អូនម៉ី មិនភ័យសង្សារជានិស្សិតវ័យក្មេងប្រច័ណ្ឌ ពេលថតឈុតឱបថើប
- 2018-09-04 02:05:11
- ចំនួនមតិ 0 | ចំនួនចែករំលែក 0
អូនម៉ី មិនភ័យសង្សារជានិស្សិតវ័យក្មេងប្រច័ណ្ឌ ពេលថតឈុតឱបថើប
ចន្លោះមិនឃើញ
តារាសម្ដែង អៀ ម៉េងលិ ហៅអូន ម៉ី មានសង្សារជានិស្សិតកំពុងសិក្សានៅប្រទេសឥណ្ឌា ដោយបានស្រលាញ់គ្នាអស់ពេលជាងមួយឆ្នាំមកហើយ។ តួឯកក្នុងរឿង "មរតកបេះដួង" ប្រាប់ថា គូស្នេហ៍របស់ខ្លួន ថ្វីត្បិតមានវ័យក្មេងទើប២១ ឆ្នាំ ពិតមែន តែអត្តចរិតល្អ និងមិនដែលរករឿង ឈ្លោះប្រច័ណ្ឌឡើយ ពេលឃើញនាងសម្ដែងមានឈុតស្និទ្ធស្នាលជាមួយតួប្រុស។
តារាស្រីនិយមតែងខ្លួនសិចស៊ី បន្តថា អាចចាត់ទុកថា ជាសំណាងមួយសម្រាប់រូបនាងផ្ទាល់ ព្រោះសង្សារបណ្ដូលចិត្តម្នាក់នេះ ទុកសិទ្ធិសេរីភាព ឲ្យតម្លៃនិងផ្ដល់កិត្តិយស ព្រមទាំងស្រលាញ់ក្រុមគ្រួសាររបស់ អូនម៉ី ណាស់។ ចំពោះការសម្ដែងវិញ រឹតតែមិនដែលរញ៉េរញ៉ៃដាក់គ្នា ព្រោះដឹងថា នោះគ្រាន់ជាការការងារប៉ុណ្ណោះ។ អូន ម៉ី ទម្លាយថា តាមពិតគូស្នេហ៍ខ្លួន គ្មានរថយន្ត ទ្រព្យស្តុកស្ដម្ភនោះឡើយ ហើយមានបុរសជាកូនអ្នកមានជាច្រើនតាមស្រលាញ់ តែអូន ម៉ី មិនខ្វល់ សុខចិត្តប្រគល់ក្ដីស្រលាញ់ឲ្យសង្សារម្នាក់នេះ ក៏ព្រោះអត្តចរិតល្អបែបនេះហើយ។ រីឯ ចាស់ទុំទាំងសងខាងវិញ ក៏ពេញចិត្ត និងដឹងឮពីទំនាក់ទំនងអ្នកទាំងពីរដែរ។
ទោះជាមានការចុះសម្រុងគ្នាបានល្អ និងយល់ចិត្តថ្លើមគ្នាបែបនេះក្ដី តែអូន ម៉ី បញ្ជាក់ថា មិនទាន់មានគម្រោងភ្ជាប់ពាក្យភ្លាមៗនោះទេ ដោយរង់ចាំមើលចិត្តគ្នាបន្តទៀតសិន។ អូន ម៉ី ប្រាប់ថា បើសិនជាខ្លួនចូលរោងការមែននោះ ប្រហែលជាសិល្បៈត្រូវទុកចោលមួយឡែកសិន ដើម្បីមានពេលរៀបចំជីវិតគ្រួសារឲ្យបានល្អ៕