មិនអន់ទេ សុទ្ធគ្រឿងបច្ចេកវិទ្យាច្នៃផលិតក្នុងស្រុកទាំងអស់

2018-07-26 00:05:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មួយរយៈចុងក្រោយមានការបង្កើតឧបករណ៍ប្រើប្រាស់ច្នៃក្នុងស្រុក ធ្វើឲ្យមានការចាប់អារម្មណ៍ពីមជ្ឍដ្ឋានពលរដ្ឋមួយចំនួន។ ខ្លះបង្កើតឡើងសម្រាប់បម្រើតម្រូវការក្នុងស្រុក និងមួយចំនួនមានលទ្ធភាពនាំចេញទៅលក់ដល់ក្រៅប្រទេស។

# កង់បីដើរដោយថាមពលព្រះអាទិត្យ

កង់បីដើរដោយថាមពលព្រះអាទិត្យ

យានជំនិះដើរដោយថាមពលព្រះអាទិត្យ ឬហៅថាកង់បីជាស្នាដៃផលិតស្ថាបនិករថយន្តអង្គរលោក ញាន ផល្លឹក។ យានជំនិះនេះ អាចផ្ទុកអ្នកដំណើរបាន ១០នាក់ ដោយមានកៅអីចំនួនបីនៅផ្នែកខាងមុខ។ កៅអីមួយកណ្ដាលសម្រាប់តៃកុង កៅអីពីរសងខាងសម្រាប់អ្នកដំណើរ និងផ្នែកខាងក្រោយមានកៅអីវែងពីរ សម្រាប់ផ្ទុកអ្នកដំណើរផ្សេងទៀត។

រូបអ្នកដំណើរកំពុងជិះកង់បី ស្នាដៃស្ថាបនិករថយន្តអង្គរ

កង់បីនេះ ត្រូវបានក្រុមហ៊ុនបច្ចេកវិទ្យាដ៏ធំមួយ នាំចេញទៅលក់នៅប្រទេសហ្វីលីពីន។ ចំពោះតម្លៃប្រហែល ៣៨៨,៨៨៨.០០ បេសូ (ឈ្មោះរូបិយប័ណ្ណហ្វីលីពីន) ស្មើជាង ៧ ២៦៧ ដុល្លារអាមេរិក។

# កុំព្យូទ័រម៉ាកគម្ពី (Koompi)

កុំព្យូទ័រគម្ពីរ (Koompi) ជាស្នាដៃរបស់ក្រុម Smallworld បានបើកឲ្យមហាជនអាចធ្វើការកុម្ម៉ង់ទិញជាមួយតម្លៃ ៣៦៩ ដុល្លារ ។

រូបរាងនិងសមត្ថភាពមិនធម្មតា។ Software កុំព្យូទ័រគម្ពីរជាប្រភេទ Open-source ដែលមានកម្មវិធីសម្រាប់សិស្សនិស្សិតអាចប្រើប្រាស់ជាច្រើនដូចជា៖ កម្មវិធី Office Applications, Software Center, Browser, Video Player កម្មវិធី Gimp ជាកម្មវិធីសម្រាប់ការរចនាក្រាហ្វិកដែលមានមុខងារស្រដៀងទៅនឹងកម្មវិធី Photoshop និងកម្មវិធី Visual Studio Code សម្រាប់ការសិក្សាផ្នែកសរសេរកូដជាដើម។

កុំព្យូទ័រគម្ពីរគ្រោងដាក់លក់ដំបូងចំនួន ៥០០ គ្រឿង ហើយថវិកាដែលទទួលបានមួយចំណែក ក៏បែងចែកដល់អង្គការមនុស្សធម៌។

រូបភាព៖ channelnewsasia

លក្ខណៈសម្បត្តិ៖

ប្រើឈីប CPU ៖ Intel® N3450 1.10 GHz (4 Core) processor
អេក្រង់ទំហំ ១៣,៣ អ៊ីញ កម្រិត FullHD(1920x1080 ភិចសែល)
ទម្ងន់ ១,៤ គីឡូក្រាម - RAM (មេម៉ូរី )៖ ៨GB
ថាមពលថ្មទំហំ ៤៨០០ មីលីអំពប្រភេទ Li-ion Battery កម្លាំង ៧,៤ វ៉ុល អាចប្រើប្រាស់បានប្រមាណជា ៧ ម៉ោង
ទំហំផ្ទុកក្នុងម៉ាស៊ីន SSD ១២៨GB អាចគាំទ្រ SSD បន្ថែមខាងក្រៅបាន
ពណ៌ ២ គឺ៖ ពណ៌ប្រផេះ និងពណ៌ផ្កាឈូក (Rose gold)។

