ហេតុផលខ្លះៗធ្វើឲ្យតារា៤ដួង សុខចិត្តធ្វើរឿងដដែលក្នុងជីវិតសិល្បៈរបស់ខ្លួន

2018-10-16 04:04:21
ចំនួនមតិ 0 | ចំនួនចែករំលែក 0

ចន្លោះមិនឃើញ

បើនិយាយពីភាពល្បីល្បាញ តារា៤ដួងខាងក្រោមនេះ បានសាងប្រជាប្រិយភាពខ្លាំងណាស់ក្នុងជីវិតសិល្បៈរបស់ខ្លួន ដើម្បីឲ្យទស្សនិកជនជាច្រើនបានស្គាល់។ ប៉ុន្តែរយៈអំឡុងប្រឡូកសិល្បៈយ៉ាងជោគជាំច្រើនឆ្នាំ តារាល្បី៤ដួង បានធ្វើឲ្យអ្នកគាំទ្រ ឃើញថា សុខចិត្តធ្វើរឿងដដែលឡើងវិញសំខាន់មួយ ដើម្បីសិល្បៈ។

សាន ផានិត ថត MV បទ "ជាប់រវល់" ឡើងវិញ

តារាចម្រៀងរូបនេះ បានធ្វើឲ្យអ្នកគាំទ្រងឿងឆ្ងល់នៅពេលលោកប្រកាសថា ឈប់ច្រៀងបទចម្លងពីគេទៀតហើយ តែបែរជាសម្រេចថត MV បទ "ជាប់រវល់" ដែលធ្លាប់ល្បីកាលជាង១០ឆ្នាំមុនទៅវិញ។ ហេតុផល ព្រោះបទចម្រៀងនេះជាបទល្បីមួយដែលធ្វើឲ្យលោកមានកេរ្តិ៍ឈ្មោះ ហើយតារាចម្រៀងមានរបរលក់សម្លៀកបំពាក់នៅខេត្តមណ្ឌលគិរី បានរៀបចំ Melody ថ្មី បូករួមនឹងបច្ចេកទេសថត MV ដែលលោកអះអាងថា វាបានក្លាយជាបទចម្រៀងថ្មីទាន់សម័យ ។ លើសពីនេះ លោកក៏បានច្នៃ Melody បទចម្រៀង "ទូរស័ព្ទប្រាប់ផង" ដោយចេញជា Audio ថ្មី កាលពីឆ្នាំមុនទៀតផង។

ការបញ្ចេញបទចម្រៀងចាស់ៗ មកច្នៃ Melody ថ្មី ត្រូវបានលោក សាន ផានិត ធ្លាប់ប្រាប់ថា ជាអ្វីដែលអ្នកគាំទ្រជាច្រើនចង់បាន ព្រោះជាបទចម្រៀងប្រចាំត្រកូលរបស់លោក ដែលបទនេះធ្វើឲ្យគេស្គាល់លោកក្នុងពិភពសិល្បៈ។

សុគន្ធ និសា វិលចូលផលិតកម្មចាស់

តារាចម្រៀងស្រគត់ស្រគុំរូបនេះ ក៏បានសាងភាពដដែលនៅក្នុងជីវិតប្រឡូកក្នុងសិល្បៈជាង១០ឆ្នាំរបស់ខ្លួន ដោយចាកចេញពីហង្សមាសទៅថោន តែក្រោយមកក៏វិលមកទ្រនំចាស់វិញ។ គ្រានោះ ការចាកចេញពីហង្សមាសរបស់ម្ចាស់បទ "បើស្រលាញ់ម្ដេចទុកអូនចោល" ត្រូវបានគេលិចលឺថា ព្រោះសុគន្ធ និសា ចង់បែកគ្នាជាមួយអតីតសង្សារ ទើបមិនចង់ធ្វើការជួបមុខគ្នានាំសៅហ្មង ប៉ុន្តែគ្មានបញ្ហាទើសចិត្តគ្នាជាមួយខាងផលិតកម្មឡើយ។

ចំពោះការវិលមកវិញ ក៏តារារូបនេះត្រូវរងពាក្យចចាមអារ៉ាមម្ដងទៀត តែលោក សុខ ជំនោរ បានចេញមុខអះអាងថា ការត្រលប់មកវិញរបស់និសា គឺខាងហង្សមាសបានសាកសួរតារារូបនេះ ឲ្យត្រលប់មកវិញដោយផ្ទាល់ ។ គ្មានពាក់ព័ន្ធមូលហេតុ ព្រោះលោកចេញពីហង្សមាស ទើបនិសាចង់មកវិញនោះទេ ដោយសារលោកបានចេញរយៈ ពេល៥ខែទៅហើយ ទើបលឺដំណឹងថា និសា ត្រលប់មកវិញ។

មាស សាលី ថត MV បទ "អង្គរក្សបេះដូង" ឡើងវិញ

មិនខុសពីលោក សាន ផានិត ដែរ តារាចម្រៀងដុះស្លែនៅផលិតកម្មសាន់ដេ បានសម្រេចថត MV បទ "អង្គរក្សបេះដូង" ឡើងវិញ ជាបទល្បីកាលពីជាង១០ឆ្នាំមុន។ ពេលនោះ គេបាននិយាយថា ការធ្វើបែបនេះ គ្រាន់តែជាកាដូលួងចិត្តសម្រាប់លោក មាស សាលី ប៉ុណ្ណោះ ទោះអវត្តមានរបស់កំពូលតារាចម្រៀង ខេមរៈ សិរីមន្តពីសាន់ដេក៏ដោយ ក៏តារារូបនេះទំនងពិបាកស្តាភាពលេចធ្លោក្នុងពិភពសិល្បៈជាថ្មីម្ដងទៀត។

ប៉ុន្តែសម្រាប់តារាដែលគេច្រលំថាមានកូនរួចហើយ ប្រាប់ថា នេះជាអ្វីដែលអ្នកគាំទ្ររបស់លោកទទូចចង់បាន ដោយ Fan ជាច្រើនបានសំណូមពរឲ្យលោកយកបទចម្រៀងល្បីពីមុន មកថតឡើងវិញ។

កែវ វាសនា ត្រលប់មកទ្រនំចាស់

តារារូបនេះ មិនខុសពីអ្នកនាង សុគន្ធ និសា ដែរ លោកបានចេញពីសាន់ដេទៅថោន ហើយថ្មីៗនេះបានងាកមកទ្រនំចាស់របស់ខ្លួនវិញ យ៉ាងភ្ញាក់ផ្អើល។ ម្ចាស់បទ "នឹកមនុស្សម្នាក់មិនបានស្រលាញ់" ទម្លាយការពិតថា ដោយសារតែ កែវ វាសនា ចង់បានបទពិសោធន៍ថ្មីបន្ថែមពីផលិតកម្មចាស់។ ម្យ៉ាងទៀតលោក បានផុតកុងត្រាជាមួយថោន ទើបសម្រេចដើរចេញតែម្ដងទៅ មិនមានរឿងអាក់អន់ចិត្តឬបញ្ហាអ្វីជាមួយគ្នាឡើយ។

លើសពីនេះ លោកបញ្ជាក់ថា ខាងថោនក៏រីករាយចំពោះការសម្រេចចិត្តនេះ ឯខាងសាន់ដេវិញក៏ពេញចិត្តទទួលលោកត្រឡប់ទៅវិញដែរ។ លោកប្រាប់ថា បានចុះកុងត្រាថ្មីនៅសាន់ដេរយៈពេល ២ឆ្នាំ ៕

អត្ថបទ៖ លឹម សុនា