ម្ចាស់ស្តង់ជាច្រើនថា "មិនទិញក៏បាន គ្រាន់តែបានស្គាល់ពេញចិត្តស្តូក"

2014-11-16 22:52:56
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលក់ផលិតផលនៅតាមស្តង់ពិព័រណ៍បច្ចេកវិទ្យា ITET និយាយថា ពួកគាត់មានអារម្មណ៍សប្បាយរីករាយណាស់ ដែលបានឃើញមានអ្នកចូលរួមទស្សនាយ៉ាងច្រើនកុះករ។ ពួកគាត់ភាគច្រើននិយាយថា "ឃើញបងប្អូនមកច្រើនបែបនេះ ទោះមិនបានទិញគ្រាន់តែបានទស្សនានិងបានស្គាល់គឺគ្រប់គ្រាន់ហើយ"។

កំពុងតែឈរនិយាយពន្យល់ភ្ញៀវខ្វែងដៃខ្វែងជើង យុវជន ពិសិដ្ឋ បុគ្គលិកស្តង់ក្រុមហ៊ុន អង្គរ អ៊ី និង ស៊ីនិយាយថា ទស្សនិកជនដែលមកទស្សនាពិព័រណ៍ភាគច្រើនមកគ្រាន់តែចង់ឃើញនិងស្វែងយល់ផលិតផលនានាដែលក្រុមហ៊ុនដាក់តាំងបង្ហាញ ហើយបើថាមកដើម្បីទិញគឺតិចបំផុត។

"ដូចរបស់ពួកយើងអញ្ចឹង អ្វីដែលពួកខ្ញុំចង់បាន គឺចង់ឲ្យប្រជាពលរដ្ឋខ្មែរស្គាល់ពីស្នាដៃ និងផលិតផលបច្ចេកវិទ្យា ដែលបង្កើតឡើងពីក្រុមហ៊ុនរបស់លោក។ ថ្ងៃក្រោយបើពួកគេចាប់អារម្មណ៍ និងត្រូវការអាចទំនាក់ទំនងក៏ថាបានដែរ"។

ស្រដៀងគ្នានេះដែរ លោកហៀង ឈុនហេង ជាបុគ្គលិកផ្នែកលក់នៃក្រុមហ៊ុន W&H ដែលជាក្រុមហ៊ុននាំចូលផ្ដាច់មុខផលិតផលដូចជា កាមេរ៉ា blackmagic កាណុងកាមេរ៉ា និងផលិតផលផ្សេងៗជាច្រើនទៀត សម្រាប់ប្រើប្រាស់ក្នុងវិស័យថតភាពយន្ត ប្រាប់ថា៖ "ពួកខ្ញុំមិនរំពឹងថា ការតាំងពិព័រណ៍បីថ្ងៃនេះ អ្នកចូលរួមគាត់ទិញគ្រប់ផលិតផលដែលយើងច្រើនទេ តែគ្រាន់តែចង់បង្ហាញថា ក្រុមហ៊ុនមួយចំនួននៅខ្មែរយើងឥលូវ ក៏មាននាំចូលនូវផលិតផលគុណភាពល្អពីក្រុមហ៊ុនល្បីដូចគ្នា មិនចាំបាច់ចំណាយពេល ចំណាយលុយទៅទិញមកពីក្រៅប្រទេសទៀតទេ"។

បែរមកជួបជាមួយ លោក គ្រុយ វណ្ណា ជាអ្នកបង្កើតក្តារចុចឆ្លាតវៃសម្រាប់ប្រើនៅលើ iOS ប្រាប់ថា កម្មវិធីក្ដារចុចនេះខាងក្រុមការងាររបស់លោក ដាក់ឲ្យដំណើរការបានប្រហែល ១ខែហើយ ដែលជាស្នាដៃរបស់កូនខ្មែរសុទ្ធសាធ។ ក្នុងការចូលរួមពិព័រណ៍នេះ លោកចង់បង្ហាញប្រាប់ពលរដ្ឋខ្មែរថា មានស្នាដៃសមិទ្ធផលបច្ចេកវិទ្យាជាច្រើនដែលកូនខ្មែរបានបង្កើតឡើង មិនចាញ់បរទេសឡើយ៕

កុំភ្លេច មកទស្សនាថ្ងៃចុងក្រោយនៃពិព័រណ៍បច្ចេកវិទ្យាល្ងាចនេះទាំងអស់គ្នាណា!

អត្ថបទ៖ យិន សំបូរ