ទឹមនឹងការថតគ្រងឈុតកូនក្រមុំភូមា សូរ្យ អេនណា ក៏បាននាំសម្លៀកបំពាក់ប្រពៃណីខ្មែរទៅថតផងដែរ ដើម្បីផ្លាស់ប្ដូរបទពិសោធន៍វប្បធម៌ជាតិគ្នាទៅវិញទៅមក។

ទីតាំងដែល សូរ្យ អេនណា ទៅថតនោះ គឺស្ថិតក្នុងវត្ត Shwe Dagon ដែលជាកន្លែងទេសចរណ៍ល្បីមួយនៃប្រទេស ភួមា ហើយម៉ូដែល ដែលថតជាមួយនាង គឺជាម៉ូដែលរបស់ប្រទេសភូមាតែម្ដង។

ចង់ដឹងថាឈុតកូនក្រមុំប្រពៃណីជាតិភូមា គ្រងដោយកញ្ញា សូរ្យ អេនណា មានសម្រស់ស្រស់ស្អាតបែបណាសូមទស្សនាទាំងអស់គ្នា៕