Corolla ស៊េរី ២០២០ ចេញជាផ្លូវការ រូបរាងថ្មីទាំងស្រុង

2018-11-16 06:41:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីបានបញ្ចេញរថយន្ត Corolla ស៊េរីថ្មីជាប្រភេទ Hatchback និង Wagon រួចមក នៅពេលនេះ Toyota បានបង្ហាញរថយន្ត Corolla ប្រភេទ Sedan មួយទៀតដែលមានរូបរាងថ្មីទាំងស្រុង ខុសប្លែកពីជំនាន់មុន។

រថយន្ត Corolla ប្រភេទ Sedan នេះបានបង្ហាញខ្លួនជាផ្លូវការក្នុងកម្មវិធី Guangzhou International Auto Show ដែលធ្វើឡើងក្នុងប្រទេសចិននាថ្ងៃនេះ។ រថយន្តនេះមានចែកចេញជាពីរដោយសម្រាប់លក់នៅប្រទេសចិននឹងប្រើឈ្មោះ Levin ចំណែកប្រភេទទុកលក់លើទីផ្សារដទៃទៀតនឹងប្រើឈ្មោះ Corolla ធម្មតា។

រូបរាងរបស់ Corolla ប្រភេទ Sedan ស៊េរីឆ្នាំ ២០២០ នេះ គឺមានភាពស្រស់ស្អាតមិនខុសពីប្រភេទ Hatchback ដែលគ្រប់គ្នាឃើញកន្លងមកនោះទេ ហើយផ្នែកខាងក្នុងក៏មិនខុសគ្នាប៉ុន្មានដែរ។ ទាក់ទងប្រព័ន្ធម៉ាស៊ីនវិញ មិនមានព័ត៌មានលម្អិតច្រើននោះទេ ប៉ុន្តែគេដឹងថាមានប្រើម៉ាស៊ីនចំណុះ ២,០ លីត្រ និងមានជាប្រភេទ Hybrid សម្រាប់លក់លើទីផ្សារមួយចំនួន។

រថយន្តនេះនឹងលក់នៅសហរដ្ឋអាមេរិក និងអឺរ៉ុបមុនគេនៅអំឡុងត្រីមាសទី ២ ឆ្នាំ ២០១៩ ខាងមុខ បន្ទាប់មកទើបចេញលក់នៅទីផ្សារចំនួន ១៥០ ផ្សេងទៀតនៅអំឡុងឆមាសទី ២ ឆ្នាំ ២០១៩។ ចំពោះតម្លៃលក់មិនទាន់បង្ហាញចេញនៅឡើយទេ៕