រទេះរុញបិតារូបវិទ្យា Stephen Hawking មានអ្នកដេញថ្លៃឈានដល់តម្លៃកំពូលមួយហើយ

2018-11-01 11:33:37
ចំនួនមតិ 0 | ចំនួនចែករំលែក 0

ចន្លោះមិនឃើញ

Stephan Hawking ត្រូវបានស្គាល់ជាបិតារូបវិទ្យាដ៏ល្បីឈ្មោះមួយរូប ប៉ុន្តែសោកស្ដាយលោកបានទទួលមរណភាពកាលពីខែមិនាឆ្នាំ ២០១៨ កន្លងទៅក្នុងវ័យ ៧៦ ឆ្នាំ។ មិនជារឿងចម្លែកថ្វីបើរូបកាយបានលាចាកលោក ប៉ុន្តែរាល់ចំណេះនិងរបស់របរជាច្រើនក៏ត្រូវបានបន្សល់ទុកសម្រាប់មនុស្សជំនាន់ក្រោយ។

ក្នុងកម្មវិធីដេញថ្លៃរបស់ Christie នាដើមខែវិច្ឆិកានេះ មានរបស់របរប្រើប្រាស់របស់អ្នកវិទ្យាសាស្ត្រដែលបានបាត់បង់ជីវិតជាច្រើន ត្រូវបានយកមកដេញថ្លៃ ដោយក្នុងនោះក៏មានដូចជាស្គ្រីបផ្ទាល់ខ្លួនរបស់លោក Hawking ទាក់ទងនឹងភាពយន្ត The Simpsons ជាមួយពានរង្វាន់ អាវធំ និងសូម្បីតែរទេះរុញលោកធ្លាប់ជិះអស់ជាច្រើនឆ្នាំកន្លងមក។

សម្រាប់រទេះរុញដ៏ពិសេសនោះបំពាក់នូវម៉ូទ័រអគ្គិសនីនិងឧបករណ៍បញ្ជាដោយដៃ ជាហេតុជំរុញឲ្យមានការដេញថ្លៃឡើងដល់ ២៥ ០០០ ដុល្លារ គិតត្រឹមពេលបច្ចុប្បន្ន ហួសពីតម្លៃរំពឹងទុកថាអាចទទួលបានត្រឹម ១៩ ០០០ ដុល្លារតែប៉ុណ្ណោះ។ ចំណូលនេះសោតក៏នឹងបរិច្ចាគចូលទៅក្នុងកម្មវិធីសប្បុរសធម៌ Stephen Hawking Foundation និង Motor Neuron Disease Association ដែលលោក Hawking ធ្លាប់បានយកចិត្តទុកដាក់ខ្លាំងបំផុតកាលនៅមានជីវិត។