ត្រឹមដើមឆ្នាំ២០១៩ មច្ចុរាជមិនប្រណី ឆក់យកជីវិតតារា៥ដួង ឲ្យឃ្លាតឆ្ងាយគ្រួសារយ៉ាងកម្សត់

2019-01-28 03:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ត្រឹមដើមឆ្នាំ២០១៩ នេះ មច្ចុរាជហាក់មិនប្រណី បានឆក់យកជីវិតតារាច្រើនដួង ឲ្យឃ្លាតឆ្ងាយពីក្រុមគ្រួសារ យ៉ាងអាណោចអាធ័មបំផុត។ ក្នុងនោះមានដូចជា៖

១. ខេមរៈ ស្រីពៅ

ដោយសារតែជំងឺសួត និងក្រលៀន មានសភាពធ្ងន់ធ្ងរពេក តារាចម្រៀងរូបនេះបានមរណភាពនៅប្រទេសឥណ្ឌា កាលពីថ្ងៃសុក្រ ទី២៥ ខែមករា ឆ្នាំ២០១៩។ ដំណឹងក្រៀមក្រំរបស់តារាស្រីមានឈ្មោះពិត ខែម ស្រីពៅ បានធ្វើឲ្យអ្នកសិល្បៈ និងមហាជនជាច្រើនមានអារម្មណ៍សោកសៅយ៉ាងខ្លាំង ។

ចំពោះបុណ្យ៧ថ្ងៃរបស់អតីតតារាអាយុ២៨ឆ្នាំ រូបនេះ ត្រូវបានគេដឹងថាធ្វើឡើងនៅថ្ងៃ៣១ ខែ មករា ឆ្នាំ ២០១៩ នៅគេហដ្ឋានលោក ខេមរៈ ភារុណ ក្បែរវត្តសំរោងអណ្ដែត។

២. រឿន សារ៉ាត់

តារាសម្ដែងទើបប្រឡូកសិល្បៈរូបនេះ បានមរណភាពដោយសារលង់ទឹក នៅខេត្តកំពត ពេលទៅដើរលេងជាមួយមិត្តភ័ក្ដិ និងលោក យូ ឌីស្កូ កាលពីថ្ងៃអង្គារ ទី២២ ខែមករា ឆ្នាំ ២០១៩។ ក្រុមគ្រួសាររបស់តារារូបនេះ មានជីវភាពក្រខ្សត់ ដោយឪពុកជរាមានជំងឺលើសឈាម ម្ដាយមានជំងឺបេះដូង និងប្អូនប្រុសមានសុខភាពមិនមាំទាំ។

ឪពុករបស់តារារូបនេះ រៀបរាប់ទាំងទឹកភ្នែក ក្រោយមរណភាពរបស់កូនច្បងដែលធ្លាប់តែជាចំហក្នុងគ្រួសារ ហើយគ្មានអ្នករ៉ាប់រងចិញ្ចឹមគ្រួសារដូចមុន។

៣. គង់ ណារី

សាស្ត្រាចារ្យបង្ហាត់ចម្រៀង គង់ ណារី បានទទួលមរណភាពនៅវេលាថ្ងៃត្រង់ ទី២០ខែមករានេះដោយរោគាពាធក្នុងវ័យ ៦៥ឆ្នាំ បន្ទាប់ពីសម្រាកព្យាបាលនៅមន្ទីរពេទ្យព្រះកុសមៈ។

សាស្ត្រាចារ្យ គង់ ណារី ជាគ្រូបង្ហាត់ចម្រៀងមួយរួបនាទស្សវត្សទី៨០ ដោយធ្លាប់បង្ហាត់បង្រៀនតារាល្បីៗជាច្រើនដូចជា លោក ឃុំ ប៉ុណ្ណាដែត, ទិត្យ វិច្ឆិកា, ហង្ស ពិសី, យ៉ុង កន្និកា, លោក ទុយ, លោក អ៊ុក ណារីម និងតារាៗជាច្រើនរូបទៀតផងដែរ។

៤. ឈុន វណ្ណា

តារាជើងចាស់ ឈុន វណ្ណា បានទទួលមរណភាពដោយជរាពាធ នៅប្រទេសអាមេរិក កាលពីថ្ងៃសុក្រ ទី២៥ ខែមករា ឆ្នាំ ២០១៩ វេលាម៉ោង ១ថ្ងៃត្រង់ (ម៉ោងនៅអាមេរិក) ក្នុងវ័យ៨០ឆ្នាំ ។

តារាជើងចាស់ ឈុន វណ្ណា ជាអ្នកសិល្បៈជំនាន់តារាចម្រៀង ប៉ែន រ៉ន ដោយបានកសាងភាពល្បីល្បាញខ្លាំងក្នុងទសវត្សទី ៦០ -៧០។ បទល្បីជាងគេរបស់អតីតតារាចម្រៀងរូបនេះ គឺ កុកហើរតែឯង វាលអើយវាលធំ រួមទាំងបទចម្រៀងជាច្រើនទៀត៕

៥. គង់ ចម្រើន

តារាចម្រៀងតាម Affair ម្នាក់ឈ្មោះ គង់ ចំរើន បានបាត់បង់ជីវិតគួរឲ្យសោកស្ដាយចោលកូនស្រី២នាក់ ក្រោយកើតជំងឺបេះដូង ហើយគ្មានប្រាក់ព្យាបាល ទុករហូតដល់ស្លាប់ខ្លួន។ កាន់តែអាណោចអាធ័ម ក្នុងគ្រួសាររបស់សពតារាចម្រៀង គង់ ចម្រើន មានអ្នកស្លាប់ចំនួន៣នាក់ហើយ ត្រឹមរយៈពេល១ឆ្នាំ។

សាច់ញាតិទី១ដែលបានធ្វើមរណកាលផុតទៅ គឺម្ដាយ ទី២គឺបងស្រីរបស់លោក និងពេលនេះ គឺលោក ខ្លួនឯង។ លោក គង់ ចម្រើន ស្លាប់នៅអាយុ ៣៨ឆ្នាំ លោកគឺជាតារាចម្រៀងចល័តតាម Affair នានា និងមិនមានច្រៀងប្រចាំនៅវង់អកកេសណាមួយឡើយ៕