ពូកែមែន! ក្រុមអ្នកបង្កើត App សម្រួលការចតឡាន វ៉ាបានលេខ១ អមរង្វាន់ដើរលេងនៅសិង្ហបុរី
- 2019-02-01 10:45:29
- ចំនួនមតិ 0 | ចំនួនចែករំលែក 0
ពូកែមែន! ក្រុមអ្នកបង្កើត App សម្រួលការចតឡាន វ៉ាបានលេខ១ អមរង្វាន់ដើរលេងនៅសិង្ហបុរី
ចន្លោះមិនឃើញ
បន្ទាប់ពីបានធ្វើឲ្យក្រុមគណៈកម្មការស្ងើចសរសើរនាអំឡុងវគ្គផ្ដាច់ព្រ័ត្រកាលពីថ្ងៃព្រហស្បតិ៍ ក្រុមសំចត ដែលជាកម្មវិធីទូរសព្ទដៃសម្រាប់ជួយសម្រួលឲ្យអ្នកបើកបរអាចស្វែងរកកន្លែងចតយានយន្ដរបស់ពួកគេបានកាន់តែងាយស្រួល ត្រូវបានជ្រើសរើសជាក្រុមជយលាភីក្នុងកម្មវិធី SmartStart Young Innovator Program រដូវកាលទី ២ដោយបានឈ្នះរង្វាន់ដំណើរកម្សាន្តទៅប្រទេសសឹង្ហបុរី។
នាយកប្រតិបត្តិក្រុមហ៊ុន Smart Axiata លោក ថូម៉ាស ហ៊ុន (Thomas Hundt) បានរៀបរាប់ថា៖ “សូមអបអរសាទរដល់ក្រុមសំចតដែលមានការរីកចម្រើនគួគួរឲ្យកត់សម្គាល់ក្នុងរយៈពេលប្រាំមួយខែកន្លងទៅនេះ ហើយព្រមទាំងបានជួយបង្កើនគុណភាពនៃសមិទ្ធិផលរបស់កម្មវិធី SmartStart។ ការបង្ហាញពីគំនិតអាជីវកម្មរបស់ពួកគេ ធ្វើឲ្យពួកយើងមានមោទនភាពណាស់ចំពោះការព្យាយាមរបស់ពួកគេនៅក្នុងកម្មវិធីនេះ។ កម្មវិធីផ្ដួចផ្ដើមបែបនេះ សបញ្ជាក់ឲ្យឃើញថា កម្ពុជាកំពុងមានបរិយាកាសដ៏រីកចម្រើនសម្រាប់ក្រុមហ៊ុនទាំងឡាយដែលទើបនឹងបង្កើតថ្មី ហើយធនធានមនុស្សដែលពោរពេញដោយទេពកោសល្យ ក៏កំពុងជួយលើកស្ទួយបរិយាកាសនេះ ឲ្យកាន់តែប្រសើរឡើងថែមមួយកម្រិតទៀត។ នេះគឺជាសញ្ញាដ៏វិជ្ជមានចំពោះទស្សនៈវិស័យរួមរបស់យើងក្នុងការបង្កើតសេដ្ឋកិច្ចឌីជីថលដែលមាននិរន្តរភាព។”
ក្រុមចំនួន ៤ ផ្សេងទៀតដែលបានចូលរួមប្រកួតក្នុងវគ្គផ្ដាច់ព្រ័ត្ររួមមានដូចជា ក្រុម Homex ដែលជាកម្មវិធីទូរសព្ទដៃ ១ សម្រាប់ឲ្យអ្នកដែលត្រូវការជួសជុលផ្ទះ អាចភ្ជាប់ទំនាក់ទំនងជាមួយជាងដែលអាចទុកចិត្តបាន។ ក្រុម Haystome ដែលជាកម្មវីធីសម្រាប់ឲ្យភ្ញៀវទេសចរអាចទាក់ទងទៅកាន់សិល្បករខ្មែរ ដើម្បីទទួលបានបទពិសោធន៍សិល្បៈសិល្បៈដ៏ពិសេស។ ក្រុម Malis ដែលជាកម្មវិធីសម្រាប់ឲ្យអតិថិជនណាត់ពេលវេលាជាមួយហាងថែរក្សាសម្ផស្ស និង ក្រុម Tos Rean ដែលជាកម្មវិធីផ្គូផ្គងសិស្សនិងគ្រូបង្រៀន។
ក្រុមទាំង ៥ បានឈ្នះប្រាក់រង្វាន់ឧបត្ថម្ភចំនួន ៤០០០ ដុល្លារអាមេរិក និងទទួលបានការចូលរួមកម្មវិធីបណ្ដុះបណ្ដាលផ្នែកអាជីវកម្មរយៈពេល ៦ ខែកាលពីខែ មិថុនា ឆ្នាំ២០១៨ ជាមួយ Impact Hub ហើយបានចូលរួមប្រកួតកាលពីម្សិលមិញនៅឯ Impact Hub Phnom Penh ដើម្បីដណ្ដើមយករង្វាន់ដំណើរកម្សាន្ត “Tech Trip” ដែលទទួលបានប្រាក់ឧបត្ថម្ភទាំងស្រុង ទៅកាន់ប្រទេសសឹង្ហបុរី ដើម្បីធ្វើទស្សនកិច្ចនៅក្រុមហ៊ុនបច្ចេកវិទ្យាដូចជា Facebook Google និង Microsoft។
កញ្ញា Mélanie Mossard នាយកផ្នែកសហគមន៍នៅ Impact Hub ភ្នំពេញ បានលើកឡើងថា៖ "ខ្ញុំមានអារម្មណ៍រីករាយក្រៃលែងដែលបានឃើញក្រុមនិស្សិតរបស់យើងឆ្លើយតបយ៉ាងសកម្មទៅនឹងមតិយោបល់ណែនាំនិងសិក្ខាសាលាទាំងឡាយនាអំឡុងពេលបណ្ដុះបណ្ដាល។ ខ្ញុំពិតជាស្ងើចសរសើរចំពោះការប្ដេជ្ញាចិត្តនិងឆន្ទៈរបស់ពួកគេដែលចង់សិក្សា និងទទួលបានបទពិសោធន៍ថ្មីថ្មីៗ ក៏ដូចជាឱកាសផ្សារភ្ជាប់ទំនាក់ទំនងថ្មីៗផងដែរ។ សមាជិក Impact Hub របស់យើងទាំងអស់ ពិតជាចង់ឃើញក្រុមទាំងអស់អភិវឌ្ឍគំនិតរបស់ពួកគេបន្ថែមទៀត ព្រមទាំងប្រើប្រាស់ការគាំទ្រជាបន្តបន្ទាប់ពីពួកយើង សម្រាប់ជួយត្រួសត្រាយផ្លូវរបស់ពួកគេក្នុងដំណើរសហគ្រាសនេះ។”
សម្រាប់ព័ត៌មានបន្ថែមទាក់ទងនឹងគំនិតផ្តួចផ្តើមទំនួលខុសត្រូវរបស់ក្រុមហ៊ុន Smart សូមតាមដានទំព័រហ្វេសប៊ុក Smart ឬក៏ចូលមកកាន់គេហទំព័រ www.smart.com.kh៕