ក្រោយជោគជ័យសម្បើមនៅកាណាដា ម្តងនេះ មានខ្មែរតែម្នាក់គត់គឺ ឡាយ លក្ខិណា ត្រូវថត MV ជាមួយតារារ៉េប

2019-03-14 03:35:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីបង្កើតភាពជោគជ័យលើសការរំពឹងទុកពេលសម្ដែងនៅប្រទេសកាណាដា ជាមួយតារារ៉េបអន្តរជាតិឈ្មោះ Clarence ប្រជាប្រិយភាពរបស់ ឡាយ លក្ខិណា កាន់តែមានទីផ្សាខ្ពស់។ តារារូបនេះ ប្រាប់ថា គ្រោងនឹងវិលត្រលប់ទៅប្រទេសកាណាដាម្ដងទៀតនៅខែកក្កដា ដើម្បីថត MV ហើយដាក់លើ itune ថែមទៀតផង ។

បើនិយាយពីជនជាតិខ្មែរ គឺមានតែ ឡាយ លក្ខិណា ម្នាក់គត់ ដែលខាងផលិតកម្ម Sandap C Production អញ្ជើញសម្រាប់ការថត MV នៅក្រៅប្រទេស។ បែបនេះ កាន់តែធ្វើឲ្យតារាធ្លាប់ជាប់ងារជា ស្រីស្អាតចំណោមបុប្ផា៤ទង អំឡុងឆ្នាំ២០០០ សប្បាយរីករាយ និងមានមោទកភាពចំពោះការខំប្រឹងប្រែងរបស់ខ្លួន បើទោះជា ឡាយ លក្ខិណា ធ្លាប់ផ្អាកសិល្បៈច្រើនឆ្នាំទៅហើយក្ដី។

តារាសាច់ចាំរូបនេះ បង្ហើបថា គ្រោងនឹងថត MV ចំនួន២បទ ដោយចំណងជើងបទចម្រៀងសុំលាក់សិន ។ ក្រៅពីនេះ បេសកកម្មនៅប្រទេសកាណាដានាខែកក្កដា ខាងមុខ មិនទាន់ច្បាស់ថា ចំនួនប៉ុន្មានខែនោះទេ ។ ប៉ុន្តែក្រៅពីថត MV ខ្លួនក៏គ្រោងនឹងចេញទៅថតសម្លេង ដោយចាប់ដៃគូច្រៀងជាមួយតារាចម្រៀងអន្តរជាតិម្នាក់ទៀត ផងដែរ។

ឡាយ លក្ខិណា បន្តថា បានចុះកុងត្រានៅផលិតកម្មនេះរយៈពេល៣ឆ្នាំ ដោយខាងផលិតកម្មនឹងផលិតបទចម្រៀង Original Song សម្រាប់ខ្លួនជាបន្តបន្ទាប់។ បន្ទាប់ពីចាកចេញពីកាណាដា ឡាយ លក្ខិណា ឲ្យដឹងថា អាចនឹងគ្រោងចេញទៅបារាំង និងអាមេរិក ក្នុងឆ្នាំ ២០១៩ នេះ តែកំពុងរៀបចំឯកសារ និងការពិភាក្សាគ្នាបន្ថែមទៀត៕

អត្ថបទ៖ លឹម សុនា