លី ច័ន្ទសីហា បើកចិត្តទម្លាយប្រាក់ចំណូលរកបានក្នុងមួយខែៗ ពីមុខជំនួញទាំង៣

2018-11-20 04:20:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីក្លាយជាថៅកែស្រីលើមុខជំនួញជាបន្តបន្ទាប់ ពេលនេះ តារាសម្ដែង លី ច័ន្ទសីហា បានបង្ហើបពីប្រាក់ចំណូលក្នុងមួយខែៗ ដែលខ្លួនខំប្រឹងប្រែងជាយូរមកហើយ។

ក្ដោបក្ដាប់ជំនួញ៣ ដូចជាសម្អាងការ ហាងលក់ផលិតផលរក្សាសម្រស់ និងមានភាគហ៊ុនលើរបរលក់ដីឡូតិ៍ប្រើទុនជាង៥០ម៉ឺនដុល្លារនៅខេត្តកណ្ដាល អ្នកម្ដាយកូន១ ប្រាប់ថា ជាមធ្យមបើបូកសរុប លើរបរទាំងបីនេះចូលគ្នា អាចរកបាន ៥ពាន់ដុល្លារ ក្នុងមួយខែ។ ក្រោយពីស្ងប់ស្ងាត់ការងារសិល្បៈ បន្ទាប់ពីរៀបអាពាហ៍ពិពាហ៍ជាមួយមន្ត្រីយោធា ច័ន្ទ ថៃសេង តារារូបនេះ ច្រើនយកពេលពេលវេលាទៅពង្រឹងលើមុខជំនួញ ដោយពេលនេះកំពុងគិតគូចង់បើកភោជនីយដ្ឋាន មួយកន្លែងទៀត។ តែចំពោះរបរថ្មីនេះ តារាទឹកភ្នែកមិនទាន់កំណត់ទីតាំង ឬ ត្រូវចំណាយដើមទុនប៉ុន្មានម៉ឺនដុល្លារនោះទេ ព្រោះចង់រៀបចំគម្រោង ឲ្យបានច្បាស់លាស់ជាងនេះសិន។

តារាស្រីកើតក្នុងទីក្រុងភ្នំពេញ ឲ្យដឹងថា ប្រាក់ចំណូលបានពីការរកស៊ីមិនទៀងទាត់នោះទេ ព្រោះពេលខ្លះរកបានមួយ អត់មួយ តែអាចទប់គ្នាទៅមក គ្រាន់បង្វិលដើមទុនចុះឡើង។ លី ច័ន្ទសីហា ប្រាប់ថា នាងជាមនុស្សងប់ងុលលើការបើកមុខជំនួញខ្លាំងណាស់ ទោះពេលនេះមមាញឹកលើរបររកស៊ី ៣កន្លែងនេះ ស្ទើរគ្មានពេលថែទាំកូនស្រីក៏ដោយ តែអ្នកនាងនៅតែចិញ្ចឹមចិត្ត ចង់បន្ថែមមុខជំនួញទៀត ៕

អត្ថបទ៖ លឹម សុនា