Arnold សម្រុកថតរឿង "Terminator” វគ្គថ្មី ខណៈពេលទើបតែវះកាត់បេះដូង

2018-08-01 07:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងជើងចាស់ Arnold Schwarzenegger ត្រលប់មកប្រឡូកក្នុងវិស័យភាពយន្តវិញហើយ។ ទោះបីជាមានវ័យចំណាស់មែន ប៉ុន្តែលោកនៅតែមានបំណងសម្រេចការងារជាតារាសម្ដែង ដោយត្រលប់មកថតរឿង "Terminator” វគ្គថ្មី ទាំងដែលខ្លួនមានវ័យ៧១ឆ្នាំ។

លោក Arnold បានបញ្ជាក់ថាពេលនេះលោកថតបានពាក់កណ្ដាលហើយ ចំពោះសាច់រឿងវគ្គថ្មី ដោយឡែកព័ត៌មាននេះទទួលបាន ៤ខែក្រោយលោកបានធ្វើការវះកាត់បេះដូង។

កាលពីចុងខែមិនា តារារូបនេះបានធ្វើការវះកាត់ផ្លាស់ប្ដូរគ្រឿងក្នុងបេះដូង ដែលបានដាក់ចូលក្នុងខ្លួនលើកដំបូងកាលពីឆ្នាំ ១៩៩៧ បន្ទាប់ពីមានជំងឺបេះដូងធ្ងន់ធ្ងរ។ ការផ្លាស់ប្ដូរគឺតម្រូវឲ្យប្រើប្រាស់ក្នុងរយៈពេលតែ១០ទៅ១៥ឆ្នាំតែប៉ុណ្ណោះ នេះបើតាមការរាយការណ៍ពី CNN។ អីចឹងហើយទើបការវះកាត់នេះមិនមែនជារឿងគួរឲ្យតក់ស្លុតប៉ុន្មានទេ ព្រោះលោកបានត្រៀមចិត្តទុកជាមុន។

ទោះជាយ៉ាងណាក៏ដោយ វាពិតជាមានការលំបាកយ៉ាងច្រើនជុំវិញការព្យាបាលខ្លួនឲ្យមានសុខភាពប្រក្រតីឡើងវិញ ក្រោយការវះកាត់នេះ។

A post shared by Arnold Schwarzenegger (@schwarzenegger) on Jul 31, 2018 at 7:44am PDT

អ្វីដែលគួរឲ្យកោតសរសើរបំផុតគឺ Arnold បានបង្ហោះវីដេអូលើបណ្ដាញសង្គម Instagram កាលពីម្សិលមិញនេះ បង្ហាញពីខ្លួនកំពុងតែហាត់ប្រាណនៅ Gym ធ្វើតែមិនដឹង។ គូសបញ្ជាក់ថា ភាពយន្តថ្មីដែលលោកថតនេះ គឺនឹងពាក់ព័ន្ធជាមួយរឿង "Terminator” វគ្គដំបូងនិងទី២ ពោលគឺរឿងទាំង២ដែលដឹកនាំរឿងដោយលោក David Cameron នេះបើតាមសារព័ត៌មាន CBR។

Arnold សម្ដែងក្នុងរឿង "Terminator 2"

ភាពយន្តនេះគ្រោងដាក់បញ្ចាំងនៅថ្ងៃទី២២ ខែវិច្ឆិកាឆ្នាំ ២០១៩ ដឹកនាំរឿងដោយលោក Tim Miller ព្រមទាំងចូលរួមសម្ដែងដោយតារាល្បីៗជាច្រើនដូចជា Linda Hamilton, Machkenzie Davis, Gabriel Luna, Natalia Reyes និង Deigo Boneta៕

ប្រភព៖ goalcast ប្រែសម្រួល៖ ធារ៉ូ