បើអ្នកចាប់អារម្មណ៍ចង់សាកល្បងប្រើប្រាស់កុំព្យូទ័រគម្ពីរ អាចបញ្ជាទិញតាមរយៈ Link ខាងក្រោមនេះបាន៖koompi.com#order៕

# ម៉ាស៊ីនបាញ់ថ្នាំ និងគោយន្តបញ្ជាដោយប្រើតេឡេ

ម៉ាស៊ីនបាញ់ថ្នាំ និងគោយន្តបញ្ជាដោយប្រើតេលេ ត្រូវបានច្នៃដោយយុវជន ស៊ុង រ៉ាវុទ្ធ។ ឧបករណ៍បាញ់ថ្នាំ ដែលប្រើតេឡេបញ្ជាពីចម្ងាយនេះ សម្រាប់បម្រើការបាញ់សត្វល្អិតក្នុងដំណាំស្រូវ។

សង រ៉ាវុធ និងម៉ាស៊ីនបាញ់ថ្នាំនៅខាងខាងក្រោយ

ឧបករណ៍បាញ់ថ្នាំ ប្រើតេឡេបញ្ជាពីចម្ងាយនេះ ធ្វើឡើងជាពិសេសសម្រាប់ការបាញ់ដំណាំ ដោយមិនចាំបាច់ត្រូវចងបំពង់ថ្នាំជាប់ខ្នង ដូចពីមុនទៀតឡើយ គ្រាន់តែប្រើតេឡេបញ្ជា ឯរយៈចម្ងាយបានប្រមាណជា ១០០ ម៉ែត្រ។

សកម្មភាពកំពុងតេស្តឧបករណ៍បាញ់ថ្នាំ ដែលប្រើតេឡេបញ្ជា

ផលិតផលដែលបានច្នៃបង្កើតមានពីរគឺ ម៉ាស៊ីនបាញ់ថ្នាំស្រូវ តម្លៃ ៨៥០ ដុល្លារ ឯម៉ាស៊ីនបាញ់ថ្នាំស្រូវនិងដំឡូង តម្លៃ ១៣៥០ ដុល្លារ ។ លោកបន្តថាបើប្រិយមិត្តដែលមានបំណងចង់ជួយជំរុញ ដល់យុវជនបង្កើតឧបករណ៍ដ៏ពិសេសនេះ អាចទាក់ទងតាមលេខ 098 248 058។

ម៉ាស៊ីនបាញ់ថ្នាំ បញ្ជាដោយប្រើតេឡេ

ចំពោះគោលបំណងច្នៃគោយន្តនេះ រ៉ាវុធ បានឲ្យដឹងថា ដើម្បីជាការសម្រួលដល់បងប្អូនកសិករក្នុងការដឹកជញ្ជូនក៏ដូចជា សម្រាលបន្ទុកការងារប្រចាំថ្ងៃបានផងដែរ ហើយគោលដៅសម្រាប់បំពេញតម្រូវការក្នុងស្រុកឲ្យបានទូលំទូលាយ និងអាចលក់ចេញទៅប្រទេសជិតខាង។

គោយន្ត ប្រើតេឡេបញ្ជា

ជាងនេះទៀត គោយន្តច្នៃនេះជាគម្រោងទី២របស់ខ្លួន ដែលបានបង្កើតឡើង។ គម្រោងនេះដែរ រូបគេ បានសរសេរគម្រោងអាជីវកម្មរួចរាល់ហើយ (link ខាងក្រោម) សម្រាប់អ្នកដែលចង់ក្លាយជាម្ចាស់ជំនួយដែលបានចាប់អារម្មណ៍ចង់ជួយជំរុញ ដល់យុវជនបង្កើតឧបករណ៍ដ៏ពិសេសនេះ៕

គោយន្តបញ្ជាដោយប្រើតេឡេ

ចុចដោនឡូត សំណើគម្រោងអាជីវកម្ម គោយន្តប្រើតេឡេ

អត្ថបទ៖ ម៉េងងី