ចង់ទិញដី ឬសង់ផ្ទះជាប់មាត់ទឹកគ្មានហានិភ័យ ត្រូវដឹងគន្លឹះទាំង៥ ពីអ្នកជំនាញ

2018-08-16 02:24:32
ចំនួនមតិ 0 | ចំនួនចែករំលែក 0

ចន្លោះមិនឃើញ

មុននឹងឈានដល់ការសាងសង់ផ្ទះនៅក្បែរមាត់ទឹក សូមនិយាយពីប្រភេទដីដែលលោកអ្នកត្រូវជាមុនបន្តិចសិន។ តួយ៉ាងប្រភេទដីមាន៣ ដីខ្សាច់ ដីធ្ងន់ និងដីគ្រួស។ ដើម្បីដឹងថាដីនោះល្អ ឬអត់ លោកអ្នកមិនអាចមើលនឹងភ្នែក ប៉ះដោយដៃទទេបាននោះទេ ដោយចាំបាច់ត្រូវការខួងដីនៅទៅសិក្សានៅកន្លែងពិសោធន៍ ឬ ឡាប៊ូ។ ដំណាក់កាលខួងដី គឺយកពីស្រទាប់ដីខ្សាច់ ស្រទាប់ដីផុស នឹងដល់ស្រទាប់ដីធម្មជាតិ ឬដីមានថ្ម។

ដោយឡែកនៅកម្ពុជាមានផ្ទៃដីសរុបចំនួន១៨១ ០៣៥ គម២ ឬស្មើ២១ ភាគរយ ជាដីគោកដែលព័ទ្ធជុំវិញដោយដងទន្លេមេគង្គ ទន្លេសាប។ ហេតុនេះ ចង់មិនចង់ ប្រជាជនខ្មែរមួយភាគ ត្រូវមានជម្រកនៅជាប់មាត់ខានមិនបាន។

ចុះធ្វើយ៉ាងណា ដើម្បីរស់នៅ ឬក៏សាងសង់ផ្ទះជាប់មាត់ដោយសុវត្ថិភាព សូមជួបជាមួយលោក អ៊ូច ពេជ្ជគោ វិស្វករនៅក្រុមហ៊ុនឯកជនមួយរូប បានផ្ដល់បទសម្ភាសន៍ នូវគន្លឹះគួរប្រយ័ត្នអ្វីខ្លះមុនសាងសង់ក្បែរមាត់ទឹក? សូមតាមដូចតទៅ ៖

១. កម្ពស់ ឬនីវ៉ូទឹក

មុននឹងចាប់ផ្ដើមដល់ការសាងសង់ លោកអ្នកគួរស្វែងរកព័ត៌មានពាក់ព័ន្ធនីវ៉ូទឹក ឬកម្ពស់ទឹកនៅតំបន់នោះផ្ទាល់ ហើយដាច់ខាតមិនគួរប៉ាន់ប្រមាណឯកងងឡើយ។ ព័ត៌មាននេះ លោកអាចស្នើសុំពីក្រសួងធនធានទឹក និងឧតុនិយម ដើម្បីដឹងពីកម្ពស់ទឹករាល់ឆ្នាំ ឬទឹកជន់នៅតំបន់ណាមួយនោះ។ ចំពោះការចំណាយដើម្បីបានព័ត៌មានក៏អាចមានខ្លះផងដែរ។

២. សង់ជញ្ជាំងទប់ដី

ជញ្ជាំងទប់ដី ត្រូវរៀបឥដ្ឋ ២០ មានជើងសសរទេរសងខាងនៅជាប់មាត់ទឹក។ ជញ្ជាំងទប់ដីនេះ ការពារកុំឲ្យទឹកបុកធ្វើឲ្យស្រុតដីនៅមាត់ជ្រាំង។ យ៉ាងណាមិញ លោកអ្នកក៏គួរតែដឹងថាមាត់ទឹកត្រង់ណាដែលជាកន្លែងកាត់ជ្រុង គឺមិនគួរសង់ផ្ទះនោះទេ ព្រោះទឹកបើហូរទៅបុកនៅកន្លែងជ្រុងនោះ វានឹងងាយបាក់ ជាងហូរតាមបណ្ដោយទឹក។ ឧទាហរណ៍ ទឹកទន្លេដែលមានមុខបួន បើទឹកហូរកាត់នៅជ្រុងណាមួយ ដីនៅកន្លែងនឹងឆាប់ស្រុត។

៣. ចម្ងាយសង់ផ្ទះពីមាត់ទឹក

ជាទូទៅ ចម្ងាយសុវត្ថិភាពដែលលោកអ្នកគួរសង់ផ្ទះពីមាត់ទឹក គឺយ៉ាងហោចណាស់ ១០ម៉ែត្រឡើងទៅ។ ប៉ុន្តែលោកអ្នកមិនគួររំលង អ្នកបច្ចេកទេសមកជួយមើលស្ថានភាពដីដែលគ្រោងនឹងសង់នោះផងដែរ ដូចរៀបរាប់ខាងលើអ៊ីចឹង ដីល្អទាល់តែខួងឲ្យដល់ដីធម្មជាតិមានថ្ម ទើបអាចសង់បាន។

៤. បុកគ្រឹះ

ពេលចាប់ផ្ដើមដល់ការបុកគ្រឹះ នៅចំណុចនេះ លោកអ្នកក៏គួរស្វែងរកអ្នកជំនាញស្ថាបត្យករ ឬវិស្វករ ឬក្រុមហ៊ុនសិក្សាគុណគូជម្រាលមាត់ទឹកសិន ព្រោះថាតំបន់ជាប់មាត់ទឹកងាយនឹងបាក់ដី វាអាចបាក់នៅជិតឬ ឆ្ងាយពីមាត់ទឹកដោយយថាហេតុ។ ដូច្នេះ ការសិក្សាមេគុណជម្រាលមាត់ទឹក គឺសំខាន់ ដើម្បីការពារផ្ទះមានលំនឹងយូរអង្វែង។

៥. ទំហំផ្ទះ

សម្រាប់ផ្ទះរស់នៅលក្ខណៈគ្រួសារទូទៅអាចសង់បាន ប៉ុន្តែបើទំហំសំណង់ដល់ទៅរាប់ពាន់ម៉ែត្រការ៉េ គួរសិក្សាជាមួយអ្នកជំនាញជាមុនសិន៕

អត្ថបទ៖ ស៊ិន សាវ៉េត