ឯកឧត្តម សៅ សុខា និយាយពីបញ្ហាកីឡាករបាល់ទាត់កម្ពុជាធ្ងន់ៗ

2018-08-13 04:26:35
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅពេលប្រកាសតែងតាំងកីឡាករជម្រើសជាតិជប៉ុន Keisuke Honda ជាអ្នកគ្រប់គ្រងក្រុមបាល់ទាត់ជម្រើសជាតិកម្ពុជាថ្មីកាលពីម្សិលមិញ ឯកឧត្តម សៅ សុខា ប្រធានសហព័ន្ធកីឡាបាល់ទាត់កម្ពុជាមានប្រសាសន៍ធ្ងន់ៗជុំវិញប្រជាប្រិយភាពក្រុមជម្រើសជាតិ និងបញ្ហាកីឡាករកម្ពុជា។

ពិធីប្រកាសតែងតាំង Honda ជាគ្រូបង្គោលក្រុមបាល់ទាត់កម្ពុជា

ពេលអ្នកកាសែតចោទសួរថា ការតែងតាំង Keisuke Honda ជាគ្រូបង្គោលថ្មី តើអាចជាផ្នែកមួយជួយលើកកម្ពស់ប្រជាប្រិយភាពបាល់ទាត់កម្ពុជាវិញទេ ដោយសារមួយរយៈពេលចុងក្រោយនេះហាក់មានការធ្លាក់ចុះ? ឯកឧត្តម សៅ សុខា បានរៀបរាប់ដើម្បីឆ្លើយតបនឹងសំនួរនេះថា ចំពោះប្រជាប្រិយភាពរបស់ក្រុមបាល់ទាត់ជម្រើសជាតិកម្ពុជាមួយរយៈពេលចុងក្រោយនេះ ជាការពិតមានការធ្លាក់ចុះមែន។ ក្រុមបាល់ទាត់កម្ពុជាម្តងឡើងខ្លាំង ម្តងក៏ធ្លាក់ចុះ។ បើនិយាយមែនទែនទៅ ពេលលេងជាមួយក្រុមខ្សោយឈ្នះ ប៉ុន្តែលេងជាមួយក្រុមខ្លាំងចាញ់។ នេះជាបញ្ហាដែលធ្វើឲ្យអ្នកគាំទ្រថយចុះផងដែរ។

ឯកឧត្តម សៅ សុខា ចាប់ដៃ Honda

ប្រធានសហព័ន្ធបាល់ទាត់កម្ពុជារូបនេះបន្តថា ៖«មួយផ្នែកទៀតពាក់ព័ន្ធនឹងបញ្ហាកីឡាកររបស់យើង។ កីឡាករខ្មែរយើងតែម្តង។ កីឡាករត្រូវដឹងខ្លួនឯង ព្រោះលេងបាល់ កើតមកហើយ ប្រើពេលវេលាបីបួនដប់ឆ្នាំ ប៉ុន្តែបើមិនសូវឲ្យតម្លៃពលកម្មដែលខ្លួនធ្វើរាល់ថ្ងៃ អីចឹងពិបាកណាស់។ ឥឡូវទោះបីជាគ្រូ យើងបានដឹងហើយ គ្រូបាល់ទាត់កម្ពុជារបស់យើង។ យើងមានគ្រូប្រចាំអចិន្ត្រៃយ៍ យើងមានគ្រូមកពីកន្លែងផ្សេងៗ គ្រូខ្លះគេល្បី មានកេរ្តិ៍ឈ្មោះ ប៉ុន្តែពេលមកបង្ហាត់ក្រុមបាល់ទាត់កម្ពុជា មិនទទួលបានលទ្ធផលល្អប្រសើរ។ ដូច្នេះហើយលទ្ធផលឈ្នះ ចាញ់ មិនមែនស្ថិតនៅលើគ្រូទាំងស្រុងនោះទេគឺលើកីឡាករ»។

«ខ្ញុំគិតថា បច្ចេកទេសអន់ ឬខ្សោយមិនសំខាន់ទេ តែអ្វីដែលសំខាន់គឺឆន្ទៈនៃការលេង។ លេងបាល់ទាត់ខ្លួនឯង ទាល់តែមានឆន្ទៈខ្លួនឯង បើថា ចង់លេងក៏បាន មិនចង់លេងក៏បាន អាហ្នឹងពិបាកហើយ។ សូមទោស ដើម្បីឲ្យគេជួយយើងបាន លុះត្រាតែយើងជួយខ្លួនឯងជាមុនសិន។ បើសិនខ្លួនឯងមិនដេកលក់សោះ ហើយធ្វើដេកលក់ អីចឹងពិបាកហើយ»។

ឯកឧត្តម សៅ សុខា ជួបក្រុ្មកម្ពុជាពេលប្រកួតឈ្នះអាហ្វហ្គានីស្ថាន

កីឡាបាល់ទាត់កម្ពុជាទទួលបានការចាប់អារម្មណ៍ខ្លាំងពីមហាជនតាំងពីឆ្នាំ២០១៥តាមរយៈការប្រកួតជម្រុះបាល់ទាត់ពិភពលោក និង AFC Asian Cup ក៏ដូចជាមិត្តភាពអន្តរជាតិ។ ពេលនោះត្រូវបានគេមើលឃើញថា រាល់ការប្រកួតក្នុងពានរង្វាន់ និងមិត្តភាពអន្តរជាតិ អ្នកគាំទ្រចូលរួមទស្សនាស្ទើរពេញៗពហុកីឡដ្ឋានជាតិ។ ប៉ុន្តែចាប់តាំងពីចុងឆ្នាំ២០១៧មក សកម្មភាពបាល់ទាត់កម្ពុជាហាក់ស្ងប់ស្ងាត់ទៅវិញ ខណៈលទ្ធផលមិនសូវល្អប្រសើរ ហើយគ្រូបង្វឹកក៏ផ្លាស់ប្តូរញឹកញាប់៕