Vertu ងើបពីផ្នូរវិញ ប្រកាសចេញទូរសព្ទប្រណិតតម្លៃជាង ៥ ពាន់ដុល្លារ

2018-10-18 08:03:12
ចំនួនមតិ 0 | ចំនួនចែករំលែក 0

ចន្លោះមិនឃើញ

អស់រយៈពេលជាងមួយឆ្នាំមកហើយ ដែល Vertu បានបិទដំណើរការដោយសារបំណុលវ័ណ្ឌក។ ប៉ុន្តែពេលនេះ Vertu ហាក់ដូចបានរស់រានមានជីវិតម្ដងទៀត ដោយប្រកាសចេញស្មាតហ្វូនប្រណិតថ្មីតម្លៃនៅតែថ្លៃដូចមុន។

ស្មាតហ្វូនថ្មីដែលកើតចេញពីក្រុមហ៊ុនដែលបានដោះស្រាយបញ្ហារួចនោះ មានឈ្មោះថា Vertu Aster P។ ស្មាតហ្វូននេះមានលក្ខណៈសម្បត្តិមិនខ្លាំងប៉ុន្មាននោះទេ ប៉ុន្តែផលិតឡើងដោយដៃផ្ទាល់នៅអង់គ្លេស និងមានប្រើប្រាស់វត្ថុធាតុដើមថ្លៃៗដូចជាតួខ្លួនធ្វើពីទីតាញ៉ូម និង ផ្នែកខាងក្រោយស្រោបដោយស្បែកក្រពើ។

Vertu Aster P មានប្រើបន្ទះឈីប Qualcomm Snapdragon 660, អេក្រង់ប្រភេទ AMOLED ទំហំ ៤,៩ អ៊ីញ មានការពារដោយកញ្ចក់ត្បូងកណ្ដៀង ដែលអាចបង្ហាញរូបក្នុងកម្រិត ១៩២០ x ១០៨០ ភីកសែល។ RAM មានទំហំ ៦ GB និងអង្គផ្ទុកទិន្នន័យទំហំ ១២៨ GB។

ស្មាតហ្វូននេះមានថ្មទំហំ ៣២០០ mAh និងរន្ធសាកថ្មប្រភេទ USB Type-C, កាមេរ៉ាមុខកម្រិត ២០ MP និងកាមេរ៉ាក្រោយទំហំ ១២ MP ហើយអាចដាក់ស៊ីមបានពីរឯណោះ។

ត្បិតថាស្មាតហ្វូន Vertu ថ្មីផលិតដោយដៃនៅអង់គ្លេស ប៉ុន្តែខណៈពេលនេះមានលក់ផ្ដាច់មុខតែនៅប្រទេសចិនជាមួយតម្លៃចន្លោះពីប្រមាណ ៥ ១៦០ ដុល្លារ ទៅប្រមាណ ១៤ ០០០ ដុល្លារ អាស្រ័យលើការចង់បានរបស់អតិថិជន៕

ប្រភព៖ gizmochina ប្រែសម្រួល៖ សុខហេង