U-17 ភ្នំពេញក្រោនលើកពានលីកយុវជន ឯ U-15ត្រៀមលើកពានទៀត

2014-11-17 17:06:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតបាល់ទាត់លីកយុវជនអាយុក្រោម១៧ឆ្នាំ (U-17) បានបញ្ចប់កាលពីម្សិលមិញនេះ ដោយយុវជនភ្នំពេញក្រោនបានលត់យុវជនអាកាសចរណ៍ស៊ីវិល ១៦-០ ដើម្បីលើកពានលីកយុវជននេះពីរឆ្នាំជាប់គ្នា។

ម្ចាស់ជើងឯកចាស់នេះធ្វើបានយ៉ាងល្អ ដោយឆ្លងកាត់៦ប្រកួតកន្លងមកក្រុមនេះទទួលបានជ័យជម្នះទាំង៦ប្រកួតមាន១៨ពិន្ទុពេញ ហើយស៊ុតបញ្ចូលទីដៃគូបាន៧៤គ្រាប់ និងរបូតទៅវិញតែ២គ្រាប់ប៉ុណ្ណោះ។ យុវជនចម្ការកៅស៊ូបឹងកេតទទួលបានលេខពីរ ដោយ៦ប្រកួតឈ្នះ៣ ស្មើ១ និងចាញ់២ រីឯយុវជនអាកាសចរណ៍ស៊ីវិលលេខ៣ ក្រោយ៦ប្រកួតឈ្នះ២ ស្មើ១ និងចាញ់៣។ ក្រុមបាតតារាងបងប្អូនមិនដែលស្គាល់រសជាតិឈ្នះសោះឡើយ ហើយត្រូវគេបំប៉ោងសំណាញ់ទីចំនួន៩៨គ្រាប់ និងតដៃគេបានត្រឹមតែ៤គ្រាប់ប៉ុណ្ណោះ។

U17 PPC

ងាកទៅមើលលីកយុវជនអាយុក្រោម១៥ឆ្នាំវិញ ក៏ជិតនឹងបញ្ចប់ហើយដែរ ដោយនៅតែមួយសប្ដាហ៍ទៀតប៉ុណ្ណោះនឹងបិទបញ្ចប់ការប្រកួត ខណៈដែលយុវជនភ្នំពេញក្រោនក៏នៅតែបន្តភាពខ្លាំងរបស់ខ្លួនដោយឈ្នះទាំង៧ប្រកួតជាប់គ្នា ហើយក៏ធានាបានតំណែងជើងឯករួចជាស្រេចហើយដែរ បើទោះបីជានៅសល់មួយប្រកួតទៀតជាមួយក្រុមសាលាបាល់ទាត់ជាតិក្ដី។ យុវជនក្រោននៅពេលនេះមាន២១ពិន្ទុ លើសដៃគូប្រជែងអាកាសចរណ៍ស៊ីវិល៣ពិន្ទុ និងសាលាបាល់ទាត់ជាតិ៥ពិន្ទុ ដូច្នេះលទ្ធផលនៅប្រកួតចុងក្រោយយ៉ាងណា U15 ភ្នំពេញក្រោន នៅតែអាចលើកពានបានដដែល ពីព្រោះគេគិតរូបមន្ត Head to Head។