មើលហើយស្រណោះ វីដេអូឯកសារស្នាដៃគំនូរផ្ទាំងប៉ាណូភាពយន្ត ឪពុក ឆ័យលី ដាឡែន មុនទទួលមរណភាព

2018-12-04 09:47:02
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក មឿន ឆៃ ឪពុកតារាចម្រៀង ឆ័យ លីដាឡែន ជាវិចិត្រករ និងជាតន្រ្តីករដ៏ល្បីល្បាញតាំងពីមុខសម័យខ្មែរក្រហមម្ល៉េះ។ បុរសដែលមានស្រុកកំណើតនៅខេត្តបាត់ដំបងរូបនេះជាអ្នកបង្កើតផ្ទាំងប៉ាណូភាពយន្តសម័យសម្រាប់ផ្សព្វផ្សាយក្នុងរោងកុនស្ទើររាប់មិនអស់។

រូបភាពពីវីដេអូឯកសារ រឿង បុរសផ្ទាំងប៉ាណូ

តែជាអកុសល កាលពីយប់ថ្ងៃទី ២៧ ខែ វិច្ឆិកា វេលាម៉ោង ១០ និង២០នាទី លោក មឿន ឆៃ បានលាចាកលោក ដោយសារជំងឺគាំងបេះដូងក្នុងស្រុកកំណើតខេត្តបាត់ដំបង ក្នុងជន្មាយុ ៦៨ ឆ្នាំ ។ ដំណឹងដ៏ក្រៀមក្រំនេះ បានធ្វើឱ្យសមាជិកក្រុមគ្រួសារលោក មឿន ឆៃ ពិសេសអ្នកនាង ឆ័យ លីដាឡែន ទទួលយកមិនបាន ហើយក៏ជាការសោកស្តាយនូវការបាត់បង់ធនធានមនុស្ស និងជាសាក្សីប្រវត្តិសាស្រ្តលើវិស័យភាពយន្តខ្មែរម្នាក់ផងដែរ។

គួររម្លឹកថា លោក មឿន ឆៃ បានប្រកបអាជីពជាអ្នកគូរផ្ទាំងគំនូរប៉ាណូភាពយន្ត នេះប្រមាណជាង ៤០ឆ្នាំមកហើយគឺតាំងពីឆ្នាំ ១៩៦៨ ហើយក៏ផ្អាកក្នុងឆ្នាំ ១៩៧៥។ បន្ទាប់ពីសម័យ ប៉ុល ពត ដួលរលំទៅ នៅឆ្នាំ ១៩៨០ លោកក៏បានបន្តអាជីពនេះឡើងវិញដោយគូរជាផ្ទាំងប៉ាណូអ៊ុតសក់ កន្លែងកាត់សក់ ជួសជុលម៉ូតូ ជាដើម ជាពិសេសគឺគូរផ្ទាំងប៉ាណូភាពយន្តខ្មែរម្ដងទៀត។

ក៏ប៉ុន្តែដោយសារបច្ចេកវិទ្យាកាន់តែទំនើប ភាពយន្តខ្មែរទីផ្សារ ការងារគូរគំនូរប៉ាណូ ក៏លែងមានចាប់ពីឆ្នាំ ២០០០ ដូច្នេះហើយរូបលោកក៏បន្តការងារជាតន្រ្តីករ ព្រោះនេះក៏ជាទេពកោសល្យរបស់លោកមួយទៀតដែរ។ យ៉ាងណាវិញ ស្នាដៃវិចិត្រសាស្រ្តរបស់លោកត្រូវបានចងក្រងជាវីដេអូឯកសារ ដោយយុវជនមួយក្រុម មកពីដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ កាលពីចុងឆ្នាំ ២០១៦៕

ទោះបីជាលោក មឿន ឆៃ ចែកឋានទៅលោកខាងមុខក៏ពិតមែន តែស្នាដៃរបស់លោកនៅតែមានតម្លៃសម្រាប់កូនខ្មែរជំនាន់ក្រោយ។

ដើម្បីស្វែងយល់ពីការងាររបស់លោក មឿន ឆៃ ក្នុងវិស័យភាពយន្តសូមទស្សនាវីដេអូខាងក្រោម៖

វីដេអូពី Project 3 នៃដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍

អត្ថបទ៖ Sunny