កម្រឃើញបំផុត! ទិដ្ឋភាពដង្ហែព្រះសិរីរិកធាតុ ព្រះបាទ ស៊ីសុវត្ថិ មុនីវង្ស ឆ្ពោះទៅភ្នំព្រះរាជទ្រព្យ

2018-09-04 06:59:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្ងៃទី០៣ ខែកញ្ញា ២០១៨ គឺជាខួបទី ៧៧ ឆ្នាំនៃព្រះរាជពិធីយាងព្រះបរមអដ្ឋិ ព្រះករុណា ព្រះបាទសម្តេចព្រះ ស៊ីសុវត្ថិ មុនីវង្ស ព្រះខត្តិយកោដ្ឋ ស្តេចយាងគង់ប្រថាប់ក្នុងព្រះមហាចេតិយលើភ្នំព្រះរាជទ្រព្យ។

តាមទំព័រហ្វេសប៊ុក Royal du Cambodge ឲ្យដឹងថា បន្ទាប់ពីការយាងចូលព្រះទីវង្កតនៃ ព្រះករុណា ព្រះបាទសម្ដេចព្រះ ស៊ីសុវត្ថិ មុនីវង្ស ព្រះខត្តិយកោដ្ឋ នាថ្ងៃទី២៤ ខែមេសា ឆ្នាំ១៩៤១ រួចមក ព្រះរាជាណាចក្រកម្ពុជាដែលមានព្រះករុណា ព្រះបាទសម្តេចព្រះ នរោត្តម សីហនុ ជាព្រះមហាក្សត្រថ្មី បានរៀបចំចាត់ចែង ព្រះរាជពិធីបុណ្យថ្វាយព្រះសពព្រះករុណា ព្រះបាទសម្តេចព្រះ ស៊ីសុវត្ថិ មុនីវង្ស តាមព្រះរាជបវេណីនៃព្រះនគរ យ៉ាងសមព្រះកិត្តិយសជាទីបំផុត ។

ក្រោយពីបានរៀបចំថ្វាយព្រះអគ្គី ព្រះបរមសព រួចមកនាថ្ងៃពុធ ទី៣ ខែកញ្ញា ឆ្នាំ១៩៤១ ព្រះបរមអដ្ឋិរបស់ព្រះអង្គ ក៏ត្រូវបានរៀបចំព្រះរាជពិធីយ៉ាងអធិកអធមដង្ហែមកគង់ឯព្រះមហាចេតិយ ដែលបានកសាងនាកំពូលភ្នំព្រះរាជទ្រព្យ។

ព្រះមហាក្សត្រថ្មីនៃប្រទេសកម្ពុជា ព្រះករុណា ព្រះបាទសម្ដេចព្រះ នរោត្ដម សីហនុ ព្រះអង្គសព្វព្រះរាជហឫទ័យ ស្តេចយាងជាព្រះរាជាធិបតីដ៏ខ្ពង់ខ្ពស់បំផុត ដោយព្រះអង្គជាអ្នកយាងព្រះកោដ្ឋពេជ្រដោយផ្ទាល់ព្រះអង្គនៅក្នុងព្រះរាជពិធី រួមជាមួយឧត្ដមនាវីឯកបារាំងប្រចាំឥណ្ឌូចិន លោក ហ្សង់ ដេកូ (Jean Decoux) ដែលបានយាងព្រះកោដ្ឋ ព្រះរាជានុកោដ្ឋ ដែលជាព្រះវររាជបិតានៃព្រះករុណា ព្រះបាទសម្ដេចព្រះ ស៊ីសុវត្ថិ មុនីវង្ស និង ព្រះកោដ្ឋព្រះបរមរាជវង្សានុវង្សជាច្រើនទៀត ស្ដេចយាងមកតម្កល់រួមគ្នា៕