ទស្សនីយភាពខ្សែភាពយន្តបង្ហាញពីជីវិតពិត និងប្រវត្ដិសាស្រ្ត ផលិតដោយផលិតកម្មដើមត្នោត​របស់លោក ឆាយ បូរ៉ា បានធ្វើឱ្យទស្សនិកជនខ្មែរជាច្រើ់ននាក់ចង់ទស្សនាសារជាថ្មី។ នេះបើតាមការលើកឡើងរបស់ លោក ឆាយ បូរ៉ា អតីត ប្រធានសមាគមភាពយន្តកម្ពុជា។

លោក ឆាយ បូរ៉ា បានប្រាប់ Sabay ឱ្យដឹងថា ភាពយន្តរឿង «ឃ្លាតទៅសែនឆ្ងាយ» ចាក់បញ្ចាំងលើកទីមួយក្នុងឆ្នាំ ២០១២ ដែលកាលនោះមានរោងភាពយន្តទំនើបតែមួយ គឺរោងភាពយន្ត ផ្លេតទីនឹម ផ្សារសូរិយា ដែលបច្ចុប្បន្នក្លាយជារោងភាពយន្ត Major Cineplex by Smart ស្ថិតនៅផ្សារសូរិយា Center Point។

កាលចាក់បញ្ចាំងក្នុងឆ្នាំ ២០១២​ ភាពយន្ត «ឃ្លាតទៅសែនឆ្ងាយ» ទទួលបានទស្សនិកជនទស្សនាគ្រប់វ័យ ដែលមានអ្នកមកបន្តទស្សនាពេញរោងភាពយន្តរយៈ ៤៥ ថ្ងៃ ដែលធ្វើឱ្យភាពយន្តជារឿងដ៏ជោគជ័យ​លើកដំបូងរបស់លោក ឆាយ បូរ៉ា។

ភាពយន្តបែបមនោសញ្ចេតនា ស៊ីជម្រៅស្នេហារវាងម្តាយ និងកូន បានក្លាយជាស្នាដៃដែលទទួលបានពានរង្វាន់ជាច្រើនទាំងក្នុងស្រុក និងអន្តរជាតិ ហើយក៏បានធ្វើឱ្យលោក ឆាយ បូរ៉ា ក្លាយជាផលិតករភាពយន្តដំបូងរបស់ខ្មែរដែលជោគជ័យ និងជាគំរូដល់ផលិតករជំនាន់ក្រោយជាច្រើននាពេលបច្ចុប្បន្ន។

ក្នុងថ្ងៃទី ២១ ខែ វិច្ឆិកា ឆ្នាំ ២០១៨ នេះ ភាពយន្តរឿង «ឃ្លាតទៅសែនឆ្ងាយ» នឹងបង្ហាញវត្តមានម្តងទៀត​នៅគ្រប់រោងភាពយន្តក្នុងទីក្រុងភ្នំពេញ និងទៅតាមខេត្តផ្សេងៗទៀត តាមការស្នើរសុំរបស់អ្នកគាំទ្រភាពយន្ត​បែបខ្មែរ មានគុណភាព និងអត្ថន័យជ្រាលជ្រៅ​របស់លោកឆាយ បូរ៉ា៕

ចង់ដឹងច្បាស់ សូមទស្សនាវិដេអូខ្លី រឿង «ឃ្លាតទៅសែនឆ្ងាយ» ខាងក្រោម៖

អត្ថបទ៖ Sunny