ក្បាច់គុនផ្លាស់ប្តូរ ឯម សុវណ្ណារី ឲ្យឈប់ខ្មាសអៀន

2018-12-04 03:32:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ជើងខ្លាំងខ្មែរ-អាមេរិករូបនេះ រាល់ពេលត្រូវចូលក្នុងទ្រុងម្ដងៗ គាត់តែងតែបង្ហាញពីភាពស្វាហាប់ និងមានភាពជឿជាក់ខ្លាំង។ ប្រសិនបើលោកអ្នកបានមើលកីឡាការិនី ONE Championship ឯម សុវណ្ណារី ពេលហ្វឹកហាត់ និងឡើងប្រកួតម្ដងៗ យើងមិននឹកស្មានថាគាត់ចេះភ័យខ្លាច និងមានការខ្មាសអៀនខ្លាំងពីមុនឡើយ។

ថ្វីបើកីឡាការិនីវ័យ ២៦ឆ្នាំងរូបនេះ មើលទៅមានភាពជឿជាក់ខ្លាំងក្នុងការប្រឈមមុខជាមួយដៃគូ អ៊ុយក្រែននេះមែន ប៉ុន្តែរាល់ពេលដែលនាងត្រូវចូលក្នុងសង្វៀនប្រកួត អ្វីដែលនាងពិបាកគ្រប់គ្រងជាងគេនោះ គឺស្មារតីនឹងធឹងតែម្ដង។ នាងសារភាពថា៖ «ក្បាច់គុនគឺជាផ្នែកដ៏សំខាន់មួយរបស់ខ្ញុំ មកពីជាធម្មតាខ្ញុំអៀនច្រើន ហើយមិនចូលចិត្តប្រឈមមុខជាមួយនរណាម្នាក់ទេ និយាយទៅ ខ្ញុំមិនសូវហ៊ានតែម្ដង។ ប៉ុន្តែពេលគេឲ្យឡើងសង្វៀន ឬក្នុងទ្រុងម្ដងៗ ចង់ឬមិនចង់ក៏ត្រូវបង្ខំខ្លួនឯងឲ្យសម្រុកចូលដែរ»។

ការតាំងចិត្តជម្នះលើខ្លួនឯងរបស់ សុវណ្ណារី ត្រួសត្រាយផ្លូវក្នុងអាជីពជាអ្នកប្រដាល់របស់ខ្លួនរហូតដល់បានជោគជ័យក្នុងវិស័យក្បាច់គុនធំជាងគេនៅអាស៊ី ដែលនាង រួមជាមួយកីឡាករល្បីល្បាញម្នាក់ទៀតរបស់កម្ពុជា ចាន់ រតនា នឹងត្រូវឡើងតំណាងឲ្យប្រទេសកម្ពុជានាពេលឆាប់ៗនេះ។

រស់នៅជិតកូនស្រីរបស់សង្សារនាង រឹតតែជួយឲ្យនាងបានយល់កាន់តែច្បាស់ពីភាពវិជ្ជមាននៃក្បាច់គុនដែលជួយជាគ្រឹះសំខាន់ក្នុងជីវិតមនុស្សម្នាក់ មិនប្រកាន់អាយុឡើយ។ ដោយមើលឃើញពីអត្ថប្រយោជន៍ល្អៗ ថ្មីៗនេះ នាងបានចាប់ដៃជាមួយជើងខ្លាំងខាងគុនចម្រុះ Yves Edwards ដែលពីរនាក់គាត់បានសរសេរបោះពុម្ពផ្សាយសៀវភៅសម្រាប់ក្មេងៗ ដែលជាមេរៀនគ្រឹះដ៏មានតម្លៃ។ កីឡាការិនីរូបនេះ មានបំណងមកផ្សារភ្ជាប់ឡើងវិញក្នុងនាមជាឈាមខ្មែរមួយរូប ហើយក៏ចង់ចែករំលែកបទពិសោធន៍ផងដែរ ថាក្បាច់គុនបានជំរុញនាងឲ្យឈប់ភ័យខ្លាច និងខ្មាសអៀនបាន។

សូមបញ្ជាក់ដែរថា កីឡាការិនី ឯម សុវណ្ណារី របស់កម្ពុជានឹងត្រូវប្រកួតគុនចម្រុះ MMA ជាមួយអ្នកប្រដាល់មកពីប្រទេស អ៊ុយក្រែន Iryna “Delsa” Kyselova លើប្រភេទទម្ងន់ ៦១គីឡូ ក្នុងកម្មវិធីធំលំដាប់អន្តរជាតិ ONE: DESTINY OF CHAMPIONS ឯទីក្រុងកូឡាឡាំពួរ ប្រទេសម៉ាឡេស៊ី ថ្ងៃទី៧ ខែធ្នូ ២០១៨៕

អត្ថបទ៖ Matias Andres