ស្រីស្អាត បេប៊ី បញ្ជាក់ថា នាងមានបញ្ហាផ្ទាល់ខ្លួន ទើបប្រកាសលក់ផ្ទះបន្ទាន់

2018-12-05 03:05:53
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅយប់មិញនេះ ស្រីស្អាត បេប៊ី បានប្រកាសប្រាប់គេឯងថា នាងត្រូវការលក់ផ្ទះបន្ទាន់ ដែលនោះជាផ្ទះរបស់នាងផ្ទាល់ខ្លួនតែម្ដង ធ្វើឲ្យមានការងឿងឆ្ងល់។

ផ្ទះដែលកញ្ញា បេប៊ី ប្រកាសលក់នោះជាប្រភេទផ្ទះល្វែង E0 ដែលមានទីតាំងនៅពោធិចិនតុង យ៉ាងណានាងមិនបានបញ្ជាក់អំពីទីតាំងច្បាស់លាស់នោះទេ។ តារាស្រីបញ្ជាក់ថា នាងសម្រេចដាក់លក់ផ្ទះខាងលើ ក្នុងតម្លៃជាង ៧ម៉ឺនដុល្លារអាមេរិក។ អ្នកគាំទ្រខ្លះកើតមានក្ដីងឿងឆ្ងល់ តើមានរឿងរហូតដល់បេប៊ីប្រកាសលក់ផ្ទះយ៉ាងដូច្នេះ។

ជុំវិញបញ្ហានេះ ស្រីស្រស់ បានបញ្ជាក់ថា ព័ត៌មានដែលប្រិយមិត្តឃើញលើបណ្ដាញសង្គមរបស់នាងនោះ គឺជាការពិត គឺនាងពិតជាត្រូវការលក់ផ្ទះបន្ទាន់ពិតមែន ហើយផ្ទះនោះជារបស់នាងផ្ទាល់។ ចំពោះហេតុផល បេប៊ី បញ្ជាក់ថា ក៏ព្រោះតែនាងធុរៈចាំបាច់មួយចំនួន។ យ៉ាងណា នាងបានបដិសេធ ក្នុងការអធិប្បាយលម្អិតពីបញ្ហានេះ។

នាងលើកឡើងថា៖ "អឹម...ខ្ញុំអាចនិយាយបានត្រឹមតែថា ខ្ញុំមានធុរៈណាបង ប៉ុន្តែខ្ញុំអត់អាចនិយាយអីច្រើនជាងហ្នឹងទេ ព្រោះវាជារឿងដែលអត់អាចនិយាយបាន ដឹងត្រឹមថាខ្ញុំមានធុរៈចឹងណាបង!”។

ជុំ រចនាពេជ្រ ហៅ បេប៊ី គឺជាស្រីស្អាតមួយរូបក្នុងសង្គមសិល្បៈ ក្រៅពីមានរូបឆោមលោមពណ៌ល្អឆើតហើយ នាងត្រូវបានគេមើលឃើញថា រស់ក្នុងភាពស៊ីវីល័យទៀតផង ដោយមានទាំងរថយន្តទំនើបៗតម្លៃរាប់ម៉ឺនដុល្លារធ្វើជាយានផង ក្នុងនោះ នាងមានរថយន្តឡិចស៊ី ៣៣០ ជិះតាំងពីមានមុខក្នុងសិល្បៈដំបូងៗម្ល៉េះ ឯរបស់ប្រើប្រាស់ផ្សេងៗរបស់នាង ក៏សុទ្ធជារបស់ប្រភេទ Brand ដែរ។

មកដល់បច្ចុប្បន្ន គេឃើញនាងបានប្ដូរមកជិះទំនើបជាងមុន តម្លៃក៏កប់ជាងមុនដែរហើយ គឺរថយន្តឡង់គ្រីស័រស៊េរីថ្មីតម្លៃជិត ១០ម៉ឺនដុល្លារឯណោះ។ ក្រៅពីនេះ នាងក៏ធ្លាប់ប្រាប់សារព័ត៌មានដែរថា នាងមានដីច្រើនហិកតាទៀតនៅខេត្តបាត់ដំបង។ ដូច្នេះហើយ ប្រិយមិត្តនាង នៅមិនទាន់ជឿជាក់ថា នាងមានធុរៈចាំបាច់ត្រូវបង្ខំចិត្តលក់ផ្ទះដូច្នេះនោះឡើយ ហើយពួកគេបានដេញដោលពីបញ្ហានេះ។

ជាក់ស្ដែងគណនីហ្វេសប៊ុកមួយរូប បានសួរចំៗថា តើនាងលក់ផ្ទះចាស់នេះ ដើម្បីទៅផ្ទះថ្មីឬយ៉ាងណា? ផ្ទុយពីការបញ្ជាក់មកកាន់ Sabayបេប៊ី បានផ្ដល់ចម្លើយវិជ្ជមានតបទៅសំណួររបស់អ្នកគាំទ្ររូបនោះ។ នាងឆ្លើយថា "ចាសពិតមែនហើយ"។ យ៉ាងនេះក្ដី នាងមិនបានបរិយាយវែងឆ្ងាយពីបញ្ហាផ្ទះថ្មីនោះឡើយ។

កញ្ញា បេប៊ី ត្រូវបានគេស្គាល់ថាជាពិធីការិនីប្រចាំស្ថានីយទូរទស្សន៍ MYTV ហើយជាតារាចម្រៀង និង តារាសម្ដែងវ័យក្មេងសិចស៊ីមួយរូប។ នាងបាន ធ្វើអោយមានការទាក់ទាញបំផុតពីប្រិយមិត្តអ្នកទស្សនាជាពិសេស ក្បាច់រាំ ឥឡូវនេះកញ្ញា កំពុងតែមានការទទួលកម្មវិធីតន្ត្រីជាច្រើន៕

អត្ថបទ៖ ទារិកា